ორი მუნიციპალიტეტის _ ქალაქ ოზურგეთის მერიის და ოზურგეთის თემთა გაერთიანების ერთმანეთთან შერწყმამ არაერთი პრობლემა შექმნა. ხელფასები არ აუღიათ ა(ა)იპ ოზურგეთის სარაგბო კლუბი “არწივების“ მოთამაშეებს. გუნდს, ასევე, აქვს სხვადასხვა დავალიანება, რომლებიც გასასტუმრებელია. “გურია ნიუსი“ ამასთან დაკავშირებით ერთხელ უკვე წერდა.
კლუბის დირექტორი თენგიზ კალანდაძე “გურია ნიუსთან“ საუბრისას ამბობს, რომ კლუბში არის ბევრი ტრავმირებული მოთამაშე, რომელთათვისაც ელემენტარული მედიკამენტების შეძენასაც კი ვერ ახერხებენ:
_ ოზურგეთის სარაგბო კლუბმა „არწივემა“ 2017 წლის ბოლო მატჩი გამართეს ქ.თბილისში „დინამოს“ წინააღმდეგ და 20-35 ანგარიშით წააგეს . გუნდი მიმდინარე წელს ავიდა პირველ ლიგაში და მეხუთე ადგილი ნამდვილად არ არის ცუდი შედეგი. ჩვენს რაგბისტებს გააჩნიათ იმდენი პროფესიონალიზმი და გამოცდილება, რომ იბრძოლონ უფრო მაღალი შედეგებისთვის, მაგრამ არის რამდენიმე მიზეზი, რომელსაც, დარწმუნებული ვართ, ყურადღებას მიაქცევს ადგილობრივი ხელისუფლება. არ დარიგებულა გასული თვის ხელფასი, გაგვაჩნია სპორტულ ღონისძიებაში მონაწილეობის ხარჯების დავალიანებები. გვყავს ბევრი ტრამვირებული მოთამაშე, რომელთათვისაც ელემენტარული მედიკამენტების შეძენას ვერ ვახერხებთ. ხელფასების გაუცემლობა გამოიწვევს, ფაქტობრივად, გუნდის დაშლას, რადგან ბევრ მორაგბეს აქვს შემოთავაზებები სხვა კლუბებიდან. ჩემპიონატის მე-2 წრე განახლდება 3 მარტიდან, მაგრამ ვარჯიშები გაგრძელდება ჩვეულებრივი გრაფიკით.
სხვა კლუბებისაგან განსხვავებით. გუნდს არ ყავს სპონსორი და მხოლოდ მუნიციპალიტეტის ბიუჯეტზე არის დამოკიდებული, _ამბობს კალანდაძე.
რამდენიმე დღის წინ, კლუბის დირექტორმა მიმართა და აცნობა ყოველიმე ამის შესახებ ოფიციალურად, წერილობით ახალ მერს კონსტანტინე შარაშენიძეს, თუმცა, წერილი ქალაქ ოზურგეთის მერიის კანცელარიაში ჯერ კიდევ გატარებული არ არის:
_ კანცელარია ჯერ არის, მაგრამ ყველა წერილს გავატარებთ აუცილებლად, _გვითხრა საქმისწარმოების განყოფილებაში პასუხისმგებელმა პირმა მაია ინარიძემ.
ზემოხსენებული წერილი ასეთი შინაარსისაა: “მოგახსენებთ, რომ ა(ა)იპ რაგბის განვითარების კავშირის სარაგბო კლუბი “არწივები“ მიმდინარე წელს გადავიდა პირველ ლიგაში, რამაც გამოიწვია, შესაბამისად, საბიუჯეტო ხარჯების გაზრდა, ქალაქის ხელმძღვანელობასთან შეთანხმებით მე-4 კვარტლის ხარჯები გადმოვიტანეთ მე-3 კვარტალში. შემდეგ უნდა მომხდარიყო დამტკიცებულ ბიუჯეტში ცვლილებები. ვინაიდან აღნიშნულ დროს დაემთხვა საარჩევნო პერიოდი, ორი თვით ადრე შეწყდა ყოველგვარი ცვლილებების შეტანა ბიუჯეტში.
დღეის მდგომარეობით, ანგარიშზე თანხა არ გაგვაჩნია, გვაქვს დავალიანებები. გუნდი წარმატებით გამოდის პირველი ლიგის გათამაშებაში. წლის ბოლომდე გასაცემი გვაქვს ორი თვის (ნოემბერი-დეკემბერი) ხელფასი, რომელიც შეადგენს 40 000 ლარს.
