როგორ აღინიშნა თბილისში ფაშიზმზე გამარჯვების დღე (ფოტორეპორტაჟი)

9 მაისი ქვეყნისთვის გამარჯვების, საზოგადოების ნაწილისთვის კი, ახლობელი ადამიანების დაკარგვის დღეა. წელს საქართველოში მეორე მსოფლიო ომში ფაშისტურ გერმანიაზე გამარჯვების 72-ე წლისთავი აღინიშნება.

თბილისში, ვაკის პარკში, გამარჯვების დღისადმი მიძღვნილი ღონისძიებები დილიდან დაიწყო.

მთავრობის წარმომადგენლები, ოპოზიციური პარტიის ლიდერები თუ ჩვეულებრივი მოქალაქეები, უცნობი ჯარისკაცის საფლავს ყვავილებით ამკობდნენ და დაღუპულთა სულების მოსახსენიებლად საფლავთან სანთლებს ანთებდნენ.

ვაკის პარკში იმყოფებოდნენ ასევე ე.წ. ღამის მგლების წევრები, რომელთა საქართველოში შემოსავლამაც საზოგადოების ნაწილის გაღიზიანება გამოიწვია. მათ უცნობი ჯარისკაცის საფლავს პატივი მიაგეს და მიხაკებით შეამკეს.

საზოგადოების წარმომადგენლების დიდი ყურადღების ქვეშ ასევე სამამულო ომში გადარჩენილი ვეტერანები იყვნენ, რომლებმაც, პატივი მიაგეს სამამულო ომში დაღუპულ თანამებრძოლთა ხსოვნას.

უცნობი ჯარისკაცის საფლავთან მოსული პოლიტიკოსების ნაწილი ჟურნალისტებთან საუბრისას აღნიშნავდა, რომ ვეტერნებმა საკუთარი სიცოცხლისა და ჯანმრთელობის ფასად შემოგვინახეს მომავალი და ისინი ყოველთვის დაფასებულები იქნებიან, თუმცა, საზოგადოების ნაწილი თვლის, რომ ვეტერნები დღეს სათანადოდ დაფასებულები არ არიან.

როგორც „გურია ნიუსთან“ საუბრისას, ომში დაღუპული ერთ-ერთი მეომრის შვილმა, რომელმაც საკუთარი ვინაობის გამხელა არ ისურვა, თქვა, რომ დღეს ვეტერნები დაუფასებლები არიან.

„როცა მეორე მსოფლიო ომი დაიწყო 9 წლის ვიყავი, ახლა, 85 წლის ვარ. მომავალ თაობას ვუსურვებ ყოველთვის ეცხოვროთ მშვიდობიანად, ისე, როგორც, ვცხოვრობდით საბჭოთა კავშირში. მართალია, დიდი ომი გამოვიარეთ და დღეს ამ ომის გამარჯვებას ვზეიმობთ, მაგრამ ქართველ ხალხს ვუსურვებ ის დღეები, რომლებიც მშვიდობიანი იყო არასდროს მოკლებოდეთ. დღევანდელ სიტუაციას რომ ვუყურებ ხალხი ძალიან შეწუხებულია და ამას მშვიდობა არ ჰქვია. ხალხი ძალიან ცუდად ცხოვრობს, ვეტერანები კი ცუდად არიან დაფასებულები“, _თქვა მან.

ვეტერანთა არასამთავრობო ორგანიზაცია, „ძლიერი, ერთიანი საქართველოს“ სამოქალაქო ფრთის ხელმძღვანელი, მარიამ ჩაჩხიანი ასევე მიიჩნევს, რომ საქართველოში ვეტერნები დაფასებულები არ არიან.

