CRRC-ის და “პარტნიორობა საგზაო უსაფრთხოებისთვის” კვლევის შედეგებით, საქალაქთაშორისო მიკროავტობუსების მძღოლების 96% სახიფათო მანევრს ახორციელებს, 79 % ღერძულა ხაზს კვეთს, 65 % მობილურზე საუბრობს, 38 % სიგარეტს ეწევა, 32 % ღვედს არ იყენებს, ერთ რეისზე სახიფათო მართვის 13-დან 62-მდე შემთხვევაა, _ ამის შესახებ კავკასიის კვლევითი რესურსების ცენტრის (CRRC) მკვლევარმა გიორგი ბაბუნაშვილმა საქართველოს საქალაქთაშორისო მიმოსვლის შესახებ კვლევის პრეზენტაციისას განაცხადა.
კვლევის ავტორი ეკონომიკის სამინისტროს, შინაგან საქმეთა სამინისტროს და საქართველოს პარლამენტს საქალაქთაშორისო ტრანსპორტის მოსაწესრიგებლად კანონმდებლობის დახვეწის რეკომენდაციით მიმართავს.
„საქალაქთაშორისო მგზავრების გადაყვანისას მძღოლები სულ მინიმუმ ერთხელ მაინც არღვევენ მოძრაობის წესებს. ასევე, მიკროავტობუსებში ინფრასტრუქტურული პრობლემებიც არსებობს, მათ შორის მიკროავტობუსებში ხშირად ვხვდებით ე.წ. ჩადგმულ სკამებს, რომელზე მსხდომი მგზავრებიც განსაკუთრებული რისკის ქვეშ იმყოფებიან. განსაკუთრებით მოკლე მანძილებზე ხშირია ფეხზე მდგომი მგზავრები და ე.წ. ჩადგმული სკამები, შორ დისტანციებზე – თბილისი-ბათუმი, თბილისი- ზუგდიდი, თბილისი-ქუთაისის მიმართულებით კი ამ მხრივ შედარებით ნორმალური მდგომარეობაა.
დავაკვირდით თბილისიდან გამავალ და თბილისში შემომავალ მიკროავტობუსებს ყველა რეგიონის მიმართულებით. ავტოსადგურების განლაგება ასევე, ცაკლე პრობლემას წარმოადგენს. მათი მდებარეობა ხელს უწყობს თბილისის გადატვირთულობას და ქმნის დამატებით საფრთხეებს უსაფრთხოების მხრივ.
თბილისში დაახლოებით 23 ავტოსადგურია და მათგან მხოლოდ რამდენიმეზეა სათანადო აღჭურვილობა. სადგურების უდიდესი უმრალესობა არ გააჩნია მოსაცდელი დარბაზები და სამედიცინო აღჭურვილობა.
გამოწვევა მდგომარეობს იმაში, რომ კანონმდებლობა არ განსაზღვრავს იმ სავალდებულო მინიმალურ სტანდარტებს, რასაც უნდა აკმაყოფილებდეს ავტოსადგური. ჩვენი რეკომენდაციაა, ავტოსადგურები განთავსებული იყოს დედაქალაქის გასასვლელებში დასავლეთის და აღმოსავლეთის მიმართულებით“, – აცხადებს გიორგი ბაბუნაშვილი.
