ოზურგეთის მუნიციპალიტეტის სოფელ ლიხაურში მცხოვრები, 80 წლის ჯუმბერ თოიძე სრულიად მარტო ცხოვრობს ძველისძველ სახლში, რომელსაც სტიქიამ სახურავი მთლიანად გადააძრო და ნაწილობრივ დაანგრია კიდეც.
_ სახლი თავზე დამანგრია საშინელმა ქარმა. ჯერ მადლობას ვიტყვი, რადგან, ხედავთ, ხელოსნები მუშაობენ, ოზურგეთის მუნიციპალიტეტის გამგეობიდან სახურავი კი მომიტანეს დროულად, მაგრამ მეორე წელია, დახმარება რომ მომიხსნეს, უპატრონოს, მოხუცს, ყურში ძლივს რომ მესმის… თუ იცით, საერთოდ გაუქმდა? და თუ არსებობს, ჩემზე უარეს გასაჭირში მყოფი ვინ ნახეს ამ რაიონში? რაღაც 8-ლარიან პენსიას და 20-ლარიან დახმარებას მაძლევდა შევარდნაძე, სამ წელიწადს ამბავს არ კითხულობდა და არ მართმევდა. ამათ კი ამიტალახეს კარი, სანამ არ მომიხსნეს. ამ სახლის ქვეშ რომ კაცი დაჯდება, მე შემხედავს, ჩემს ამბავს გაიგებს და დახმარებას მომიხსნის, ადამიანის სისხლი აქვს? რამე გეგმა აქვთ შესასრულებელი თუ რა ხდება?! _ ამ სიტყვებით შეგვეგება საკუთარი სახლის ეზოში ჯუმბერ თოიძე და გაღიზიანებული ერთსა და იმავე კითხვას რამდენჯერმე სვამდა: პასუხი მაინტერესებს, ჩემზე უარესი ვინ არის, ფორთხვით რომ ვიარო, უნდა მივიდე და ვნახოო.
ჯუმბერ თოიძეს უმაღლესი განათლება აქვს, პროფესიით ისტორიკოსია და ახალგაზრდობისას ლიხაურის თემის სოფელ აჭის სკოლაში მასწავლებლად მუშაობდა. ოჯახი არ შეუქმნია. დღეისთვის დისშვილები აქცევენ ყურადღებას, თუმცა, ამაზეც ნერვიულობს: _ ყველას თავისი საქმე აქვს, მე მომხედონ თუ თავიანთ ოჯახებს მოუარონ? _ ამბობს ის.
მოხუცს სმენა იმდენად აქვს დაქვეითებული, გაჭირვებით ვახერხებთ მასთან საუბარს. ამბობს, რომ ერთხელ მოახერხა ყურსასმენი აპარატის შეძენა, თუმცა გაუფუჭდა და მერე, უფულობის გამო, ვეღარ იყიდა. პენსიით წამლების სრულად ყიდვასაც ვერ ახერხებს, რადგან, როგორც თვითონ ამბობს, შიმშილის ეშინია.
კითხვაზე, თუ დახმარება ორი წლის წინ მოუხსნეს, რატომ არ დაწერა ხელმეორედ განცხადება, კიდევ უფრო ღიზიანდება:
_ რა დავწერო?! ამიტალახეს კარი, ასჯერ მოვიდნენ, არ გეკუთვნისო, წადი და იჩივლე, სადაც გინდაო. მას მერე კიდევ უფრო დავუძლურდი. აგერ, თქვენ გითხარით ახლა და გააგებინეთ ქვეყანას ჩემი ამბავი, იქნებ, ვინმე კი შემორჩა ამ მთავრობაში ისეთი, ჩემნაირის გასაჭირს გულთან რომ მიიტანს! _ გვეუბნება მოხუცი.
ჯუმბერ თოიძის სახლს ახლა სახურავის დემონტაჟს უკეთებენ, რომ დაბლა დასწიონ და ისე გადახურონ. ასე უფრო დაცული იქნება ქარისგან. როგორც მეზობლები ამბობენ, ახლახან ცეცხლი კინაღამ გაუჩნდა, რადგან წვიმის წყლისგან დასველდა ელექტროსადენები, მოხდა მოკლე ჩართვა და ძლივს მოახერხა თავის გადარჩენა.
დისშვილი, მამა თეოდორე ხშირად აქცევს ყურადღებას ჯუმბერ თოიძეს, თუმცა, მოხუცს სმენის პრობლემა გაუუარესდა და მასთან კონტაქტი კიდევ უფრო ჭირს:
_ ახლახან ძაღლმა უკბინა, შესაძლოა, ვერ დაინახა, მაგრამ ყეფაც რომ არ ესმის, სერიოზული საშიშროების წინაშე აღმოჩნდა. წავიყვანე ექიმთან, ნემსი გაუკეთეს. რა ვქნა _ მეც არ მაქვს საშუალება, რომ ხშირად დავეხმარო… რაც შემიძლია, ვუდგავარ გვერდით, მაგრამ ეს არაა საკმარისი. ამ ადამიანისთვის დახმარების მოხსნა მართლა გაფიქრებინებს, რომ ქვეყანაში ვიღაც მარტოხელა მოხუცებს ადამიანად არც თვლის და შიმშილით სიკვდილისთვის იმეტებს, _ გვეუბნება მამა თეოდორე.
მეზობლები _ გენო და თემურ ჭელიძეები სიბრალულს გამოთქვამენ მარტოხელა მოხუცის მძიმე სოციალური პირობების გამო:
_ სახლს კი ხედავთ, რა დღეშია! ჩვენ ვეხმარებით გადახურვაში. კიდევ კარგი, ეს დახმარება რომ გაუწიეს, თორემ ღია ცის ქვეშ იყო დარჩენილი. მართლაც დიდი უსამართლობაა ასეთი მოხუცისთვის დახმარების მოხსნა. მიწის ნაკვეთი კი აქვს და რამდენიმე ძირი თხილი თუ ვაშლი, მაგრამ ეს არის ერთჯერადი შემოსავალი და რამდენი უნდა აიღოს 50 კილოგრამ თხილში, რომ შეწყვეტილი დახმარება ამ თანხით ჩაანაცვლოს? _ ამბობენ ისინი და ირონიულად კითხულობენ, მითითება ხომ არ აქვთ, რაც შეიძლება მეტ უპატრონო და ღატაკ მოხუცს მოუხსნან დახმარებაო.
სოციალური მომსახურების სააგენტოს გურიის სოციალური მომსახურების ცენტრის უფროსი თინათინ ლომჯარია “გურია ნიუსთან” ამბობს, რომ ჯუმბერ თოიძეს განაცხადის დაწერის უფლება აქამდე ორჯერ ჰქონდა და სააგენტოს აწი მაინც აუცილებლად უნდა მიმართოს.
