ლანჩხუთი-ჩოხატაურის მაჟორიტარი დეპუტატის, ნინო წილოსანის მამის, ბადრი წილოსანის წინააღმდეგ მიმდინარე დავა თბილისის საქალაქო სასამართლოში დღეს დასრულდა.
თბილისის საქალაქო სასამართლოს სამოქალაქო კოლეგიის 2017 წლის 17 მაისის გადაწყვეტილებით, დაკმაყოფილდა შპს ,,თ.ჯ. თრეიდის“ სარჩელი ბადრი წილოსანის მიმართ, 2008 წლის 17 სექტემბრის აქციათა ნასყიდობის ხელშეკრულების ბათილად ცნობისა და აქციების შპს ,,თ.ჯ. თრეიდის“ სახელზე აღრიცხვის შესახებ.
ბათილად იქნა ცნობილი შპს ,,თ.ჯ. თრეიდსა“ და ბადრი წილოსანს შორის 2008 წლის 17 სექტემბერს დადებული აქციების ნასყიდობის შესახებ ხელშეკრულება და ბადრი წილოსანის საკუთრებაში არსებული სს ,,ელექტროვაგონშემკეთებელი ქარხნის” აქციების 25.817895 % -ის მესაკუთრედ აღირიცხა შპს ,,თ.ჯ. თრეიდი“.
მოცემულ საქმეზე ნაწილობრივ გაუქმდა თბილისის საქალაქო სასამართლოს სამოქალაქო საქმეთა კოლეგიის 2014 წლის 26 აგვისტოს განჩინებით გამოყენებული სარჩელის უზრუნველყოფის ღონისძიება და ბადრი წილოსანის საკუთრებაში არსებული სს ,,ელექტროვაგონშემკეთებელი ქარხნის” დაყადაღებული აქციების 51.635 % -დან ყადაღა მოეხსნება მხოლოდ 25.817881 % -ს, აქციების დანარჩენ ნაწილზე კი ყადაღა დარჩა ძალაში.
როგორც ცნობილია, დავა, რომელიც დღეს დასრულდა 2008 წლის 17 სექტემბერს დაიწყო, როდესაც „ელექტროვაგონშემკეთებელი ქარხნის“ წილის 52.63% 3 მილიონ ლარად წილოსანის კომპანიას გადაეცა.
„ელექტროვაგონშემკეთებელი ქარხნის“ ყოფილი მეწილეების მტკიცებით წილი იძულებით დაათმობინეს, რასთან დაკავშირებითაც ამ დრომდე სასამართლო პროცესები მიმდინარეობდა.
კერძოდ, შპს “თ. ჯ. თრეიდის” გენერალური დირექტორი დავით აბრამიშვილი, პროკურატურისთვის მიცემულ ჩვენებაში აღნიშნავდა, რომ კომპანიის თანამშრომლებსა და მფლობელებზე, 2008 წელს, ფინანსური პოლიციის მაღალი და დაბალი რგოლის თანამშრომლების მხრიდან ხდებოდა ზეწოლა, რომ “თ. ჯ. თრეიდს” თავისი წილი უნდა გადაეცა “ელექტროვაგონშემკეთებელი ქარხნის” კიდევ ერთ მეწილე ბადრი წილოსანზე.
წილის იძულებით გადაფორმებაზე საუბრობდა “ელექტროვაგონშემკეთებელი ქარხნის” სამეთვალყურეო საბჭოს ყოფილი თავმჯდომარე ავთანდილ საყვარელიძეც, რომლის მტკიცებით, “ბადრი წილოსანის ვაჟი, ირაკლი წილოსანი დავით კეზერაშვილის ახლო მეგობარია და სწორედ ამ მეგობრობის დამსახურებით მოხდა მისთვის ქონების წართმევა”.
“ფინანსური პოლიციის თანამშრომლებმა, ღამის 8 საათიდან 12 საათამდე როგორ წაგვიყვანეს ნოტარიუსისოფისში და იძულებით გადამაფორმებინეს ბადრი წილოსანისთვის ქონება. აქვე აღსანიშნავია ისიც, რომფიქტიური გადარიცხვა “თი ბი სი ბანკში” არასამუშაო საათებში განხორციელდა”, _ იხსენებდა საყვარელიძე “გურია ნიუსთან” საუბრისას.
ამავე თემაზე:
დეპუტატის მამის “რთულად განსახილველი” საქმე _ წილოსანის სასამართლო გრძელდება
ბადრი წილოსანის ადვოკატი: “ავთანდილ საყვარელიძე ბინძურ კამპანიას და ცილისწამებას აგრძელებს”
