საკონსტიტუციო ცვლილებებზე მოტივირებული შენიშვნები დღეს გადაეგზავნება საქართველოს პარლამენტს და იმედი მაქვს, რომ პარლამენტს ექნება თანხმობის კონსტიტუცია, – ამის შესახებ საქართველოს პრეზიდენტმა გიორგი მარგველაშვილმა დღეს განაცხადა.
როგორც გიორგი მარგველაშვილმა აღნიშნა, მოტივირებულ შენიშვნები პირველი ოთხი საკითხი არის თავიდან ბოლომდე მმართველი პარტიის “ქართული ოცნების“ საკითხები
“დღეს გადავაგზავნი საქართველოს პარლამენტში კონსტიტუციასთან მიმართებაში მოტივირებულ შენიშვნებს. მოტივირებული შენიშვნები ამ კონკრეტულ შემთხვევაში განსაკუთრებულად დაიწერა. თუ აქამდე და სხვა შემთხვევებში ჩვენ მოტივირებულ შენიშვნებს ვწერდით, ძირითადში ჩვენი შეხედულებებიდან გამომდინარე, კონსტიტუციასთან მიმართებაში გადაწყდა, რომ ამოსავალი ყოფილიყო ის მთავარი, რის თაობაზეც ამ ერთი წლის განმავლობაში მუდმივად ვსაუბრობდი მეც და ქართული საზოგადოება. ეს არის შეთანხმება, კონსენსუსი. სწორედ შეთანხმებისა და კონსენსუსის სულისკვეთებით დაიწერა ეს მოტივირებული შენიშვნები. მოტივირებულ შენიშვნები პირველი ოთხი საკითხი არის თავიდან ბოლომდე მმართველი პარტიის “ქართული ოცნების“ საკითხები, ის საკითხი, რომელიც “ქართულმა ოცნებამ“ ვალდებულებით აიღო ჩასასწორებლად ვენეციის კომისიასთან. ის საკითხები, რაზეც ვალდებულება არის აღებული. ეს ოთხი საკითხი უცვლელად გადმოდის მოტივირებულ შენიშვნებში. ეს არის ბონუსის, ბლოკების, საკონსტიტუციო სასამართლოსა და აღმსარებლობის თავისუფლების საკითხები”, – აღნიშნა პრეზიდენტმა.
მისივე თქმით, მეხუთე საკითხიც ასევე “ქართულ ოცნებას ეკუთვნის”, ეს არის 2020 წელს პროპორციული არჩევნების დანიშვნის საკითხი.
“ეს ის საკითხია, რომლის თაობაზეც ვსაუბრობდით საკონსტიტუციო განხილვების დროს, როცა იყო შესაძლებლობა საქართველოს სხვადასხვა კუთხეში გვესაუბრა კონსტიტუციის პროექტზე საუბრისა. ეს არის 2020 წელს პროპორციული არჩევნების დანიშვნის საკითხი. ამ საკითხებს ვინც იცნობს იცის, რომ მმართველ პოლიტიკურ გუნდს კონსტიტუციის მიღების მომენტში აკლდა ხმები სწორედ ამ საკითხიდან გამომდინარე, მაგრამ ოპოზიციასთან იქნა მიღწეული შეთანხმება, რომ ოპოზიციური ხმები, იმ შემთხვევაში თუ “ქართული ოცნება“ ამ საკითხის გადატანას მხარს დაუჭერს იქნება დამატებული და ეს საკითხიც იქნება გათვალისწინებული”, – აღნიშნა პრეზიდენტმა.
გიორგი მარგველაშვილის განცხადებით, მეექვსე საკითხი პრეზიდენტის არჩევის წესს ეხება.
“ბოლო საკითხი კარგად იცის ქართულმა საზოგადოებამ და ეს ეხება პრეზიდენტის არჩევის წესს. ჩვენ ვიცით, რომ ამ საკითხზე მმართველ პარტიისა და ოპოზიციას შორის ვერ იქნა მიღწეული შეთანხმება. აქაც მე გადავწყვიტე, არ ვიყო ხისტი და ერთმნიშვნელოვნად არ იქნას შეთავაზება, არამედ შევთანხმდეთ, რომ ვერ ვთანხმდებით ამ საკითხზე და გადავდოთ მომავლისთვის. პარლამენტში წარდგენილი მოტივირებული შენიშვნები ექვსპუნქტიანი შეთავაზება, პირველ ოთხ პუნქტში თავიდან ბოლომდე იმეორებს “ქართული ოცნების“ ვალდებულებას ვენეციის კომისიასთან, მეხუთე საკითხიც ეს არის ის პოზიტიური ინიციატივა, რომელიც იქნა არაერთხელ განხილული ქართულ საზოგადოებასთან. ერთადერთი საკითხი, რომელიც ოპოზიციის საკითხია, ეს არის პრეზიდენტის არჩევის წესი, აქაც არანაირი სიხისტე არ არის გამოვლენილი, ჩვენ ამ საკითხის მომავალში განხილვას ვთავაზობთ ქართულ პარლამენტს. ამ შემთხვევაში ამ ექვსი შეთავაზების განხილვის და გაზიარების შემთხვევაში ჩვენ შეიძლება მივაღწიოთ ბევრს. პირველ რიგში ჩვენ ვიღებთ კონსტიტუციას, რომელსაც ექნება ოპოზიცის ხმები და მხარდაჭერა. ჩვენ ვაჩვენებთ იმას, რაზეც არაერთგზის გვილაპარაკია და რაზეც მოგვიწოდებს ვენეციის კომისია, ჩვენ მივიღებთ თანხმობის დოკუმენტს”, – განაცხადა გიორგი მარგველაშვილმა.
პრეზიდენტმა მოტივირებულ შენიშვნებზე მომუშავე გუნდს მადლობა გადაუხადა და აღნიშნა, რომ ბოლო ერთი თვის განმავლობაში ყველა დაუღალავად შრომობდა, ცდილობდა ეს პროცესი შემდგარიყო, როგორც ხელისუფლებასთან, ასევე ოპოზიციასთან კონსულტაციებით.
“მადლობა იმ პარტიებს, რომლებიც მივიდნენ ამ კონსენსუსამდე და მხარი დაუჭირეს ამ შეთანხმების დოკუმენტს. თუ ჩვენ მართლა გვინდა შეთანხმება და ამის სულისკვეთება არსებობს ექვსი პუნქტიდან, როდესაც 5 არის ხელისუფლების ინიციატივა, და ერთი რომელზე ვერ ვთანხმდებით, რომელი კი არ არის გადაწყვეტილი, არამედ მომავალშია გადადებული, ამაზე უფრო კონსტრუქციული შეთანხმება მე ვერ წარმომიდგენია. ამის იქით არის უკვე დათანხმება და არა შეთანხმება. მე იმედი მაქვს, რომ საქართველოს პარლამენტის დეპუტატები, ადამიანები, რომელსაც ქართველმა ხალხმა ანდო თავიანთი ცხოვრების განკარგვა, ამ შეთავაზებას გაიზიარებენ. ისინი ხმას მისცემენ არა პარტიული კონუქტურიდან გამომდინარე, არამედ თავისი სინდისის, პოლიტიკური მრწამისა და მომავალი პასუხისმგებლობის სულისკვეთებით. ეს დოკუმენტი გადაეგზავნება საქართველოს პარლამენტს და იმედი მაქვს, რომ საქართველოს პარლამენტს ექნება თანხმობის კონსტიტუცია“, – განაცხადა მარგველაშვილმა.
1TV.GE
