რამდენიმე დღის წინ" გურია ნიუსმა" სოციალური ქსელით ასეთი სახის შეტყობინება მიიღო:
"2016 წლის 23 დეკემბერს, ურეკში, ავტოსაგზაო შემთხვევისას მამა _ სიმონ ბერძენიშვილი, დამეღუპა. გასულ წელს, ბინა გაგვიყიდეს აუქციონით. ახლა დედა, ჩემი ძმა და მისი მეუღლე დარჩნენ სახლის გარეშე. ჩემი რძალი ფეხმძიმედაა _ აპრილში ელოდებიან პატარას; ჩემ ძმას თავის ქალის ოპერაცია აქვს გაკეთებული და მისთვის ფიზიკური დატვირთვა არ შეიძლება, მაგრამ მაინც წვალობს, რომ ლუკმაპურის ფული მაინც შეიტანოს ოჯახში. ახლა, მამის გარდაცვალების შემდეგ, არანაირი საშუალება არ აქვთ, ის პატარა ფიცრული ერთოთახიანი სახლი, რომელშიც ცხოვრობენ, გადახურონ, რომ ავდარში თბილად მაინც იყვნენ. ქარის დროს ეშინიათ, რომ არ დაინგრეს ქოხი, სადაც ყველა მხრიდან წვიმა და ქარი შემოდის.
იქ ცხოვრობს დედა _ ხათუნა რობაქიძე, შვილი _ ლევან ბერძენიშვილი და რძალი _ მადონა ამყოლაძე. მე გათხოვილი ვარ. ძალიან გთხოვთ, იქნებ ხმა მიაწვდინოთ ვინმეს, ვინც ჩემი ოჯახის დახმარებას შეძლებს, რომ სახლის გადახურვაში მაინც დაგვეხმარონ, თორემ იქ ცხოვრება შეუძლებელია.
იმედია, პასუხს მაინც მოგვწერთ. ველოდებით თქვენს პასუხს.
სოფელი წვერმაღალა".
ამ წერილის მიღების შემდეგ, "გურია ნიუსმა" ოზურგეთის მუნიციპალიტეტის სოფელ წვერმაღალაში მცხოვრები ხათუნა რობაქიძის ოჯახი მოინახულა.
ხათუნა რობაქიძეს მეუღლე _ სიმონ ბერძენიშვილი 24 დეკემბერს, ურეკში მომხდარი გახმაურებული ავტოსაგზაო შემთხვევის დროს დაეღუპა. ოჯახი ერთ პატარა ქოხში ცხოვრობს. როგორც გარდაცვლილის მეუღლე ამბობს, მიცვალებული დეიდაშვილის სახლში ესვენათ, რომელიც, ასევე, იმავე დღეს, ავარიის შედეგად გარდაიცვალა.
ოჯახს არანაირი შემოსავალი არ გააჩნია, მისი არც ერთი წევრი არ მუშაობს, არ ჰყავთ პენსიონერი, რომ პენსიით მაინც ირჩინონ თავი, ცხოვრობენ პატარა ქოხში, სადაც თავზე აწვიმთ და მათივე თქმით, მღრღნელებითაა სავსე:
"ბანკიდან გვქონდა იპოთეკური სესხი გამოტანილი ოთხი წლის წინ. მეორე წელია, რაც გამიყიდეს სახლი. ჩემი მეუღლე ხელოსანი კაცი იყო, შეკვეთილში ივანიშვილებთან მუშაობდა. სანამ მუშაობდა, ვიხდიდით კეთილსინდისიერად სესხს. მერე გამოუშვეს იქედან, ვალი ვეღარ გადავიხადეთ და წაგვართვეს სახლი. იმ მადლიანმა, ვინც იყიდა ჩვენი სახლი, იქ გაგვაჩერა ორი თვე _ სანამ სადმე რამეს ნახავთ, აქ იყავითო. ამის შემდეგ ვართ ამ ფიცრულში. აქ იდგა მაღაზია და მისმა მეპატრონემ დაგვითმო _ ქუჩაში ხომ არ იქნებითო. მაღაზია გადავაკეთეთ ოთახად. მერე ვთხოვეთ მაღაზიის მეპატრონეს, ამ მიწას შევისყიდითო და ისიც დაგვთანხმდა. ამ პატარა, 300 კვადრატულ მიწაზე მხოლოდ საძირკვლის ჩაყრა შევძელით.
მე არ ვმუშაობ, ჩემს ბიჭს თავზე ოპერაცია აქვს გაკეთებული და ფიზიკურად უუნაროა, მეუღლე 24 დეკემბერს ურეკში ავარიით დამეღუპა. საშინელი ტრაგედია მოხდა _ 5 ადამიანი იმსხვერპლა მაშინ ავტოსაგზაო შემთხვევამ. 29 დეკემბერს დავასაფლავეთ ჩემი ქმარი და მისი დეიდაშვილი. ჩვენ მიცვალებულის დასასვენებელი ადგილიც არ გვქონდა. ახლა შვილიშვილს ველოდები და არ ვიცით, არ გვეშველება. წვიმაში და თოვლში წყალი ჩამოგვდის, მე ძველი მანქანის სალონიდან ამოღებულ ბალიშებზე მეძინა. ჩემი მეუღლე რომ იყო ცოცხალი, ადგილი არ გვქონდა დასაწოლი. ხელოსანი იყო და მისი ხელობით პურის ფულს კი ვშოულობდით.
ძალიან გვიჭირს, დაგვეხმარეთ. იქნებ, ვინმემ რაიმე თავშესაფარი მაინც მოგვცეს, ან რაიმე სახით დახმარება არაა ჩვენნაირებისთვის? ერთი ის იყო, რომ დაღუპულების დაკრძალვისთვის 250-250 ლარი გამოგვიყვეს. ყველამ კარგად იცის ჩვენი მდგომარეობა. არჩევნები რომ იყო, მოვიდნენ აქ ხალხთან შეხვედრაზე, დაგვპირდნენ, დაგეხმარებითო, მაგრამ დამთავრდა არჩევნები და არც არაფერი მოუკითხავს არავის. იქნებ დაგვეხმარონ _ აქ ცხოვრება შეუძლებელია, _ ამბობს ხათუნა რობაქიძე.
ოზურგეთის მუნიციპალიტეტის გამგებლის წარმომადგენელი ურეკში დავით რობაქიძე "გურია ნიუსთან" ამბობს, რომ აღნიშნულ ოჯახს დახმარების მიზნით ხელისუფლებისთვის არასოდეს მიუმართავს, ადგილობრივი მთავრობა კი ავარიით დაღუპულების ოჯახს ერთჯერადად დაეხმარა:
"არ ვიცი, მაგ ოჯახმა როგორ მოგაწოდათ ინფორმაცია. მათ თუ ბანკმა სახლი წაართვა, ჩვენ, მთავრობა, რა შუაში ვართ?! ვალები ჰქონდათ. ჩვენთან არ დაუწერიათ განცხადება დახმარების თაობაზე და რაც შესაძლებელი იყო, ის გავუკეთეთ", _ ამბობს დავით რობაქიძე.
