როგორ და ვინ დაინიშნებიან ოზურგეთის მუნიციპალიტეტის მერიაში ახალი მერის მოსვლის შემდეგ. როგორც გამგებლის მოვალეობის შემსრლებელი არჩილ ყაზაიშვილი ამბობს, ახალარჩეულ მერს აქვს მხოლოდ მოადგილეების და ხელშეკრულებით აყვანილ პირთა დანიშვნის უფლება, ასევე ის ათავისუფლებს და დანიშნავს ა(ა)იპ-ების უფროსებს.
აღნიშნულთა დაკავშირებით საზოგადოების მაღალი ინტერესია, აქედან გამომდინარე, ჩვენ შევეცადეთ, როგორც სახელისუფლებლო, ასევე, არასამთავრობო ორგანიზაციების კომენტარები მოგვეპოვებინა. თუმცა, ოზურგეთში მოქმედი არასამთავრობოების წარმომადგენლებთან დაკავშირება ხვალამდე ვერ ხერხდება. აქედან გამომდინარე, გთავაზობთ, მხოლოდ არჩილ ყაზაიშვილის კომენტარს:
_ რაც შეეხება ახლად არჩეული ოზურგეთის მუნიციპალიტეტის მერის და თავისი თანაგუნდელების გადაწყვეტილებებს/მოსაზრებებს გასაუქმებელ ოზურგეთის მუნიციპალიტეტში და ქალაქ ოზურგეთის მუნიციპალიტეტში დასაქმებული პირების მიმართ განსახორციელებელ საკადრო საკითხებს, საზოგადოებას გვინდა ვაცნობოთ თუ რა საკანონმდებლო რეგულაციებთან გვაქვს საქმე მოცემულ ვითარებაში:
“გასულ წლებში მოქმედებდა „საჯარო სამსახურის შესახებ“ საქართველოს ისეთი კანონი, რომელიც ძალიან ბუნდოვნად და მოკლედ არეგულირებდა საჯარო მოხელის გარანტიებს და პრინციპებს. სწორედ ეს იწვევდა ხელმძღვანელი თანამდებობის პირების შეცვლის დროს, ერთპიროვნული გადაწყვეტილებით, უმაღლესი განათლების, მრავალწლიანი გამოცდილების და მაღალკვალიფიციური კადრების სამსახურიდან დათხოვნას. დღევანდელმა ხელისუფლებამ შეიმუშავა და მიიღო „საჯარო სამსახურის შესახებ“ საქართველოს კანონის სრულიად ახალი რედაქცია (ამოქმედდა 2017 წლის 1 ივლისიდან), რომელმაც ფუნდამენტურად შეცვალა საჯარო სამსახურში დასაქმებული პირების გარანტიები, პრინციპები, ვალდებულებები, უფლება–მოვალეობები და ა.შ. ასევე, სხვა საკანონმდებლო და კანონქვემდებარე ნორმატიული აქტები.
აქვე გაცნობებთ იმის შესახებ, რომ მუნიციპალიტეტების შერწყმის/შეერთების შედეგად შექმნილმა ახალმა მუნიციპალიტეტმა (თანამდებობის პირ(ებ)ა) საკადრო საკითხებთან დაკავშირებით რომელი სკანონმდებლო აქტებით უნდა იხელმძღვანელოს და რა სამართლებრივ ნორმებს არეგულირებს ესენი:
„საქართველოს ორგანულ კანონში „ადგილობრივი თვითმმართველობის კოდექსი“ ცვლილების შეტანის შესახებ“ საქართველოს ორგანული კანონის (26.07.2017წ. N1251-რს) მე-2 მუხლის მე-3 ნაწილის თანახმად – 2017 წლის ადგილობრივი თვითმმართველობის ორგანოების მორიგი არჩევნების შედეგების ოფიციალურად გამოცხადების შემდეგ არჩეულმა მუნიციპალიტეტების მერებმა/საკრებულოების თავმჯდომარეებმა საჯარო სამსახურის ბიუროსთან კოორდინაციით, უზრუნველყონ 2017 წელს გაუქმებული მუნიციპალიტეტების საჯარო მოსამსახურეთა მობილობის წესით გადაყვანა 2017 წელს შექმნილი შესაბამისი მუნიციპალიტეტების მერიებში/საკრებულოების აპარატებში.
„საჯარო სამსახურის შესახებ“ საქართველოს კანონის 52-ე მუხლის 1-ლი პუნქტის შესაბამისად, საჯარო დაწესებულების რეორგანიზაციის, ლიკვიდაციის ან/და მისი სხვა საჯარო დაწესებულებასთან შერწყმის გამო შტატის შემცირებისას შესაბამისი მოხელე შესაძლებელია მისი თანხმობით გადაყვანილ იქნეს იმავე ან სხვა საჯარო დაწესებულებაში მისი თანამდებობის ტოლფას თანამდებობაზე, ხოლო ასეთი თანამდებობის არარსებობისას – დაბალ თანამდებობაზე, მისი კომპეტენციის გათვალისწინებით.
