პარლამენტის თავმჯდომარის, ირაკლი კობახიძის მოსაზრებით, 2018 წლის საპრეზიდენტო არჩევნებში „ქართული ოცნების“ კანდიდატი გაიმარჯვებს. ირაკლი კობახიძემ პრეზიდენტის არჩევის წესზე კიდევ ერთხელ თელავში, კონსტიტუციური ცვლილებების საყოველთაო-სახალხო განხილვის კომისიის სხდომაზე ისაუბრა.
სპიკერის თქმით, როცა საუბარი საპრეზიდენტო არჩევნებზეა, კონსტიტუციურ პროექტში წერია, რომ პრეზიდენტის არაპირდაპირი წესით არჩევა 2023 წლიდან ამოქმედდება. „საუბარი იყო იმაზე, რომ თითქოს, რაღაცის გვეშინია და რაღაც სუბიექტური ინტერესები გვაქვს. ეს საუბრები რომ გამოგვერიცხა, პროექტში ჩავწერეთ, რომ ეს რეგულაცია 2023 წლიდან ამოქმედდება. როგორ წარმოგიდგენიათ, სუბიექტური ინტერესებიდან გამომდინარე, გაისად არ გვეშინია, მაგრამ ამ წესის შენარჩუნება ხუთი წლის შემდეგ გვეშინია? – ყველაფერი გაკეთდა, რომ რაიმე საბაბიც არ დაგვეტოვებინა, მაგრამ ამაზე საუბარი მაინც გრძელდება. არანაირი შიში არ არსებობს და საპარლამენტო სისტემისთვის ბევრად უკეთესია, პრეზიდენტი არაპირდაპირი წესით არჩეული იყოს“, – აღნიშნა კობახიძემ.
პარლამენტის თავმჯდომარემ ევროკავშირთან ასოცირების ხელშეკრულების ხელმოწერასთან დაკავშირებით, პრეზიდენტ გიორგი მარგველაშვილსა და ყოფილ პრემიერ-მინისტრ ირაკლი ღარიბაშვილს შორის განვითარებული პროცესებიც გაიხსენა და მოვლენები „ქვეყნის თავის მოჭრად“ შეაფასა.
„წარსულის გამოცდილებამაც გვაჩვენა, რომ პირდაპირ არჩევნებს უარყოფითი გავლენა ამ წლების განმავლობაშიც ჰქონდა. მათ შორის, უფლებამოსილების განაწილებაზე. ყველას ერთად მოგვეჭრა თავი, როცა პრეზიდენტი და პრემიერი ასოცირების შეთანხმებასთან დაკავშირებით ვერ შეთანხმდნენ. მთელ ქვეყანას თავი მოეჭრა და ამის ერთ-ერთი მთავარი მიზეზი პირდაპირი ლეგიტიმაცია იყო, რასაც ვამბობთ, რომ უფლებამოსილებასა და ლეგიტიმაციას შორის დისბალანსია. შავით თეთრზე წერია, რომ ეს პრემიერის პრეროგატივა იყო და ასოცირების შეთანხმებაზე ხელი პრემიერს უნდა მოეწერა“, – განაცხადა სპიკერმა.
კობახიძე 2018 წლის საპრეზიდენტო არჩევნებსაც გამოეხმაურა და აღნიშნა, რომ უმწვავესი პარტიულ-პოლიტიკური საარჩევნო კამპანია წარიმართება, სადაც პარტიებმა ერთმანეთი მძაფრად უნდა გააკრიტიკონ, მილიონები უნდა დაიხარჯოს, რომ კანდიდატმა საარჩევნო კამპანია მოიგოს, თუმცა, ასეთ შემთხვევაში გამორიცხულია, რომ პრეზიდენტად ზეპარტიული ფიგურა მოუყვანო.
“მარტივად შეგვიძლია წარმოვიდგინოთ, საპრეზიდენტო კამპანია თუ როგორი იქნება. არც ისლანდიური და არც ავსტრიული საარჩევნო კამპანიას არ ემსგავსება. ყველამ ვიცით, გამარჯვებული „ქართული ოცნების“ კანდიდატი, ჩვენი გულმხურვალე მხარდამჭერი იქნება. ჩვენთვის პრეზიდენტის პირდაპირი წესით არჩევა სუბიექტურად უკეთესია, რადგან ასეთ პირობებში არჩეული პრეზიდენტი უფრო მეტად გაგვაძლიერებს, მაგრამ იმაზე ვსაუბრობთ, რომ სისტემისთვის არაპირდაპირი წესით არჩევა სჯობს“, – დასძენს კობახიძე.
საქართველოს ყოფილმა პრემიერ-მინისტრმა, ირაკლი ღარიბაშვილმა ევროკავშირთან ასოცირების ხელშეკრულებას ხელი 2014 წლის 27 ივნისს, ბრიუსელში მოაწერა.
1tv.ge