„დღევანდელი დღე არის ჩვენთვის ძალიან მნიშვნელოვანი, რადგან ფაშიზმზე გამარჯვების დღეა. ძალიან გვიხარია, ის, რომ, ვხედავთ მოხუც ადამიანებს, რომლებიც ომის ვეტერანები არიან. აქ მოვედით იმისთვის, რომ თითოეულ ქართველს მივულოცოთ დღევანდელი დღე“, _ აღნიშნა ჩაჩხიანმა და დასძინა „ჩემი აზრით, საქართველოში ვეტერნები დაფასებულები არ არიან.“

„გურია ნიუსთან“ საუბრისას, ვალენტინა პისარიონოვა აღნიშნავს, მამა ომიდან აღარ დაბრუნებულა, ამიტომ, 9 მაისს, უცნობი ჯარისკაცის საფლავის ყვავილებით შემკობა მისთვის მამის საფლავზე ყვავილების მიტანის ტოლფასია.

„მამაჩემი ომის მონაწილე იყო და არ დაბრუნებულა. ომის პერიოდი და ის პირობები, რაშიც, ცხოვრებამ მოგვიწია მაშინდელ ბავშვებს მახსოვს. ერთია, როგორ მივდიოდით გამარჯვებამდე, დღევანდელ დღეს კი, როდესაც უცნობი ჯარისკაცის საფლავზე მოვდივარ, ისეთი შეგრძნება მაქვს, თითქოს მამაჩემის სასაფლაოზე ვდებ ყვავილებს,“_ამბობს პისარიონოვამ.

„გურია ნიუსთან“ უცნობი ჯარისკაცის სასფლავის მნიშვნელობაზე საუბრობს ერთ-ერთი სკოლის მასწავლებელი, თამარა, რომელმაც გვარის გამხელა არ ისურვა.

„9 მაისი ყოველთვის უნდა აღვნიშნოთ, რადგან, მაშინ საქართველო საბჭოთა კავშირის შემადგენლობაში იყო, მაგრამ, პროცენტულად, ომში ქართველები უფრო მეტნი დაიღუპნენ. კარგი მომავალი თაობა იზრდება და ვუსურვებ, რომ ომი აღარ ნახონ. პირადად მე, ყოველ 9 მაისს მოვდივარ და უცნობი ჯარისკაცის საფლავს პატივს ვაგებ, რადგან მასში იგულისხმება ყველა ვინც ვერ დაბრუნდა, მათ შორის, ჩემი მეუღლის ბიძა,“_ამბობს თამარა.

უცნობი ჯარისკაცის საფლავთან შეკრებილ ადამიანებს შორის იყვნენ ისეთებიც, რომლებიც ჩვენი ყურადღების ქვეშ თუნდაც ჩაცმულობის ან რამე სიმბოლური სურათის გამო მოხვდა.

ერთ-ერთი ასეთი პირი, ჯამბულ ხაბეიშვილი აღმოჩნდა, რომელსაც მკერდზე სტალინის სურათი ჰქონდა ჩამოკიდებული.

„მამაჩემი იყო ჩეხოსლოვაკიის, ჩინეთის და აფხაზეთის ომის ვეტერანი. ბავშვობიდან სტალინის თაყვანისმცემელი ვარ და აქ სტალინის სურათით ამიტომ მოვედი. მე მუშურ-გლეხური კონსტიტუცია ვიცი სხვა კონსტიტუცია ჩემს თავში არ შევა. ის იყო ძმური, მეგობრული. პატარა მინუსი ყველაფერს აქვს და აი, ბატონო კი არის შედეგი, კატა-თაგვობანას თამაშობენ და ყველა დაბნეულია,“_ამბობს ხაბეიშვილი.

უცნობი ჯარისკაცის საფლავის ყვავილებით შემკობის გარდა, ვაკისპარკში ასევე „ბიგ ბენდის“ კონცერტი გაიმართა, ხოლო კონცერტის დასრულების შემდეგ, ვეტერნები ტრადიციულად სუფრასთან მიიწვიეს.

ცნობისთვის, ფაშიზმზე გამარჯვებიდან დღეს 72 წელი გავიდა. მეორე მსოფლიო ომს 60 მილიონამდე ადამიანის სიცოცხლე შეეწირა, მათ შორის მხოლოდ საქართველოდან 200 ათასი მოქალაქე დაიღუპა ან უგზო-უკვლოდ დაიკარგა.