"გურია ნიუსის" სტატიას – არაერთგზის ნასამართლევი "ოქროს მოწმეები", რომლებიც ძველ დანაშაულებს ხსნიან გარდაცვლილი პატიმრის, გიგა ფარტენაძის ძმა, კობა ფარტენაძე ეხმიანება. სტატიის გამოქვეყნების შემდეგ ფარტენაძე სოციალურ ქსელში განცხადებას ავრცელებს და საქართველოს მთავარ პროკურატურას და მთავრობას მიმართავს. როგორც ფარტენაძის განცხადებაშია აღნიშნული, თუ მისი ძმის მკვლელობაში მსჯავრდებულს, შოთა შანიძეს გაათავისუფლებენ, "მართლაც სათუოდ შეიძება იქცეს ბევრი ადამიანის საქმე".
"თუ საქართველოს მთავარი პროკურატურა იმას იკადრებთ, რომ ადამიანი რომელსაც 33 წელი ჰქონდა მისჯილი, რომელმაც მრავალ ოჯახს გაუმწარა სიცოცხლე, თქვენთან თანამშრომლობისთვის გაანთავისუფლოდ და ,,ოქროს მოწმეებად" მოიხსენიოთ, მაშინ ამ ქვეყანაში ყველაფერი ნებადართულია და მე, საქართველოს მოქალაქე კობა ფარტენაძე გპირდებით, ამ პროცესის თითოეული მონაწილე ძალიან ცუდად აგებთ პასუხს", _ წერს ფარტენაძე.
ფარტენაძე ასევე საქართველოს მთავრობასავ მიმართავს და პროცესის გაკონტროლებას ითხოვს:
"იქნებ გააკონტროლოთ ირგვლივ რა ხდება, თითოეული პროკურორის ან მოსამართლის ქმედება არ მინდა იქცეს საქვეყნო დანაშაულად.
კიდევ ვიმეორებ თუ შოთა შანიძე პირველად მისი სახელი და გვარი საზოგადოებისთვის ცნობილი სიონის ტბაზე მომხდარი მკვლელობის საქმიდან გახდა. 2008 წლის 31 აგვისტოს დაბა სიონში ადგილობრივებსა და დამსვენებლებს შორის წარმოქმნილი კონფლიქტის შედეგად სამი ადამიანი ცეცხლსასროლი იარაღით დაჭრეს. ორი მათგანი – დავით ზურაბიშვილი და ზურაბ მიქაბერიძე გარდაიცვალა, ნუკრი ქავთარაძე კი დაიჭრა. აღნიშნულ მკვლელობის საქმეზე არასრულწლოვანი შოთა შანიძე დააკავეს, რომელსაც სასჯელის სახით, მოგვიანებით, 33 წლით თავისუფლების აღკვეთა მიესაჯა. თუმცა, რამდენიმე ამნისტიის შემდეგ შანიძის სასჯელი საგრძნობლად შემცირდა.
2004 წლის 27 ოქტომბერს, გამსახურდიასა (პეკინი) და მიცკევიჩის ქუჩების კვეთაზე ცნობილი ისტორიკოსის, მარიკა ლორთქიფანიძის შვილიშვილი, დავით ოთხმეზური დაჭრეს. ამჟამად კი, შანიძე 2014 წლის 4 მარტს სასჯელაღსრულების მე-14 დაწესებულებაში ჩემი ძმის გიგა ფარტენაძის გახმაურებული მკვლელობისთვის იხდის სასჯელს.
ამ მკვლელობებამდე, შანიძის სახელი და გვარი სამართალდამცავებისთვის კარგად იყო ცნობილი. შანიძე, 2005-2006 წლებში არაერთგზისაა ნასამართლევი წვრილმანი ხულიგნობის და ძარცვისთვის, რომლის დამადასტურებელი დოკუმენტაციაც ოთხმეზურის მკვლელობის საქმეში დევს და სასამართლო პროცესებზეც გამოიკვლიეს.
ვწუხვარ, რომ მისი განთავისუფლების საკითხი საერთოდ დაისვა და თუ ეს მოხდება, მაშინ მართლაც სათუოდ შეიძება იქცეს ბევრი ადამიანის საქმე", _ აღნიშნავს ფარტენაძე განცხადებაში.
შეგახსენებთ, რომ გუშინ "გურია ნიუსმა" გამოაქვეყნა სტატია, სადაც რამდენიმე გახმაურებული მკვლელობის მთავარ მოწმეებზეა საუბარი. საქმე 11-12 წლის წინ მომხდარ დანაშაულებს ეხება, რომელიც მთავარმა პროკურატურამ 2016 წლის გაზაფხულზე გახსნა. ამ დრომდე სასამართლო პროცესები მიმდინარეობდა, დაკითხულები არიან მკვლელობის მთავარი მოწმეები, რომლებიც ერთიდაიგივე პირები არიან – შოთა შანიძე და გიორგი მორჩილაძე.
2016 წლის 1 დეკემბერს, შოთა შანიძე 2004 წლის 27 ოქტომბერს, თბილისში, გამსახურდიასა (პეკინი) და მიცკევიჩის ქუჩების კვეთაზე მომხდარი მკვლელობის საქმეზე დაიკითხა. ამ დაკითხვიდან რამდენიმე დღეში, 2016 წლის 8 დეკემბერს, შოთა შანიძე ასევე მთავარ მოწმედ უკვე 2005 წლის 13 დეკემბერს, თბილისში, გამსახურდიას (პეკინის) ქუჩაზე მომხდარი მკვლელობის საქმეზე დაკითხეს.
ასევე, ოთხმეზურის მკვლელობის საქმეზე 28 ნოემბერს დაკითხეს გიორგი მორჩილაძე, იგივე მოწმე კი, ირაკლი გურაბანიძის მკვლელობის საქმეზე მოწმედ 14 დეკემბერს გამოვიდა.
ზემოთ აღნიშნულ მკვლელობებს ერთმანეთთან კავშირი არ აქვს, თუმცა ორივე შემთხვევაში, პროკურატურა ამტკიცებს, რომ საქმე გახსნილია და დამნაშავე პირები დაკავებულები არიან.
ორივე მკვლელობის საქმე გახმაურებულია. მკვლელობის მოწმეები ერთიდაიგივე პირები არიან. საქმის პროკურორიც ერთია.
