ლანჩხუთის მუნიციპალიტეტის გამგეობის შიდა აუდიტის სამსახურის უფროსმა გია ნაჭყებიამ მუნიციპალიტეტის არასამეწარმეო იურიდიული პირების მიერ, ბოლო სამი წლის გაწეული მუშაობის აუდიტორული შემოწმების ანგარიში წარმოადგინა, ანგარიშის მიხედვით, რამდენიმე სამსახურში სერიოზული დარღვევები დაფიქსირდა.
აუდიტის დასკვნაში ყველაზე მეტი პრობლემა მუნიციპალიტეტის "კულტურულ დაწესებულებათა გაერთიანებაში" აღმოჩნდა, სადაც გარკვეულ გადაცდომებს ჰქონდა ადგილი. როგორც დასკვნაშია აღნიშნული, სამსახურში დარღვევებია ტრანსპორტით მომსახურების საქმეში _ ადგილი აქვს მიმოსვლის მანძილის ხელოვნურად ზრდას. ასევე, სტუმრების მომსახურების რიგ შემთხვევებში ინდმეწარმეებიდან წარმოდგენილ ინვოისებში და ინსპექტირების დასკვნებში, არ დგინდება მიმწოდებლის მიერ შესრულებული ვალდებულებები, თუ რამდენ ადამიანს გაეწია მომსახურება; არ ხდება შეძენილი საქონლის ბალანსზე აყვანა, შემდგომ _ მისი ჩამოწერა.
დასკვნაში, ასევე, ნათქვამია, რომ მასობრივი ხასიათი აქვს ხელფასების ავანსად გაცემის ფაქტებს, ყოველგვარი განცხადებებისა და დირექტორის რეზოლუციის გარეშე. არასწორადაა ნაწარმოები საბუღალტრო საბუთები _ ხარჯთაღრიცხვის მიხედვით, ადგილი აქვს თვეების მიხედვით მომსახურების მუხლებში გადახარჯვას, რაც მთელი წლის განმავლობაში გეგმით გათვალისწინებულ ხარჯებს ემთხვევა. ამავდროულად, აუდიტის სამსახური გარკვეულ ეჭვებს გამოთქვამს, რომ, მიუხედავად არა ერთი სიტყვიერი თუ წერილობითი მოთხოვნისა, შემოწმების პერიოდში არ მოხერხდა საქართველოს ბანკიდან ამონაწერის წარმოდგენა.
შემოწმების შედეგად დადგინდა საკმაოდ საგანგაშო ფაქტი, რომელზეც მოგვიანებით შესაბამისი სამსახურების მხრიდან რეაგირებაც მოყვა:
"დანაშაულის ნიშნის შემცველია ცენტრის საფინანსო განყოფილების უფროსის მიერ, მის პირად ანგარიშზე, "საქვეანგარიშო" მოტივით, რეგულარულად ჩარიცხული თანხები დირექტორის რეზოლუციისა და ბრძანების გარეშე. მას სულ ჩარიცხული აქვს 11 275 ლარი, აქედან, ოქტომბრის თვეში დაბრუნებულია 1 900 ლარი, დეკემბერში კი _ 466 ლარი. ნაშთად 2015 წლის 1 იანვრისთვის რჩება 4 744 ლარი. აღნიშნული თანხა არ არის ასახული წლიურ ბალანსში.
2015 წლის შემოსულობებისა და გადასახადების შესრულების ანგარიშის ფორმაში, რომელიც მას წარმოდგენილი აქვს საფინანსო განყოფილებაში, ხელფასის სახით განაცემი თანხა შეადგენს 849 600 ლარს, აუდიტის სამსახურში წარმოდგენილ ფორმაში კი _ 831 762 ლარს. სწორედ ასეთი უზუსტობები და საქმისადმი არაკეთილსინდისიერი მიდგომა იყო მიზეზი საშემოსავლოსა და განაცემთა ინფორმაციის ბაზაში ნულოვანი დეკლარაციის წარდგენისა. ასევე, არასწორადაა ასახული ბალანსში ძირითადი საშუალებების ნარჩენი ღირებულება 511 957 ლარი, ნაცვლად რეალურად არსებული 492 007,33 ლარისა", _ წერია დასკვნაში.
აუდიტის სამსახური აღნიშნავს, რომ 2016 წლის 1 სექტემბრის მონაცემებით, აღნიშნულ გაერთიანებაში 156 შტატიანი და 164 ხელშეკრულებით აყვანილი თანამშრომელი ირიცხება და მიიჩნევს, რომ ეს ციფრი აუცილებლად გადასახედია.
სხვათა შორის, აუდიტის სამსახურმა შემოწმების შემდეგ, მიზანშეწონილად ჩათვალა, მასალები გურიის სამხარეო პროკურატურისთვის გადაეცა. ასევე, ცნობად იქნა მიღებული, რომ ა(ა)იპ-ის ხელმძღვანელობამ დაკავებული თანამდებობიდან გაათავისუფლა სამსახურის საგეგმო-საფინანსო განყოფილების უფროსი გიორგი ჩხაიძე. მოგვიანებით კი პოსტის დატოვება მოუხდა კულტურის განყოფილების უფროს გია იმნაიშვილსაც. საქმე ძიების პროცესშია.
ა(ა)იპ ლანჩხუთის მუნიციპალიტეტის ბავშვთა საფეხბურთო სკოლაში ჩატარებული აუდიტორული შემოწმებით აღმოჩნდა, რომ ხარვეზებითაა ნაწარმოები საბუღალტრო აღრიცხვა, არ ხდება მომსახურებებზე მიღება-ჩაბარებისა და ინსპექტირების ჯგუფის დასკვნების დადება, ადგილი ჰქონდა ხარჯების მუხლებში თანხების გადანაცვლებას ისე, რომ ხარჯთაღრიცხვაში ცვლილებები არ გახორციელებულა.
