16 იანვარს, ჩოხატაურის ხელოვნების სასახლეში გაიმართა მომღერლისა და ჟურნალისტის, თემურ ჭკუასელის რიგით მეექვსე წიგნის _ „როცა სარკეები აღარ იღიმიან“ _ პრეზენტაცია.
თემურ ჭკუასელი გარკვეული პერიოდი დიასპორისა და კავკასიის საკითხთა კომიტეტის თავმჯდომარედ მუშაობდა და როგორც მან აღნიშნა, სწორედ ემიგრაციაში მყოფი ქართვლებისთვის დაიწერა ეს წიგნი. წიგნში შესულია, როგორც ძველი, ასევე, ახალი ნაწარმოებები.
„ეს წიგნები გავაგზავნე თითქმის ყველა ქვეყანაში, სადაც ქართველებისთვის საგანმანათლებლო კერები და საკვირაო სკოლებია გახსნილი, _ თქვა ბატონმა თემურმა და დარბაზში მყოფთ წიგნის გამოცემით გამოწვეულ სიხარულზე, ეჭვებსა და მოლოდინზე ესაუბრა:
„ყოველი ახალი წიგნი ეჭვით გაჟღენთილი მოლოდინია და რა არის ეს ეჭვი?! გაიკვლევს გზას მკითხველამდე ეს შენი წიგნი? საერთოდ, დარჩა კი მკითხველი, თუ უკვე გადაშენდნენ და თუკი დარჩა სად არიან, ვინ არიან ისინი?! თუ ილუზიად იქცა? ნუთუ, წიგნიც ილუზიაა უკვე და მკითხველიც, _ დასვა წიგნის ავტორმა კითხვები და მსმენელი თითონვე მიიყვანა თითოეული კითხვის პასუხამდე. „და მაინც მწერლობა ფრაზის სილამაზეა, ზუსტად ისე, როგორც სიმღერაში, მწერლობა აზრის ემოციური სამოსია, მწერლობა ტკივილიანი ფიქრია, მწერლობა მისტიკაა, მწერლობა სიტყვათმჭედლობით სულიერების ძერწვაა, დამშრალი ჭიდან წყლის ამოღებაა და ბოლოს, მწერლობა საკუთარი თავისთვის გაწეული ქველმოქმედებაა და ყველაფერი ერთად კი თვალით უხილავი კალაპოტია, სადაც მწერლობის გვირგვინი _ ცნობიერების ნაკადი მოედინება“, _ აღნიშნა მწერალმა და მკითხველს მიანდო, განესაჯა, როგორ შეძლო თავის მეექვსე წიგნში ამ ყველაფრის თავმოყრა.
წიგნის პრეზენტაციის შემდეგ გაიმართა ნანა ჯანელიძის ფილმის, "გალობის რაინდების" ჩვენება, რომლის სცენარიც თემურ ჭკუასელს ეკუთვნის. ფილმის გადაღების იდეა, როგორც ჭკუასელმა აღნიშნა, მას შემდეგ გაუჩნდა, რაც „ხმა ბუნებისა“ და "ხმა ღვთისას“ შესახებ წაიკითხა.
„ქართველები ძალიან ბრძენი ხალხი ვართ. ერთხელ, სადღაც ამივიკითხე, რომ ხალხურ სიმღერას ხმა ბუნებისა ეწოდება, საგალობლებს კი _ ხმა ღვთისა. სწორედ, მაშინ გამიჩნდა იდეა გადაგვეღო ფილმი. რისი გახორციელებაც ნაწილობრივ შევძელით _ გადავიღეთ ფილმის მეორე ნაწილი _ ხმა ღვთისა.
პრეზენტაციას ესწრებოდნენ გურიის გუბერნიისა და ჩოხატაურის მუნიციპალიტეტის ხელმძღვანელი პირები, სხვადასხვა სამსახურების თანამშრომლები, მასწავლებლები და თემურ ჭკუასელის შემოქმედების თაყვანისმცემელი ადამიანები.
თემურ ჭკუასელმა წიგნის _ „როცა სარკეები აღარ იღიმიან“ _ 70 ეგზემპლარი მუნიციპალიტეტის გამგეობას გადასცა, სადაც დაინტერესებულ ადამიანებს შეუძლიათ მისი შეძენა, შემოსული თანხა კი, მწერლის თხოვნით, მუნიციპალიტეტში მცხოვრებ ყველაზე შეჭირვებულ ადამიანს გადაეცემა.
