ჩოხატაურის მუნიციპალიტეტის სოფელ ზემო სურების მოსახლეობის ნაწილი ადგილობრივ ხელისუფლებას უყურადღებობაში ადანაშაულებს. ე. წ. წითელგორას უბნის მცხოვრებლებს სამი თვეზე მეტია, გზა არა აქვთ. ხიდზე, რომელიც სოფლის პროგრამის განვითარების ფარგლებში გაკეთდა, წელს გავლა არ შეიძლება, რადგან, როგორც იქაურები ამბობენ, ბურჯი გამაგრებული არ აქვს. მოსახლეობას მდინარეზე თავიანთი ხელით საგანგებოდ გადებულ მორზე უხდებათ სიარული, რომელიც მდინარის ადიდების დროს წყლით იფარება:
_ მანქანით გასვლაზე არ ვლაპარაკობთ _ ვერც ცხენით გავდივართ და ვერც ფეხით. ბავშვებს სკოლაში ვერ ვუშვებთ. ცოტა ხნის წინ წყალში მანქანა ჩავარდა და ადამიანი კინაღამ დაიღუპა. სასწრაფო სამედიცინო დახმარების მანქანაც კი ვერ მოდის, _ ამბობენ ადგილობრივები.
მათი თქმით, ხიდის შეკეთება ჩოხატაურის მუნიციპალიტეტის გამგებელმა ირაკლი კუჭავა მათ სამი თვის წინ შეპირდა:
_ არჩევნების წინ დაგვპირდა გამგებელი, მაგრამ შემდეგ დავავიწყდით. მაინცდამაინც რაიმე უბედურება უნდა მოხდეს, რომ მოგვხედონ? _ გვითხრეს სურებში.
ჩოხატაურის მუნიციპალიტეტის გამგებელი ირაკლი კუჭავა ადგილობრივების პრეტენზიებს სამართლიანს უწოდებს და ამბობს, რომ გამგეობამ პრობლემის მოსაგვარებლად ტენდერი დიდი ხნის წინ გამოაცხადა:
_ სურების მაჟორიტარმა დეპუტატმა ოთარ სოროზანიშვილმა დააყენა ეს საკითხი. მოვიკვლიეთ და აღმოჩნდა, რომ ხიდი სტიქიამ დააზიანა. შესაბამისად, შედგა აქტი, გაკეთდა ხარჯთაღრიცხვა და გამოცხადდა ტენდერი, რომელიც შპს "ნიამ" მოიგო, თუმცა, სამწუხაროდ სამუშაოები არ დაუწყია. დღესაც გვქონდა კომპანიის წარმომადგენლებთან საუბარი (კომენტარი ჩაწერილია 16 დეკემბერს). ვადა აქვთ თვის ბოლომდე და თუ ამ ვადაში არ ჩაეტევიან, კომპანიას შავ სიაში შევიყვანთ, _ გვითხრა კუჭავამ.
შპს "ნიას" ხელმძღვანელი ინგა საფარიძე ამბობს, რომ სამუშაოების დაწყებას ხელი უამინდობამ შეუშალა:
_ რამდენჯერმე ვცადეთ გაკეთება, თუმცა უამინდობის გამო ვერ შევძელით. ტექნიკა ახლაც იქ გვყავს, თუმცა, ყინვების და ადიდებული მდინარის გამო სამუშაოების დაწყება რთულდება. სულ სამი დღის სამუშაოა, _ ამბობს საფარიძე.
_ ქალბატონო ინგა, ხელშეკრულება 24 ნოემბერს გააფორმეთ… თუკი ასეთი მცირე დრო სჭირდება ამ საქმის გაკეთებას, რატომ არ აკეთებთ? მოსახლეობას გზა არ აქვს…
_ ტენდერი რომ მოვიგეთ და ხელშეკრულება გავაფორმეთ ამინდებიც გაფუჭდა. ვინ იფიქრებდა, რომ დეკემბერში ასეთ ამინდები იქნებოდა (?!).
_ დეკემბერში ყოველთვის სიცივე, ყინვა და წვიმაა. უმეტეს შემთხვევაში, თოვლიც. განსაკუთრებით სურებში, რომელიც მაღალმთიანია…
_ მესმის, მაგრამ შარშან კარგი ამინდები იყო. საკმაოდ რთული რელიეფია და ეს ართულებს საქმის დაწყებას.
_ ტენდერი ისე მოიგეთ, რომ ადგილი არ გინახავთ?
_ კი, როგორ არა, პირადად ვიყავი ასული. ყველაზე დიდი პრობლემა ისაა, რომ მდინარის კალაპოტია შესაცვლელი. ცოტა ხნის წინ გააკეთეს ეს ხიდი და გაკეთების დროს კალაპოტი შეუცვალეს, რომელიც ისევ ისე დატოვეს, რამაც მოსახლეობას დამატებითი პრობლემები შეუქმნა. ახლა ისევ კალაპოტში უნდა დავაბრუნოთ. გპირდებით, რომ მომავალი კვირის ბოლოს სურებში ხიდი გაკეთებული იქნება, _ ამბობს საფარიძე.