როგორც აუდიტის დასკვნაშია აღნიშნული, მივლინებების შედგენისას, ბრძანებები არასწორადაა შედგენილი, ხშირ შემთხვევაში არ არის დანომრილი, მივლინების ფორმები შევსებულია უხარისხოდ. და რიგ შემთხვევაში, გაანგარიშებაც არასწორადაა ნაწარმოები:
"დაუგეგმავად არის შეძენილი 2014 წლის 1 აგვისტოს 800 ლარის საჩუქარი, რაზედაც არ არის დაკავებული საშემოსავლო გადასახადი. ასევე, შესყიდვების გეგმის გარეშე აქვთ შეძენილი 231 ლარის მედლები, რომლებიც ვის ან როდის გადაეცა, არ არის დაფიქსირებული. 2014 წელს შედგენილია სესხის ხელშეკრულება, რომლის თანახმადაც საფეხბურთო სკოლამ ლანჩხუთის "გურიას" სესხის სახით გადასცა 2 000 ლარი. 2015 წელს კი სამი თვის დეკლარაცია საერთოდ არ არის ჩაბარებული, ხოლო დანარჩენ თვეებზე დადგენილი აქვთ ნულოვანი დარიცხვა.
ა(ა)იპ ლანჩხუთის "ბავშვთა საფეხბურთო სკოლაში" შემოწმებით გამოვლენილ ნაკლოვანებების გამო, სკოლის დირექტორს ს. წილოსანს გამოეცხადა სასტიკი საყვედური, მასვე დაევალა შესაბამისი ზომების მიღება სკოლის მთავარი ბუღალტრის, კ. დოლიძის მიმართ", _ ვკითხულობთ აუდიტის დასკვნაში.
აუდიტის სამსახურმა ა(ა)იპ "გოგონათა ექსპერიმენტალურ სარაგბო-საფეხბურთო სკოლაშიც გამოავლინა ნაკლოვანებები. კერძოდ, ხელშეკრულებების თანახმად, მძღოლები თავიანთი სატრანსპორტო საშუალებებით უწევენ მომსახურებას სკოლას, მაგრამ წარმოდგენილ საბუთებზე არ არის დაფიქსირებული გარბენილი კილომეტრაჟი; არ არის ბრძანებები დაწერილი, თუ რის საფუძველზე გახორციელდა ესა თუ ის მომსახურება. ასევე, ადგილი აქვს მივლინებისა და ტრანსპორტის თანხების დაგვიანებით ჩარიცხვას. ამავე დასკვნაში წერია, რომ სკოლის მიერ არ ხდება შეძენილი სპორტული ინვენტარის აღრიცხვა და არ არის დაფიქსირებული ვის ან როდის გადაეცა სკოლის მიერ შეძენილი წიგნები და თასები.
გარკვეული შენიშვნები შიდა აუდიტს ა(ა)იპ "საგარეო-ეკონომიკური კავშირურთიერთობების, ინვესტიციების, ტრანსპორტის, ტურიზმისა და მეწარმეობის განვითარების ცენტრთანაც" აქვს. შემოწმებამ დაადგინა, რომ აქ ადგილი აქვს ხელშეკრულების გაფორმებამდე კონკრეტულ მომსახურებაზე სასაქონლო ზედნადების წარმოდგენას. ასევე, ფიქსირება თანხების ავანსად ჩარიცხვა მიმწოდებლის მიერ შესაბამისი დოკუმენტაციის წარმოდგენამდე. დარღვეულია, ასევე, ხელშეკრულებით გათვალისწინებული ვადები, რაზეც არ არის გახორციელებული საჯარიმო სანქცია. ამავე დროს, საწვავის ჩამოწერისას სამგზავრო ფურცლებში არ არის აღნიშნული მგზავრობის მიზნობრიობა, გასვლისა და დანიშნულების ადგილი.
გარდა ა(ა)იპ-ებისა, აუდიტორული შემოწმება შპს "საფეხბურთო კლუბ გურია 2000"-შიც გახორციელდა. შესაბამის დასკვნაში წერია, რომ ამ ორგანიზაციაში სწორად არ იყო დაგეგმილი 2014 წლის ბიუჯეტი, სადაც ასახული 105 ათასი ლარი, წესით, მთელ წელზე უნდა გათვლილიყო, თუმცა, ნოემბერში თანხა სრულად იყო ათვისებული. ამავე დროს სახელფასო ფონდიდან თანხა გადატანილია ავეჯის შესაძენად, ლოჟის მოსაწყობად, ისე, რომ ხარჯთაღრიცხვაში ცვლილება არ გახორციელებულა.
აღნიშნულმა ორგანიზაციამ საფეხბურთო კლუბ "გურიას" სიტყვიერი შეთანხმების საფუძველზე ასესხა 3 000 ლარი. აქედან, 1 759 უკან დაუბრუნდა, დანარჩენი კი დღემდე დავალიანებად რჩება.
მიუხედავად ლანჩხუთის მუნიციპალიტეტის 2014 წლის ოთხი სექტემბრის #286 ბრძანებისა, სადაც საუბარია აღნიშნულ შპს-ზე რიცხული ქონების არასასოფლო სამეურნეო მიწისა და სხვადასხვა ქონების საწესდებო კაპიტალიდან ამოღებაზე და ა(ა)იპ საფეხბურთო კლუბ ლანჩხუთის "გურიასთვის" გადაცემაზე, აღნიშნული პროცესი არ არის დასრულებული, რადგან შესაბამისი დოკუმენტაცია საჯარო რეესტრში წარდგენილი არაა.
