ლანჩხუთის მუნიციპალიტეტის მიმდინარე წლის მთავარ საფინანსო დოკუმენტში ცვლილების გახორციელებისთვის ლანჩხუთის საკრებულომ ადმინისტრაციული წარმოება დაიწყო.
როგორც გასულ კვირას საკრებულოს რიგგარეშე სხდომაზე საფინანსო-საბიუჯეტო სამსახურის უფროსმა როლანდ ლაშხიამ განმარტა, საქართველოს მთავრობის განკარგულებით, აზიური ფაროსანას წინააღმდეგ გასატარებელი ღონისძიებებისთვის გამოყოფილია და 2017 წლის ბიუჯეტში ასახულია გრანტის სახით 215 784 ლარი.
როლანდ ლაშხიას თქმით, შესაბამის სამინისტროებთან სიტყვიერი შეთანხმების საფუძველზე, ღონისძიებების გასახორციელებლად ეს თანხა სუბსიდიის სახით ა(ა)ი “საგარეო-ეკონომიკური კავშირურთიერთობების ინვესტიციების, ტრანსპორტის, ტურიზმის და მეწარმეობის განვითარების ცენტრს გადაეცემა.
ამ თანხიდან 199 800 ლარი 1998 ჰა თხილის ფართობის შესაწამლად საჭირო მუშახელის ანაზღაურებისთვისაა გათვალისწინებული, ხოლო 15 984 ლარი _ საწვავისთვის.
მიუხედავად იმისა, რომ უკვე ჩამოტანილია სპეციალური ტექნიკა და წამალიც, რომლითაც უნდა მოხდეს ფართობების შეწამვლა, საკრებულოს წევრთა უმრავლესობა პრეპარატ “ბიფეტრინის” გამოყენების წინააღმდეგია:
“შეწამვლის წინააღმდეგი არავინაა, თუმცა, მთელი მოსახლეობა “ბიფეტრინის” გამოყენების წინააღმდეგია. ამ პრეპარატთან დაკავშირებით ძალიან ბევრი პასუხგაუცემელი კითხვა არსებობს. არც მოსახლეობას და არც ჩვენ არ გვაქვს სრული ინფორმაცია. ხალხი ფიქრობს, რომ ამ წამლის გამოყენება სავალალო შედეგამდე მიგვიყვანს და ძნელია, არ დაეთანხმო მათ. გვეუბნებიან _ ფუტკარი, ქათამი, ძროხა მოარიდეთ რამდენიმე დღით შესაწამლ ადგილსო, ვინ იზამს ამას?!
შეწამვლა ნამდვილად აუცილებელია, მაგრამ ამ შემთხვევაში საქმე გვაქვს ქიმიურ პრეპარატთან, რომელსაც გააჩნია მკვეთრი უარყოფითი მხარეები და ყოველი 10 მოსახლიდან რვა მაინც წინააღმდეგია ამ წამლით შეწამლოს ფართობები. თან ლანჩხუთში იყიდება სხვა, ნაკლებად საშიში პრეპარატი”, _ ისმოდა დეპუტატთა მხრიდან საკრებულოს სხდომაზე.
საბოლოოდ კი, ლაშხიას მიერ წარმოდგენილ საკითხზე ადმინისტრაციული წარმოების დაწყებას სხდომაზე მყოფმა ოცდაორივე დეპუტატმა დაუჭირა მხარი იმ მოტივით, რომ კომისიებსა თუ ფრაქციებში საკითხის დეტალური განხილვა მოხდება, სადაც მოწვეული იქნებიან სურსათის უვნებლობის სამსახურის, ჯანდაცვისა და სოფლის მეურნეობის სპეციალისტები.
