ჩემს მონსტერას, რომელსაც ხუთი წელია, სასოებით ვუვლი, ბოლო დროს ფოთლები დაუავადდა, რაც იმაში გამოიხატება, რომ ფოთლის კიდეები გამხმარი აქვს, მოშავო და ყავისფერი ლაქებით დაფარული. ასევე აქვს, დაახლოებით, დიდი ღილის ოდენა დაზიანებული ადგილები. გიგზავნით დაავადებული მცენარის ფოთლების ფოტოს. იქნებ, მირჩიოთ, რა მოვუხერხო?
პატივისცემით,ცირა გოგოტიშვილი, ოზურგეთი
მონსტერა ტროპიკული მცენარეა. მას წვიმა და სინესტე უყვარს. ამასთანავე, სითბოს მოყვარულია. სურათიდან რაც ჩანს, მცენარეს აშკარად ეტყობა, მშრალი ჰაერის გამო, დისკომფორტი შეექმნა. როცა ზამთარში ოთახის ტემპერატურის პირობებში ვამყოფებთ, მშრალი ჰაერი მცენარეზე დადებითად არ მოქმედებს. ამიტომ, ფოთლები ხშირად უნდა გავწმინდოთ სველი ღრუბელით, შემდეგ ჩვარით და დავნამოთ.
კვირაში ორჯერ დანამვა სავსებით საკმარისია, რომ თქვენი მონსტერა სრულფასოვანი ფოთლებით შეხვდეს გაზაფხულს. როცა მას ღია სივრცეში გაიტანთ, ეზოში მოათავსეთ ჩრდილქვეშ. არც ოთახის და არც საკარმიდამო პირობებში (როცა წვიმა არ არის) არ დაგავიწყდეთ მორწყვა, კვირაში ერთხელ მაინც.
გირჩევთ, დაზიანებული ადგილები ფოთლებს ფრთხილად შემოაჭრათ მაკრატლით ისე, რომ სიმწვანეს არ შეეხოთ.
ზოგადად ოთახის მცენარეებს, განსაკუთრებით ისეთს, რომელიც ტროპიკული წარმოშობისაა, გამოზამთრება სწორედ იმიტომ უჭირთ, რომ მიუხედავად თბილი გარემო პირობებისა, ოთახის მშრალი ჰაერი მათ დისკომფორტს უქმნის. ამიტომ, არ დაგავიწყდეთ დანამვა! გაითვალისწინეთ ფოთლების უკანა მხარეების როგორც მტვრისგან გაწმენდა, ისე დანამვაც.
ზურაბ ბაუჟაძე, ჟურნალისტი, ყვავილოვან მცენარეთა მოყვარული მებაღე
