ოზურგეთის დემოკრატიული ჩართულობის ცენტრში ჩატარდა საინფორმაციო შეხვედრა: „სურსათის ეტიკეტირების საკანონმდებლო მოთხოვნები“, რომელიც საქართველოს სტრატეგიული კვლევებისა და განვითარების ცენტრის ინიციატივით მოეწყო.
შეხვედრაზე მოწვეული იყვნენ ადგილობრივი მომხმარებლები, მეწარმეები, მაღაზიების მფლობელები, სურსათის ეროვნული სააგენტოს წარმომადგენლები.
სტრატეგიული კვლევების ცენტრის წარმომადგენელმა, ვახტანგ კობალაძემ ისაუბრა სასურსათო პროდუქტების ეტიკეტირებასთან დაკავშირებით ქვეყანაში არსებულ მოთხოვნებსა და სიახლეებზე.
_ ეტიკეტით, გასაყიდად გამზადებული სურსათის შესახებ, მომხმარებელს უნდა მიეწოდოს სურსათთან დაკავშირებული აუცილებელი, უტყუარი ინფორმაცია ქართულ ენაზე. არ აქვს მნიშვნელობა, პროდუქცია ქართულია თუ უცხოური. ეტიკეტი ქართულ ენაზე უნდა იკითხებოდეს. თუ არაქართუენოვანია, მაშინ პასუხს აგებს მაღაზიის მეპატრონე. რამდენად სწორია ინფორმაცია, ამაზე უკვე მეწარმე რის პასუხისმგებელი. ასევე აკრძალულია, სურსათზე მინიშნებული იყოს ბიოლოგიური და ეკოლოგიური ღირსებები, თუ არ აქვს მეწარმეს ეკოლოგიური ან ბიოწარმოების სერტიფიკატი, რომელიც გაცემული უნდა იყოს აკრედიტებული ორგანიზაციის მიერ, _ თქვა ვახტანგ კობალაძემ. თუმცა, დარბაზში საპასუხოდ თქვეს, რომ ხშირად მოაქვთ სერთიფიკატები, რომელიც ჩინურ ან უკრაინულ ან სხვა რომელიმე ენაზეა გაცემული. ყველაზე ნაკლებად ხდება ქართული ცენზის წარდგენა, რაც ისევ და ისევ საეჭვოს ხდის ამ ყველაფერს.
ოზურგეთის ახალი სავაჭრო ცენტრის „ჩემი მარკეტის“ ხელმძღვანელმა ირაკლი სირაძემ მკაცრად ისაუბრა ეტიკეტზე გაკეთებულ უპასუხისმგებლო წარწერებზე, რომელსაც ხშირად ვერანაირი სათვალით და ორასპროცენტიანი მხედველობითაც ვერ წაიკითხავს ადამიანი. მას უპასუხეს, რომ რომ ასეთი ეტიკეტირების მქონე პროდუქცია არ უნდა მიიღოს.
შეხვედრის მონაწილეებს შორის კამათი გამოიწვია ქართულენოვანი წარწერის საკითხმაც, თუმცა იქვე აღნიშნეს, რომ ეს თემა განხილვას არ ექვემდებარება, საქართველოში სახელმწიფო ენა არის ქართული და უნდა იყოს შესაბამისი ეტიკეტი.
მაღაზიების მფლობელებმა აღნიშნეს, რომ ზოგ მეწარმეს თუ დისტრიბუტორს საერთოდ არ აქვს ეტიკეტით დამზადებული პროდუქცია. პასუხი აქაც ერთმნიშვნელოვანი იყო – ასეთ შემთხვევაში წარწერა უნდა გააკეთონ თავად, ადგილზე, სავაჭრო ობიექტზე. წინააღმდეგ შემთხვევაში დაჯარიმება გარდაუვალია.
შეხვედრაზე ისაუბრეს გენმოდიფიცირებულ პროდუქციაზე, რომელიც საქართველოში საკმაოდ შემოდიოდა. დღეისთვის კი, დიდი ძალისხმევის შედეგად, მინიმალურ დონეზეა დაყვანილი. ახლა თითქმის არ შემოაქვთ. თუმცა კონტროლი ხდება და თუ ასეთი ფაქტი აღმოჩნდება, დიდია ჯარიმა _ 5 ათასი ლარის ოდენობით.
შეხვედრის მონაწილეებს ასევე ესაუბრა სტრატეგიული კვლევებისა და განვითარების ცენტრის წარმომადგენელი თამარ გობეჯიშვილი. მან განსაკუთრებული მოთხოვნების შესახებ აღნიშნა, კვერცხისა და რძის ნაწარმზე.
_ კვერცხზე აუცილებლად მითითებული უნდა იყოს დრო და ადგილი, სად დაიდო და როდის. უკვე ამოქმედებულია ტექნიკური რეგლამენტი, რომელმაც რძისა და ხორცის პროდუქტების ეტიკეტირების ახალი მოთხოვნები დააწესა, _თქვა მან.
შეხვედრის მონაწილეებს გადასცეს სტრატეგიული კვლევების და განვითარების ცენტრის მიერ მომზადებული ლიფლეტი „სურსათის ეტიკეტი“, რომელშიც შეჯამებული და თვალსაჩინოდ წარმოდგენილია სურსათის ეტიკეტირებასთან დაკავშირებული საქართველოს კანონმდებლობის ზოგადი მოთხოვნები. ნებისმიერი მომხმარებლისთვის ასეთ ლიფლეტი, ერთგვარი გზამკვლევიც შეიძლება იყოს სავაჭრო ობიექტებსა თუ ბაზრებში, სადაც საკვები პროდუქცია იყიდება.
