7 მარტს, ჟურნალისტთა ქსელი გენდერული თანასწორობისათვის და ოზურგეთის გენდერის მედიაცენტრის ორგანიზატორობით და ინიციატვიით, ქალაქ ოზურგეთში პროფესიული კოლეჯის სტუდენტების საინფორმაციო შეხვედრა გაიმართა.
შეხვედრაზე 8 მარტის მნიშვნელობასა და ქალთა უფლებების შესახებ სახალხო დამცველის წარმომადგენელმა გურიაში ანა გახოკიძემ და არასამთავრობო ორგანიზაციის “ქალები რეგიონის განვითარებისთვის“ თავმჯდომარემ ქეთევან ხიდაშელმა ისაუბრეს.
ქეთევან ხიდაშელმა საუბარი სტუდენტებთან 8 მარტის ისტორიით დაიწყო.
“8 მარტი ქალთა ეკონომიკური, პოლიტიკური დასოციალური მიღწევების აღნიშვნის დღეა. 1853 წლის 8 მარტს საფეიქრო ქარხანის მუშაქალები გაიფიცნენ, საშინელი სამუშაო პირობებისა და დაბალი ხელფასის გამო. მათი მოთხოვნა სამუშაო პირობების გაუმჯობესება იყო, ისინი პოლიციამ დაარბია. სწორედ ამ ქალებმა დააარსეს პირველი პროფკავშირი. შემდეგ კი, 1909 წლის 28 თებერვილს, იმავე ქარხანას ხანძარი გაუჩნდა, რასაც 140 ქალი ემსხვერპლა.
1910 წელს ქალაქ კოპენჰაგენში ჩატარდა ქალთა საერთაშორისო კონფერენცია, ამ კონფერენციაზე კლარა ცეტკინმა 8 მარტი ქალთა საერთაშორისო დღედ გამოაცხადა.1913 წლის 8 მარტს ქალებმა მოაწყეს მშვიდობიანი მსვლელობა და სწორედ ქალთა გამოსვლები დაედო საფუძვლად 1917 წლის რევოლუციას.
მოგვიანებით 8 მარტი ქალთა დღედ საბჭოთა კავშირშიც აღიარეს. 1975 წელს გაერომაც აღიარა 8 მარტი ქალთა დღედ, 2005 წელს ბრიტანეთის პროფკავშირების გაერთიანებულ კონგრესზე მხარი დაუჭირეს ქალთა საერთაშორისო დრედ 8 მარტის გამოცხადებას.
მიუხეედავად იმისა, რომ ქვეყანამ 25 წელია აღიდგინა დამოუკიდებლობა, ქალთა პოლიტიკური მონაწილეობის, ქალთა უფლებების, ოჯახში ძალადობის კუთხით დიდი არაფერი მიღწევები გვაქვს, ქალთა უფლებები კვლავ ირღვევა“, _ თქვა ქეთევან ხიდაშელმა.
ანა გახოკიძის თქმით, საქართველოში ქალთა უფლებრივი მდგომარეობის დაცვა და გენდერული თანასწორობის მიღწევა კვლავ გამოწვევას წარმოადგენს. განსაკუთრებით შემაშფოთებელია ქალის მიმართ ძალადობა და ოჯახში ძალადობა, რომელიც პრობლემის მასშტაბებისა და სიმძაფრის გათვალისწინებით უფრო მეტ ძალისხმევას საჭიროებს.
“საქართველოში, ერთი მხრივ, პრობლემას წარმოადგენს საზოგადოებაში არსებული სტერეოტიპული დამოკიდებულება, ხოლო, მეორე მხრივ, შესაბამისი უწყებების მხრიდან ეფექტური ჩართულობა და რეაგირება. ხშირად ისმის არგუმენტი, რომ რთულია ოჯახში ძალადობის გამოაშკარავება, რადგან იგი ჩაკეტილ სოციალურ წრეში ხდება. თუმცა, ქალთა მიმართ ძალადობა დიდი ხანია, გასცდა ჩაკეტილ სივრცეს. თითქმის, ყოველდღიურად ვიგებთ ამ ფაქტების შესახებ და ეს გვეხება ყველას. საზოგადოების გულგრილ დამოკიდებულებასთან ერთად, მთავარ გამოწვევას დაცვისა და დახმარების ღონისძიებების არაეფექტური გამოყენება წარმოადგენს. ხშირად, ძალადობის მსხვერპლ ქალთა დასაცავად არ ხდება იმ მექანიზმების გამოყენება, რომელიც კანონით არის გათვალისწინებული და შესაბამისად, მათი თხოვნა დახმარების თაობაზე სათანადოდ არ სრულდება”, _ თქვა შეხვედრაზე ანა გახოკიძემ.