ასევე, გვაქვს სპორტული შეკრების მოწყობის დავალიანება _8 500 ლარი, ტრანსპორტის დავალიანება _1500 ლარი, მედიკამენტების ღირებულების _500 ლარი, საკანცელარიო, რეცხვის და ჰიგიენის ხარჯები _ 300 ლარი, მცირეფასიანი სამეურნეო საქონლის შეძენის ხარჯი _380 ლარი, მიწის გადასახადი _ 4 700 ლარი, საქართველოს რაგბის კავშირის გადასახადი _ 2000 ლარი, კომუნალური გადასახადი _ 50 ლარი.
9-10 დეკემბერს თბილისში კალენდარული მატჩის ხარჯი სასტუმროს გარეშე 1 220 ლარი (კვების და ტარსნპორტის ხარჯი). ჯამში, აღნიშნულ თანხა შეადგენს 59 500 ლარს. გთხოვთ, გაითვალისწინოთ გუნდის მდგომარეობა“.
აღნიშნულ წერილს ხელს ა(ა)იპ რაგბის განვითარების კავშირის დირექტორი თენგიზ კალანდაძე აწერს.
“გურია ნიუსი“ კიდევ ერთხელ დაინტერესდა, რა არის ა(ა)იპ-ში ხელფასების გაუცემლობის მიზეზი. ამასთან დაკავშირებით კომენტარი ვთხოვეთ, როგორც ქალაქ ოზურგეთის მერიის საფინანსო-საბიუჯეტო სამსახურის ყოფილ უფროსს მარიკა ნაცვალაძეს, ასევე, თემთა გაერთიანების აღნიშნული სამსახურის უფროსს გია მამაკაიშვილს:
მარიკა ნაცვალაძე “გურია ნიუსთან“ ამბობს, რომ ა(ა)იპ-ის ხელფასები გაერთიანებული მუნიციპალიტეტის ხელმძღვანელობამ უნდა გასცეს. მისივე თქმით, ბიუჯეტში შემოსულობები ამის საშუალებას იძლევა:
_ არავის აქვს უფლება, ხელფასები დაუკავოს ვინმეს. წინა წლის ბიუჯეტში გათვლილი იყო 12 თვის ხელფასი. როცა პირველ ლიგაში გადავიდნენ, თხოვნა იყო რაგბისტების, რომ ხელშეწყობის მიზნით, მე-4 კვარტალიდან მე-3 კვარტალში გადმოეტანათ 20 000 ლარი ბიუჯეტში.
_ 2017 წლის მე-4 კვარტალში ბიუჯეტში ცვლილებები ვერ გახორციელდებოდა. როცა დასრულდებოდა არჩევნები, შემდეგ უნდა მომხდარიყო, ვინაიდან ორი მუნიციპალიეტტი ერთმანეთს ერწყმის. ახალმა ხელმძღვანელმა ფინანსთა სამინისტროსთან შეთანხმებით, ბიუჯეტი უნდა გაზარდოს და, შესაბამისად, ვალდებულება, რაც აღებულია, უნდა დაფაროს და ხლეფასები უნდა გაიცეს. შემოსულობები იძლევა ამის საშუალებას, რომ გაიცეს ხელფასები. როცა შერწყმა მოხდება, საფინანსო სამსახური დაჯდება , შერწყმული ბიუჯეტიდან უნად მოხდეს ამ ვალდებულებების გაცემა, თუმცა, ეს რა ვადაში, ამას ვერ გეტყვით“, _ამბობს ნაცვალაძე.
გია მამაკაიშვილი აღნიშნავს, რომ სანამ ოფიციალურად არ გაერთიანდება მუნიციპალიტეტები და არ დამტკიცდება საშტატო ნუსხა, მანამ კომენტარს ვერ გააკეთებს:
_ სანამ არ დამტკიცდება საშტატო ნუსხა, კომენტარს ვერ გავაკეთებ. მე ჯერ მოქალაქე ვარ, შესაბამისად, ბიუჯეტზეც კომენტარს ვერ გავაკეთებ. შემდეგ ვნახავ, რა ვალდებულებები ჰქონდა ქალაქს ა(ა)იპ-ს მიმართ და იქედან გამომდინარე გავაკეთებ კომენტარს.
