სუბტროპიკული მცენარეების დაავადებებს შორის, როგორც ვეგეტაციის, ისე ნაყოფების შენახვის დროს, ყურადღებას იპყრობს ნაცრისფერი ობი.
იგი პოლიფაგია, მასობრივი გავრცელებით. ხასიათდება მაღალი პათოგენური თვისებებით. ნაცრისფერი ობი, ბოტრიტისი განსაკუთრებით გამოვლინდება გაზაფხულზე, ახლა, ფეიჰოას (თუ სხვა სუბტროპიკულ) მცენარეთა ყვავილებზე. ფეიჰოას ავადმყოფობათა შორის, თავისი მავნეობით და უარყოფითი სამეურნეო მნიშვნელობით, ბოტრიტისის გამომწვევი სოკო საშიშია. იგი ძირითადად ყვავილებისა და ნასკვების დაავადებას იწვევს.
როგორ უნდა შევამჩნიოთ, როცა დაავადება დაწყებულია? ძირითადად დაავადებული ყვავილები და ახალგაზრდა ნასკვები პირველად იღებენ მურა ფერს, რომელიც ხელსაყრელ პირობებში იფარება კარგად განვითარებული მუქი ნაცრისფერი მიცელიარული ფიფქით, რომელიც თანდათან იზრდება და მთლიანად, მთელ ყვავილედს იკავებს. საბოლოოდ კი კარგავს ბუნებრივ ფერს და ლპება. ავადმყოფობის განვითარებას ხელს უწყობს ნალექის სიხშირე, რაც გურიისთვის დამახასიათებელია. განსაკუთრებით ყვავილობის პერიოდში. ასეთ პირობებში მცენარის ყვავილობა გახანგრძლივებულია, დაავადებული ყვავილების ფურცლები დიდხანს არ ცვივა, რაც ყვავილებისა და ნასკვების მასობრივად დაავადებას განაპირობებს.
ნაცრისფერი სიდამპლე ფეიჰოაზე დიდი მავნეობით ხასიათდება. ასევე, ფეიჰოას ნარგავები ჩრდილიან გარემოში თუ არის განთავსებული, დაავადების მასშტაბი მატულობს.
ნაცრისფერი სიდამპლის გამომწვევი სოკო პოლიფაგია. დაავადებათა გამომწვევების შეზღუდვისა და თავიდან აცილებისთვის საჭიროა ბრძოლის აგროტექნიკური, სანიტარულ-ჰიგიენური და ქიმიური მეთოდების სწორი და დიფერენცირებული გამოყენება.
აგროწესებთ გათვალისწინებული ღონისძიებების სწორი და დროული გატარებით მნიშვნელოვნად გავზრდით მცენარის დაავადებისადმი გამძლეობას. სანიტარულ-ჰიგიენური ღონისძიების გატარებისას, დაავადებული ფოთლები, ყვავილები და ნაყოფები უნდა მოვაცილოთ, რაც უნდა გავიტანოთ პლანტაციიდან.
ქიმიური ღონისძიებებიდან ნაცრისფერი სიდამპლის გამომწვევების წინააღმდეგ კარგ შედეგს იძლევა მცენარეების სამჯერადი შესხურება 15%-იანი ბორდოს სითხით ან 0,5%-იანი კაპტანის, ცინების და კუპროზანის სუსპენზიის შესხურება. პირველი წამლობა საჭიროა ახლა, ყვავილობის დაწყებამდე, მეორე კი _ გამონასკვის პერიოდში. რაც შეეხება მესამე წამლობას, ის უნდა მოვახდინოთ, მეორე წამლობიდან 20 დღის შემდეგ.
