მას შემდეგ, რაც მიმდინარე წლის საბიუჯეტო თანხების ცვლილებებზე თუ სეკვესტრზე ლანჩხუთის მუნიციპალიტეტის საკრებულომ თანხმობა მისცა საკითხის ადმინისტრაციულ წარმოებას, დეპუტატები და დაინტერესებული პირები, იმის გარკვევას შეუდგნენ, თუ რატომ გავარდა საფეხბურთო კლუბი ლანჩხუთის "გურია" უმაღლესი ლიგიდან და როგორი მიზნობრიობით მოხდა ბიუჯეტში კლუბისთვის გამოყოფილი თანხების ხარჯვა.
რიგგარეშე სხდომის დღის წესრიგში აღნიშნულ საკითხზე გამომსვლელად სამი ადამიანის სახელი და გვარი ფიგურირებდა _ კლუბის აღმასრულებელი, ფინანსური და სპორტული დირექტორების: ოთარ ჩხაიძის, თენგიზ კიკვაძის და ედიშერ ჟორდანიას.
დეპუტატები დაინტერესდნენ, თუ რატომ არ საუბრობდა თემაზე თავად გამგებელი და ამავდროულად, კლუბის პრეზიდენტი, ზაზა ურუშაძე.
დეპუტატებმა მოითხოვეს კიდეც გამგებლისგან პასუხი, მაგრამ ურუშაძის თქმით, მან რამდენიმე თვის წინ დატოვა პრეზიდენტის პოსტი და ანგარიში სწორედ წარმოდგენილმა ადამიანებმა უნდა გააკეთონ.
სხდომაზე მყოფთა უმრავლესობამ არ იცოდა, როდის დატოვა ურუშაძემ, ეს, მისივე თქმით, სიმბოლური თანამდებობა, ისევე, როგორც თავის დროზე არ იცოდნენ, გამგებელმა როგორ დაინიშნა თავი კლუბის პრეზიდენტად. როგორც გაირკვა, საპარლამენტო არჩევნების დროს შტაბის უფროსად დანიშვნამ აიძულა ურუშაძე, ეს პოსტი დაეტოვებინა.
ურუშაძე თვლის, რომ როგორც გამგებელს პასუხისმგებლობა ისედაც არ აკლია და ის მზადაა რეაგირებები მოახდინოს. მთავარი დარტყმა გადავიდა ოთარ ჩხაიძესა და თენგიზ კიკვაძეზე, რომლებმაც დარბაზის ტრიბუნიდან სცადეს ანგარიშის წარდგენა, არგუმენტებიც მოიშველიეს, რომ გუნდის გავარდნაში მათი წვლილი არც ისე დიდია, მაგრამ დეპუტატთა და მოწვეულ სტუმართა უმეტესობას არც ამის სჯერათ და არც იმისა, თავად ზაზა ურუშაძის ბრალეულობა ვინმეზე ნაკლებია ამ საკითხის ირგვლივ.
თუმცა, ამის პირდაპირ თქმა ამ შეხვედრაზე ვერავინ შეძლო, მიუხედავად იმ უამრავი მინიშნებისა, რომელიც ამ სხდომაზე გაკეთდა. დეპუტატები ითხოვდნენ პასუხებს კითხვებზე, თუ სად წავიდა ის თანხები, რომლებიც მიმდინარე წლის ბიუჯეტში აისახა? რატომ ხდებოდა მწვრთნელებისა და ფეხბურთელების ასე ხშირი ცვლა? რა მოიტანა იმ სპონსორის მოწვევამ, რომელმაც უამრავი უხარისხო ფეხბურთელი ჩამოიყვანა გუნდში და მარტო ამათი დამტკიცება კლუბს ასი ათას ლარზე მეტი დაუჯდა? უფრო სწორად, საუბარია 150 ათას ლარზე, რომელიც თენგიზ კიკვაძის თქმით, თანაბრად გადაიხადეს, როგორც სპონსორებმა, ასევე, კლუბმა.
სხდომაზე ისმოდა სხვადასხვა ბრალდებები, რაც დაძაბულობის ფონს ზრდიდა. თითქმის, სამსაათიანი მსჯელობის შემდეგ მაინც ვერ გაირკვა, კლუბის წარუმატებლობაში ვინაა კონკრეტული დამნაშავე, ვინ არის პასუხისმგებელი და რა იყო ამ ჩავარდნის რეალური მიზეზი. ითქვა, რომ კლუბის არასწორმა მენეჯმენტმა გამოიწვია ასეთი შედეგი, კლუბის მესვეურები შეცდომებს გარკვეულწილად კი აღიარებენ, მაგრამ მიაჩნიათ, რომ ის თანხა, რომელიც ბიუჯეტში ჩაიდო, უმაღლესი ლიგისთვის არასაკმარისია. ამას რიგი დეპუტატები არ ეთანხმებიან, რადგან უკეთესი მენეჯმენტის შემთხვევაში, უფრო დაბალი დაფინანსებითაც უკეთ უთამაშია კლუბს და დღესაც არიან ლიგაში გუნდები, რომლებსაც არც ამ თანხების ფუფუნება აქვთ.
საკრებულოს დეპუტატების საკითხი წამოწიეს და კითხვებიც დასვეს, მაგრამ პასუხები არაერთგვაროვანია იმაზე, თუ ვინ არის რეალურად დამნაშავე "გურიას" წარუმატებლობაში. საკრებულოს თავკაცმა, გოგი ხელაძემ გამგებელს მოუწოდა საკითხი ჯეროვნად შეესწავლა და კლუბის ხელმძღვანელთა პასუხისმგებლობის საკითხიც დაეყენებინა.
შეგახსენებთ, რომ ანტიკორფუციული სამსახური, თავის მხრივ, სწავლობს კლუბის ფინანსურ მდგომარეობას, კერძოდ, ქონების განკარგვის მიზნობრიობას. საგულისხმოა, რომ რომან ბიწაძემ პირდაპირ მიუთითა გამგებელზე, რომ სწორედ მან შემოიყვანა კლუბში ეს მაკონტროლებელი ორგანო, რათა მოვლენათა ეპიცენტრი სხვა სიბრტყეში გადაიტანოს და წარუმატებლობა სხვებს გადააბრალოს. ბიწაძის ამ რეპლიკას გამგებლის მხრიდან არანაირი კომენტარი არ მოჰყოლია.
სხდომაზე ბევრჯერ გაჟღერდა, რომ ურემი გადაბრუნდა და სწორი გზა ახლა მაინც მოინახოს. თუმცა, ეს შეხვედრა ნაკვალევის ძიებას უფრო ჰგავდა, ვიდრე ახალი გზისას. ბევრმა კიდეც, რომ ამ შედეგამდე სპორტში, ამ შემთხვევაში კი ფეხბურთში პოლიტიკის გარევამ მიგვიყვანა.