როგორც გავარკვიეთ მეწარმე, რომელმაც წითელგორას ხიდი რამდენიმე თვის წინ გააკეთა, ავთანდილ კიკვაძეა. იგი ჩვენთან საუბრისას ამბობს, რომ მის მიერ შესრულებული სამუშაო ახლანდელთან არაფერ შუაშია:
_ ეს ქალბატონი რომ არ შემოსულიყო ტენდერში და ჩემს მხარეს გაემარჯვა, უკვე მოგვარებული იქნებოდა ეს პრობლემა, _ გვითხრა კიკვაძემ.
მისივე თქმით, სოფლის პროგრამის ფარგლებში წყალამრიდის სამუშაოები უნდა ჩატარებულიყო, თუმცა, მუშაობის დროს გაირკვა, რომ ბურჯი გამოთხრილი იყო და აქედან გამომდინარე, პროექტი შეიცვალა:
_ კორექტირებული პროექტით განსაზღვრული სამუშაოები გავაკეთე 2 300 ლარად. მდინარე რომ გადავაგდე ბურჯის ჩასასმელად, უკვე მოსულიყო იყო სტიქიის სალიკვიდაციო თანხა, რომელიც ითვალისწინებდა ბურჯის გამაგრებას. უნდა ჩაწყობილიყო კუბები და მას შემდეგ უნდა გადმოეგდოთ წყალი. სულ ეს იყო. ათდღიან შუალედზეა საუბარი, თუმცა, შპს "ნიამ" გაწელა სამუშაოები. მას დრო ჯერ კიდევ აქვს.
_ ბატონო ავთანდილ, თქვენ რატომ არ დააბრუნეთ წყალი კალაპოტში?
_ მეორე პროექტი მიაბეს იგივე ხიდზე, იგივე ადგილზე უნდა გაკეთებულიყო. მე არ მეწერა პროექტში, რომ წყალი უკან უნდა დამებრუნებინა.
_ მოსახლეობა ამბობს, რომ თქვენ მიერ გაკეთებული ბურჯი რამდენიმე თვეში დაზიანდა…
_ ბურჯი არ დაზიანებულა. წყალამრიდი კუბები უნდა ჩაიდოს, _ გვეუბნება კიკვაძე და ამბობს, რომ მდინარის კალაპოტში დაბრუნება, შპს "ნიას" უფრო მეტ პრობლემას შეუქმნიდა:
_ ზოგადად პრობლემა მთელ საქართველოშია. ჩვენს ქვეყანაში ისეა არაა აწყობილი სიტუაცია, რომ ვეტაკოთ და უცებ გავაკეთოთ. ყველაფერს მისი განრიგი აქვს, _ ამბობს კიკვაძე.
_ ბატონო ავთანდილ, სპეციალისტები ადასტურებენ, რომ თქვენს მიერ მდინარის კალაპოტის შეცვლამ და ასე დატოვებამ დამატებითი პრობლემები შეუქმნა მოსახლეობას… ასევე, მათ ნათესებსა და სავარგულებს…
_ მე არავისთვის შემიქმნია პრობლემა. საქმე უნდა გაკეთებული 4 000 ლარად და გავაკეთე 2 300-ად. ამ დროს კი ბევრად მეტი დავხარჯე. კიდევ ერთხელ გეუბნებით, რომ მდინარის კალაპოტში დაბრუნების შემთხვევაში შპს "ნიას" ხიდის შესაკეთებლად ბევრად მეტი თანხა დაჭირდებოდა.
ჩოხატაურის მუნიციპალიტეტის გამგეობის მიღება-ჩაბარების კომისიის თავმჯდომარე მინდია ჟღერია ადასტურებს, რომ კიკვაძის ვალდებულებაში წყლის კალაპოტში დაბრუნება არ შედიოდა:
_ პრობლემა რომ იყო, ვიცოდით, ამიტომაც ვთხოვეთ შპს "ნიას", ეს სამუშაოები დროულად დაეწყო. აღნიშნულ კომპანიას სხვა პროექტებიც აქვს მოგებული, თუმცა, ჩვენ ავუხსენით, რატომ იყო მნიშვნელოვანი და აუცილებელი სურებში სამუშაოების დროულად დაწყება. სამწუხაროდ, არ გააკეთა და ამან პრობლემებიც შექმნა, _ ამბობს ჟღერია.
კითხვაზე, იყო თუ არა ცუდად გაკეთებული თავდაპირველი პროექტი, რომელიც მდინარის კალაპოტის შეცვლას და შემდეგ უცვლელად დატოვებას ითვალისწინებდა პასუხის გაცემა უჭირს:
_ ზოგადად არის პროექტები, რომლებსაც ხარვეზები აქვს და ამის გამო კორექტირების შეტანა გვიწევს. თუმცა, ამ კონკრეტულ შემთხვევაზე ამჟამად ვერაფერს გეტყვით, რადგან დეტალურად უნდა გავიარო. ის ვიცი, რომ კიკვაძის გაკეთებულ ბურჯს პრობლემა არ ჰქონია და ამ დღეებში თუ რამე მოხდა, ვერ გეტყვით, _ გვითხრა ჟღერიამ, რომლის თქმით, შპს "ნიას" ხელმძღვანელს გამგეობაში ანგარიშის ჩასაბარებლად დღეს ელოდებიან.