ამავე კანონის 125-ე მუხლის 1-ლი და მე-2 პუნქტების თანახმად:
„1. 2017 წლის 1 ივლისამდე ამ კანონის მე-3 მუხლის „გ“ ქვეპუნქტით გათვალისწინებულმა საჯარო დაწესებულებებმა უზრუნველყონ აღნიშნულ საჯარო დაწესებულებებში არსებული თანამდებობების ამ კანონის 25-ე მუხლის შესაბამისად იერარქიულ რანგებში განაწილება, აგრეთვე საჯარო დაწესებულებებში დასაქმებულ პირთა პროფესიულ საჯარო მოხელეებად გარდაქმნა ან შესაბამისი ფუნქციებისა და უფლება–მოვალეობების მქონე პირებთან შრომითი ხელშეკრულების ან ადმინისტრაციული ხელშეკრულების დადება.“
„2. პირი, რომელიც საჯარო სამსახურში 2017 წლის 1 ივლისამდეა მიღებული შტატით გათვალისწინებულ თანამდებობაზე და რომლის ფუნქციები და უფლება–მოვალეობები შინაარსობრივად პროფესიული საჯარო მოხელის თანამდებობის შესაბამისი ფუნქციებისა და უფლება–მოვალეობების იდენტურია, შესაბამისი საჯარო დაწესებულების გადაწყვეტილებით, 2017 წლის 1 ივლისიდან ჩაითვალოს პროფესიულ საჯარო მოხელედ“, _აღნიშნავს ყაზაიშვილი და განმარტავს, რომ აღნიშნულის გათვალისწინებით, ოზურგეთის მუნიციპალიტეტის გამგეობასა და საკრებულოს აპარატში, ასევე, ქალაქ ოზურგეთის მუნიციპალიტეტის მერიასა და საკრებულოს აპარატში გახორციელდა შტატით გათვალისწინებული საჯარო მოხელეების (სამსახურის უფროსების, განყოფილების უფროსების, მთავარი სპეციალისტების, უფროსი სპეციალისტების, წამყვანი სპეციალისტების და სპეციალისტების) პროფესიულ საჯარო მოხელეებად გარდაქმნა და „2017 წელს გაუქმებული მუნიციპალიტეტების პროფესიულ საჯარო მოხელეთა შეფასების დროებითი წესის დამტკიცების შესახებ“ საქართველოს მთავრობის 2017 წლის 1 სექტემბრის N417 დადგენილების შესაბამისად მათი შეფასება.
_ ასევე მნიშვნელოვანი ცვლილებები გახორციელდა გამგეობის/მერიის სტრუქტურული ერთეულის (სამსახურის უფროსის) თანამდებობის მიმართ, კერძოდ – ძალადაკარგულად გამოცხადებული „საჯარო სამსახურის შესახებ“ საქართველოს კანონის მოქმედება არ ვრცელდებოდა მუნიციპალიტეტის გამგეობის/მერიის სამსახურის უფროსის თანამდებობაზე, ის ინიშნებოდა საჯარო კონკურსის გარეშე და საქართველოს ორგანული კანონის „ადგილობრივი თვითმმართველობის კოდექსის“ თანახმად, უფლებამოსილება უწყდებოდა ახლადარჩეული გამგებლის/მერის უფლებამოსილების ცნობის დღიდან. საქართველოს ორგანული კანონის „ადგილობრივი თვითმმართველობის კოდექსში“ გახორციელებული ცვლილებების შედეგად (მე-60 მუხლის 1-ლი ნაწილი) მერიის სტრუქტურული ერთეულის ხელმძღვანელია საჯარო მოხელე, რომელსაც თანამდებობაზე ნიშნავს და თანამდებობიდან ათავისუფლებს მერი „საჯარო სამსახურის შესახებ“ საქართველოს კანონით დადგენილი წესით. ამასთან არაკონსტიტუციურად იქნა ცნობილი და საკონსტიტუციო სასამართლოს 17.10.2017 N 3/5/626 გადაწყვეტილებით ძალადაკარგულად გამოცხადდა აღნიშნული ორგანული კანონის ის ნორმა სადაც ახალი გამგებლის/მერის არჩევისას (უფლებამოსილების ცნობის დღიდან) უფლებამოსილება უწყდებოდა სტრუქტურული ერთეულის (სამსახურის) ხელმძღვანელს.
ყოველივე ზემოთ აღნიშნულებიდან გამომდინარე, საზოგადოებას მოვახსენებთ, რომ ახლადშექმნილ ოზურგეთის მუნიციპალიტეტის მერიასა და საკრებულოს აპარატში შტატით გათვალისწინებულ თანამდებობებზე მხოლოდ მობილობის წესით უნდა მოხდეს გასაუქმებელ მუნიციპალიტეტებში დასაქმებული პროფესიული საჯარო მოხელეების გადაყვანა. მობილობის განხორციელების შეუძლებლობის შემთხვევაში მოხელე ირიცხება მოხელეთა რეზერვში და ეძლევა შესაბამისი კომპენსაცია, ხოლო პირი, რომელიც არ არის მოქმედი საჯარო მოხელე ის სამსახურში მიიღება ღია საჯარო კონკურსის შედეგების გათვალისწინებით, თუ დახურული კონკურსის შედეგად მოხელეთა რეზერვში ჩარიცხული მოხელეებიდან ვერ შეირჩა შესაფერისი კანდიდატი.
აღსანიშნავია, რომ სწორედ საკონსტიტუციო სასამართლოს გადაწყვეტილებით (2016 წლის 14 აპრილის გადაწყვეტილება N3/2/588) მიეცათ საქართველოს მოქალაქეებს უფლება, როგორც დამოუკიდებელ კანდიდატებს, ამომრჩეველთა საინიციატივო ჯგუფის წარდგინებით მონაწილეობა მიიღონ მუნიციპალიტეტის მერის არჩევნებში. მანამდე, ეს უფლება მხოლოდ პარტიის/საარჩევნო ბლოკის წარდგენილ კანდიდატებს გააჩნდათ!“_ამბობს ყაზაიშვილი.
