ის, რომ SU-25-ის გაყიდვის გადაწყვეტილება მივიღეთ, ეს არის განპირობებული მთელი რიგი პრიორიტეტული სხვა ტიპის მიმართულებების უზრუნველყოფით, რამაც სწორედ ავიაცია და ჩვენი საჰაერო თავდაცვა უნდა გააძილეროს, _ ამის შესახებ საქართველოს თავდაცვის მინისტრმა ლევან იზორიამ თავდაცვის და უშიშროების კომიტეტის სხდომაზე განაცხადა, სადაც დეპუტატები მინისტრის ანგარიშს უსმენენ.
„ლოგიკურად გავყვეთ რეალობას. ციფრებზე და კონკრეტულ რაოდენობებზე საუბრისგან თავს შევიკავებ რადგან საჯაროდ გამოვდივარ, მაგრამ გეტყვით რატომ ვიღებთ გადაწყვეტილებას SU-25-ის გაყიდვასთან დაკავშირებით. 1. იმიტომ, რომ ეს არის ძველი წარმოების. 2. მას სჭირდება 7-8 წელიწადში სარემონტო სამუშაოები, სათადარიგო ნაწილები კი არის რუსული წარმოების…
რაც შეეხება ალტერნატივას, სწორედ გაყიდული თანხა მოხმარდება იმის უზრუნველყოფას, რომელიც უფრო ძლიერს, მოქნილს და ადეკვატურს გახდის საფრთხესთან ბრძოლას. კერძოდ, ჩვენ გვინდა შევიძინოთ ვეტმფრენები, რადგან ჩვენი გეოგრაფიული მდგომარეობიდან გამომდინარე ვეტმფრენებს მეტი მანევრირების საშუალება აქვს, მეტად დაცულია რადარებისგან. მას შეუძლია მიწისგან 3 მეტრის მოშორებით ფრენაც. ანუ უფრო მობილურია, უფრო მოქნილია, მათ შორის იერიშისთვის უფრო ხელსაყრელი და რამის პირობებში ლავირების შესაძლებლობის მქონე, რაც ვთქვი იმ ტექნიკას არ გააჩნია. ასევე ვაპირებთ უპილოტო აფრენი აპარატების შეძენას. იცით რომ მთელი მსოფლიო აქცენტს სწორედ ამ აპარატებზე აკეთებს, რადგან ყველანაირ ასპექტში ეს აპარატები არის უფრო ეკონომიური და გამართლებული ქვეყნის უსაფრთხოების ინტერესებიდან გამომდინარე. და იმ ინტერესებიდან გამომდინარე, რომ ნაკლები დანაკარგით მიაღწიო ოპტიმაურ შედეგს.
მაგრამ როცა ავიაციაზე და საჰაერო თავდაცვაზე ვსაუბრობ, არცერთ დანაყოფს, არ ექნება შანსი, თუ დაცული არ ხართ ანტისაჰაერო სისტემით. ომმა ეს გვიჩვენა. შეიძლება აეროდრომი დაგვიბომბონ და 100 ტექნიკაც რომ გვყავდეს, თუ ინფრასტრუქტურა არ არის მოწყობილი და თავდაცვის ქოლგა არ არის უზრუნველყოფილი, ვერაფერს ვიზამთ. ამით ვიწყებთ ჩვენ და მოდერნიზების პირველი პრიოიტეტი სწორედ ეს არის, ავიაციის სიძლიერეზე და ანტისაჰაერო სისტემის სიძლიერეზე საუბარი ზედმეტია“, _ განაცხადა იზოიამ და დასძინა, რომ ყველა ის ნაბიჯი, რასაც უწყება დგამს ავიაციის და თავდცავის სისტემის გაძლიერებისკენ არის მიმართული.
მისივე ინფორმაციით, ფრანგული ტექნიკის შეძენა 2017 წლიდან იწყება და აქტიურ ფაზაში 2018 წელს შევა.
„გარკვეული თანხებიც არის გადახდილი. ამასთანავე იწყება 37 ადამიანის გადამზადება, რათა ამ ტექნიკის გამოყენება შევძლოთ. საუბარია რადარების და საზენიტო რაკეტების შეძენაზე. ამ დეტალებზე საუბრისგან თავს შევიკავებ. მოკლედ გეტყვით, რომ პოცესი დაწყებულია და აქტიურ ფაზაში შევდივართ“, _ განაცხადა იზორიამ.
