ლანჩხუთში, ბესიკის ქუჩის მცხოვრებლები თვლიან, რომ სარეაბილიტაციო სამუშაოები, რომელიც მათ ქუჩაზე გასულ წელს შპს “სამკუთხედმა” განახორციელა, უხარისხოდაა შესრულებული და შესაბამისი უწყებებისგან ყურადღებას ითხოვენ. აქაურებმა ხელმოწერებიც შეაგროვეს, სადაც განცხადებით მიმართეს, როგორც პრესას, ასევე, მუნიციპალიტეტის ხელმძღვანელობასაც, საქმის კურსში ჩააყენეს ლანჩხუთი-ჩოხატაურის მაჟორიტარი დეპუტატი ნინო წილოსანი.
კოლექტიურ განცხადებაში, რომელსაც ხელს 26 ადამიანი აწერს, ვკითხულობთ: “არსებული მდგომარეობიდან გამომდინარე, ვითხოვთ, გასაჯაროვდეს ამ ქუჩის სარემონტო სამუშაოს შესრულების პროექტი, სამუშაოს შესრულებისა და მიღება-ჩაბარების აქტები, თუკი ასეთი არსებობს, სადაც იქნება დამოწმებული ამ სამარცხვინოდ შესრულებული გზის ვარგისიანობა და ხარისხი.
კატეგორიულად ვითხოვთ ჯეროვან ყურადღებას, საკითხის საფუძვლიან შესწავლას ადგილზე დათვალიერებით, საქმეში დარგის სპეციალისტების ჩართვას, წინააღმდეგ შემთხვევაში, უფლებას ვიტოვებთ, მივმართოთ ცხელ ხაზს და ზემდგომ ორგანოს საქმიანი დახმარებისთვის”.
განცხადების ერთ-ერთი ადრესატი “გურია ნიუსიც” იყო. ადგილზე მისულებს ადგილობრივებმა ის სამუშაოები დაგვათვალიერებინეს, რომელიც, მათი თქმით, უხარისხოდაა შესრულებული. ადგილზე იმყოფებოდნენ მუნიციპალიტეტის გამგებლის მოადგილე ნუგზარ ცინცაძე, გამგეობის ინფრასტრუქტურის სამსახურის უფროსი ლევან ჩხაიძე და ქალაქში გამგებლის წარმომადგენელი ლადო ნანაძე, რომლებიც უშუალოდ მოსახლეობისგან ისმენდნენ, თუ რა პრეტენზიები ჰქონდათ მათ შესრულებულ სამუშაოებთან დაკავშირებით:
“წვიმის დროს ტბა დგას ირგვლივ, ტალახში ვიხრჩობით. ქუჩის ბოლოში წყალს ნორმალური გასასვლელი არ აქვს. დაგვპირდნენ, სანიაღვრე არხი რომ გაკეთდებოდა, მერე გზას გრეიდერით გაასწორებდნენ. დაახლოებით, ექვსი თვეა გასული, მაგრამ დღემდე არავინ მოსულა. ამოიღეს უზარმაზარი ლოდები აქვე ღელიდან და დაყარეს.
ბავშვები სად წავიყვანოთ ან დარში ან ავდარში, ლოდები და ტალახი რომაა ყველგან? ნორმალური ხრეში რომ დაეყარათ, არაფერს ვიტყოდით, ეს ლოდები რა უბედურებაა?! გვეუბნებიან, პროექტში ასე არ იყოო. რა იყო საერთოდ პროექტში?! ქუჩის სანიაღვრეებთან ეზოს სანიაღვრეების შეერთება ჩვენი საქმე არ არისო. გაგვაგებინონ, საერთოდ რა იყო მათი საქმე და რა უნდა გაეკეთებინათ?!
ქვებითაა ხიდი გამოტენილი და წყალი ეზოში შემოდის, ყარს აქაურობა. ტყუილად ხარჯავს სახელმწიფო ამხელა ფულს. სამუშაოები რომ დასრულდა, ხომ უნდა მოსულიყვნენ და ადგილზე ენახათ, რა და როგორ გაკეთდა?! არავინ მოსულა და არავის შეუმოწმებია. თავად გამოკეტილები არიან კაბინეტებში და იმის იქეთ არ იხედებიან,” _ ცხარობდნენ ხელისუფლების წარმომადგენლებთან საუბრისას ქუჩის მცხოვრებლები.
