ჯანმრთელობის დაცვისა და სოციალურ საკითხთა კომიტეტმა გრძელვადიანი სტრატეგიული მიმართულებების განსაზღვრასა და და კომიტეტის 2017-2020 წლების სამოქმედო გეგმის შემუშავების შესახებ იმსჯელა სამუშაო შეხვედრაზე.
შეხვედრის მონაწილეებს ჯანმრთელობის დაცვისა და სოციალურ საკითხთა კომიტეტის თავმჯდომარემ, აკაკი ზოიძემ მიმართა.
„ჩვენ უნდა ჩამოვყალიბდეთ გრძელვადიან ხედვაზე – სოციალური დაცვის, ჯანდაცვის, შრომითი ურთიერთობების როგორი მოდელი გვინდა გვქონდეს 2030 წლისათვის.
საუბარია ძირითად მახასიათებლებსა და ამოცანებზე, მიზნებზე, რომელიც ამ სისტემას უნდა ჰქონდეს. უნდა გავარკვიოთ ორიენტირები, საით მივდივართ და ამ შეჯერებულ ხედვაზე ჩამოვაყალიბოთ კომიტეტის ოთხწლიანი სამოქმედო გეგმაც“, – განაცხადა აკაკი ზოიძემ.
მისი თქმით, კომიტეტის სამოქმედო გეგმაში შევა როგორც სტრატეგიული ამოცანების განსახორციელებლად საჭირო საკანონმდებლო ინიციატივები, ასევე საპარლამენტო ზედამხედველობა და ყველა ის აქტივობა, რომელიც ევროინტეგრაციასთან, კომიტეტის საკურაციო სფეროში აღებულ ვალდებულებებთან და სხვა საკითხებთანაა დაკავშირებული.
როგორც კომიტეტის თავმჯდომარემ განაცხადა, პროცესში ჩართული უნდა იყოს დაინტერესებული მხარეების ფართო წრე, რომელიც პარლამენტის წევრებს, არასაპარლამენტო ოპოზიციას, ექსპერტებს, ასოციაციებს, ჯანმრთელობისა და სოციალური დაცვის, ასევე, შრომითი ურთიერთობების თემაზე მომუშავე არასამთავრობო ორგანიზაციებს მოიცავს.
„გვსურს, უზრუნველვყოთ ყველას ჩართულობა, ვინაიდან მიგვაჩნია, რომ ისეთ მნიშვნელოვანი თემა, როგორიც არის გრძელვადიანი პოლიტიკის განსაზღვრა ჯანმრთელობის, სოციალურ დაცვის სფეროში გახლავთ ზეპარტიული კონსესუსის თემა და საგანი. მიუხედავად პოლიტიკური ამინდისა, ყველა შემთხვევაში, რაც უნდა მოხდეს შემდგომი ოთხი, რვა წლის განმავლობაში, ეს კურსი არ უნდა შეიცვალოს და მიღწეულის უარყოფა პოლიტიკური კონიუქტურის ცვლილების გამო არ უნდა მოხდეს. უნდა ჩამოვაყალიბოთ საკმაოდ მკაფიო ხედვა იმისა, თუ საით მივდივართ“, – განაცხადა აკაკი ზოიძემ.
კომიტეტის თავმჯდომარის ინფორმაციით, პროცესი ევროკავშირი საქართველოსთვის და UNDP-ის მხარდაჭერითა და თანადგომით ხორციელდება. საერთაშორისო ორგანიზაცია კომიტეტთან წინა მოწვევის პარლამენტშიც თანამშრომლობდა, როდესაც კომიტეტმა 2015-2016 წლების სამოქმედო გეგმა შეიმუშავა. აკაკი ზოიძემ იმედი გამოთქვა, რომ თანამშრომლობა კიდევ უფრო გაღრმავდება და შესაბამის შედეგს გამოიღებს.
კომიტეტის თავმჯდომარემ შეკრებილებს ექსპერტები: ნათია ფარცხალაძე და აკაკი ლოჩოშვილი წარუდგინა, რომლებიც ჯანმთელობის, სოციალური დაცვისა და შრომითი ურთიერთობის თაობაზე გრძელვადიანი სტრატეგიული მიმართულების განსაზღვრასა და კომიტეტის 2017-2020 წლების სამოქმედო გეგმის შემუშავების პროცესს წარმართავენ. ექსპერტთა განცხადებით, გრძელვადიანი პრიორიტეტების განსაზღვრა და ამის საფუძველზე რეალისტური სამოქმედო გეგმის შედგენა მნიშვნელოვანია და სასურველია, ამ პროცესში ყველა დაინტერესებული მხარე მაქსიმალურად ჩაერთოს.
შეხვედრაზე სამუშაო პროცესის შემდგომი წარმართვის თაობაზეც იმსჯელეს. კომიტეტის თავმჯდომარის განცხადებით, პროცესი, სავარაუდოდ, ორ თვეში დასრულდება. ამის შემდეგ სამოქმედო დოკუმენტებს ფართო განხილვაზე გამოიტანენ.
