ოზურგეთის მუნიციპალიტეტის სოფელ შემოქმედში მცხოვრები, 71 წლის შორენა სიმონიშვილი მარტოხელაა. მხოლოდ და ჰყავს, რომელიც თბილისში ცხოვრობს და ხანდახან ის თუ ჩამოაკითხავს.
ქალბატონმა შორენამ ატირებულმა დაგვირეკა და გვთხოვა, სახლში ვწვეოდით.
როგორც ჩვენმა რესპონდენტმა გვითხრა, საკუთარ საკარმიდამოში “ენერგო-პრო ჯორჯიას” ოზურგეთის სერვისცენტრის თანამშრომლებმა, დაუკითხავად მოუჭრეს უზარმაზარი წაბლის ხე, მერე კი საუკეთესო ჯიშის ბლის ხეები და მურყანიც მიაყოლეს. მისი თქმით, ამის მიზეზი მისავე საკარმიდამოში გამავალი ელექტროგადამცემი ხაზებია, რომელიც არ უნდა დაზიანდეს.
_ ვტირი და კიდევ ვიტირებ, რადგან ელექტროგადამცემი ხაზების გამო, რომელიც ჩემს კუთვნილ საკარმიდამოში გადის, უზარმაზარი წაბლის ხე ისე მომიჭრეს, შინ არც ვიყავი. მივედი და მიცვალებულივით დავიტირე.
მერე მოვიდნენ და ასწლოვან ხეებთან ერთად, ოთხი ძირი საუკეთესო ჯიშის ბლის ხე მომიჭრეს. თბილისიდან არის ბრძანება და უნდა დაგვეთანხმოო, _ მითხრეს. რა ვქნა? ამჯერად დავეთანხმე, ისე დამადგნენ თავზე, მაგრამ არც კომპენსაცია არსებობს, არც ცოდვა-მადლი, რომ მარტოხელა მოხუცს იმაში მაინც დამეხმარონ, რომ ეს საშეშე მასალა დავამუშავო? ეს ხეები ისეთი ქარსაფარი იყო, უკეთესს ვერ ინატრებდი.
ზედ მდინარე ბჟუჟის ნაპირას ვცხოვრობ და ქარი რომ ამოვარდება, მტრისას. ამ ბალს და ხურმას ვყიდდი და ლუკმის ფულს ვშოულობდი. ხან ვიღაცას ვაკრეფინებდი, ხანაც ჩემით ვწვალობდი. აბა, ჩემი პენსია როგორ ვიკმარო? წამალზე წინ პურს ვერ ვიყიდი.
ეკოლოგიური კატასტროფა ადამიანებმა მომიწყვეს საკუთარ ეზოში. მთლად უარესი რაც მიქნეს, საკარმიდამოს უკან ჩამომავალი მდინარე ბჟუჟის კალაპოტის შეცვლა იყო _ გადმოაგდეს აქეთ, გაყვეს კალაპოტი. ადიდდა ეს მთის მდინარე და სულ წალეკა ყველაფერი. მერე კი მაინც თავის კალაპოტს დაუბრუნდა. მთლიანად წაიღო ჩემი ბამბუკის ტყე, მიწიანად…
ამ ამბავსაც თავი დავანებე, მაგრამ ეს ეზოში შემოვარდნა და ნაყოფიერი ხეების ასე უმოწყალოდ გაჩეხვა რა იყო?! გული როგორ არ გამისკდა, მიკვირს, _ გვეუბნება შორენა სიმონიშვილი.
როგორც შორენა სიმონიშვილი ამბობს, ძველისძველი, კრამიტით დახურული სახლის გარდა, მისი სიმდიდრე 800 კვ.მ. მიწის ფართობია, რომელზეც ქარსაფრად წინაპრების მიერ გაშენებული მურყანის ხეები და ეს ხეხილოვნები გააჩნდა, რომელთა საუკეთესო ნაწილი უმოწყალოდ გაუჩეხეს.
_ მეტი მე რა გამაჩნდა? გამაგებინეთ, ამის უფლება ვის აქვთ? გასხლან ისე, რომ ელექტროხაზებს არ დაედოს. რატომ გამიჩანაგეს ამხელა ხეები _ დამიბრიყვეს? ვინ დაწერა ეს კანონი, სადაა მთავრობა, ვინ იძლევა თბილისიდან ასეთ ბრძანებებს?! ცოცხალი დამბა და ცოცხალი ქარსაფარი მქონდა, როგორ გამიპარტახეს?! _ ტირილით ამბობს ხანდაზმული ქალბატონი.
სახლი, რომელშიც ქალბატონი შორენა ცხოვრობს, ძველისძველია, კრამიტით დახურული. ამბობს, რომ წყალიც ჩამოდის და საცხოვრებლადაც არაა სახარბიელო.
რაც შეეხება სოციალურ დახმარებას, ქალბატონი შორენა ამბობს, რომ იგი 2006 წელს მოუხსნეს და მას შემდეგ სოციალურ სააგენტოსთვის განცხადებით შეგნებულად არ მიუმართავს, რადგან მათი ობიექტურობის არ სჯერა:
_ ხურმა და ბალი გავყიდე. ფული მოვაგროვე და ელექტროღუმელი ვიყიდე პური რომ გამომეცხო. ეს იყო 12 წლის წინ. სოციალური აგენტი რომ მოვიდა, ეს ღუმელი დაინახა და აი, რა გქონია, რა გიჭირსო, მითხრა უკმეხად და წაბრძანდა.
ადვოკატი კახა ჩავლეშვილი განმარტავს, რომ არსებობს შეზღუდვები, რომელთაგან ზოგი ისეთია, კაცს შეიძლება, გაეცინოს:
_ გააჩნია, რა სიმძლავრის დენი გადის სადენებში. არ შეიძლება, ასე უდიერად მოპყრობა, მაგრამ არსებობს დადგენილება, რომელიც უფლებას აძლევს შესაბამის სამსახურს, გარკვეული წესებით იმოქმედონ. უკეთეს შემთხვევაში, დაზარალებულს შეუძლია, მოგვმართოს, _ გვითხრა მან.
“გურია ნიუსი” “ენერგო-პრო ჯორჯიას” ოზურგეთის სერვისცენტრის მენეჯერს გია ნაკაიძეს დაუკავშირდა:
_ ასეთ სამუშაოებს აწარმოებს კონტრაქტორი ორგანიზაცია, რომელთანაც სათაო ოფისი დებს ხელშეკრულებას და მე, პირადად, ამ კონკრეტული ფაქტის შესახებ არაფერი ვიცი. არსებობს დადგენილება შეზღუდვების შესახებ, რომელიც იმ ტერიტორიებს ეხება, სადაც ელექტროხაზების გადის. დეკემბერში ასეთი სამუშაოები სოფლებში _ მაკვანეთსა და შემოქმედში ჩატარდა. ამის შესახებ მუნიციპალიტეტის გამგეობამაც იცის. სიმონიშვილის კარმიდამოში გაჩეხილი ხეების შესახებ ინფორმაცია არ მაქვს, არც არავის მოუმართავს. სასურველია, ქალბატონმა მოგვმართოს განცხადებით, რომელსაც გადავაგზავნით სათაო ოფისში და ვნახოთ, რა პასუხს მივიღებთ, _ გვითხრა ნაკაიძემ.