მოსახლეობის თქმით, სპეციალური ბეტონის ფილები, რომლითაც სანიაღვრე არხები და მილხიდები გაკეთდა, უხარისხო იყო:
“კალანდაძემ, სამუშაოებს ვინც ხელმძღვანელობდა, გვითხრა, ბეტონი ორი დღის მოჭრილი იყო და ზედ რაიმე სიმძიმე არ გაგვეტარებინა. ერთი თვის განმავლობაში ეზოში მანქანები ვერ შეგვყავდა. თუ ასე იყო, 25 დღის მერე დაეგოთ! უხარისხო იყო და ამიტომაც ქუჩის ბოლოში, სადაც ახლა წყალს არ გადის, მალევე ჩაინგრა. რამდენიმე დღის წინ, კოკისპირულ წვიმაში გამოცვალეს. ეტყობა, გაიგეს საჩივარს რომ ვწერდით და ხელმოწერებს ვაგროვებდით. აბა, მანამდე არავის მოუქცევია ყურადღება. თუმცა, ისე გააკეთეს, ახლა წყალი ვეღარ გადის, ქვებითაა ამოვსებული იქაურობა”, _ ამბობდნენ ბესიკის ქუჩის მობინადრეები.
გამგეობის ინფრასტრუქტურის სამსახურის უფროსის ლევან ჩხაიძის თქმით, გაკეთდა ის, რის გაკეთებაც პირველ ეტაპზე შეიძლებოდა:
“ხომ გაკეთდა რაღაც? ამის შემდეგი ეტაპია ასფალტის დაგება, ამის გარეშე ვერ დაიგება. ყველაფერი ერთად არ გაკეთდება. გაკეთდა ის, რაც პროექტით იყო გათვალისწინებული, მეტის შესაძლებლობა არ იყო. გზის მოხრეშვას საერთოდ არ ითვალისწინებდა პროექტი, უბრალოდ, ჩვენ ვთხოვეთ სამუშაოების შემსრულებლებს, რომ იქ, სადაც წყლის დიდი გუბეები იყო, ხრეშით ამოევსოთ. ასე რომ არ ექნათ, გზაზე ყველგან წყალი დადგებოდა,” _ უხსნიდა მოსახლეობას ლევან ჩხაიძე.
მოსახლეობის მხრიდან გამოთქმულ პრეტენზიებთან დაკავშირებით გამგეობამ მცირე კომენტარი გააკეთა:
“პროექტით გათვალისწინებული სამუშაოები ჩატარებულია. არსებობს ექსპერტიზის შესაბამისი დასკვნა. დაგეგმილი და გათვალისწინებულია გზის საფარის მოწყობა”, _ ნათქვამია გამგეობის მიერ გაკეთებულ განცხადებაში.
გარდა გზის პრობლემისა, ადგილზე მისულ ჩინოვნიკებს ქუჩის მცხოვრებლებმა დამატებით ნაგვის ურნის დადგმაც სთხოვეს და იქვე ქუჩის ბოლოში ღელისპირის ნაგვის ნარჩენებისგან გაწმენდაც:
“სამი ქუჩის გზასაყარზე ერთი ნაგვის ურნა დგას. კარგი იქნება, თუ დაამატებენ ურნებს, თორემ სად წავიღოთ ნაგავი, აღარ ვიცით. აქეთ ქუჩის ბოლოში რომ ღელეა, დაუდგენელმა პირებმა სამშენებლო ნარჩენებით გაავსეს. მანქანებით ეზიდებიან ნაგავს და ჩვენ გვიყრიან. თუ ვინმემ სახლში რემონტი გააკეთა, ყველას აქ მოაქვს, რამეს რომ ვეტყვით, აქეთ გვაყენებენ შეურაცხყოფას. არადა, ქუჩის ბავშვები სულ აქ თამაშობენ.
გასულ აღდგომას დაგვპირდა გამგეობის ზედამხედველობის სამსახურის წარმომადგენელი, რომ მოასუფთავებდნენ აქაურობას, მაგრამ, აგერ, მეორე აღდგომა მოდის და არაფერი გაკეთებულა, პირიქით, ყოველდღე ემატება ნაგავი “, _ შესჩივლეს გამგებლის მოადგილეს ადგილობრივებმა და შესაბამისი ღონისძიებების გატარება სთხოვეს, რაზეც ხელისუფლების წარმომადგენლებისგან დახმარების გაწევის პირობა მიიღეს.
