ლანჩხუთის მუნიციპალიტეტის საკრებულოში მთავარი განხილვის საგანს მიმდინარე წელს გასახორციელებელ სოციალური პროგრამებთან დაკავშირებით მსჯელობა წარმოადგენს.
თუ გასულ წელს ადგილობრივი ბიუჯეტიდან ლანჩხუთში სხვადასხვა სოციალური პროგრამების დასაფინანსებლად, ჯანდაცვის სამსახურის ხარჯების გამოკლებით, წლის გეგმა 470 900 ლარი იყო, წელს ეს მაჩვენებელი მერიის სოციალური სამსახურის უფროსის, თამარ ფირცხალაიშვილის მიერ წარმოდგენილი პროექტის შესაბამისად, მცირედით გაზრდილია.
აღნიშნული პროექტის მიხედვით, ლანჩხუთის მუნიციპალიტეტში 16 სოციალური პროგრამა გახორციელდება, რისთვისაც ბიუჯეტიდან 499 700 ლარის დახარჯვა იგეგმება.
სოციალური პროექტის თანახმად, შარშანდელთან შედარებით გაზრდილია ა(ა)იპ „უფასო სასადილო მზრუნველობამოკლებულთათვის“ დაფინანსება. თუ გასულ წელს, უკიდურესად შეჭირვებული მოხუცებისა და შეზღუდული შესაძლებლობების მქონე პირთა უფასო კვებით უზრუნველსაყოფად, ლანჩხუთის ბიუჯეტიდან ასი ათასი ლარი გაიხარჯა, წელს საამისოდ 110 ათასი ლარია გათვალისწინებული.
წელს, ასევე, მცირედითაა გაზრდილი „მრავალშვილიანი ოჯახების დახმარების“ პროგრამის დაფინანსება, რომელიც მიზნად ისახავს მრავალშვილიანი ოჯახებისთვის ყოველთვიურად ფინანსური დახმარების გაწევას. თუ 2017 წლის მთავარ საფინანსო დოკუმენტში ამ მხრივ 32 ათასი ლარი იყო გამოყოფილი, წელს ეს თანხა 400 ლარით მეტია გათვალისწინებული. მრავალშვილიანი ოჯახები, რომელთაც ჰყავთ 16-დან 18 წლამდე ასაკის ოთხი ან მეტი შვილი და მათი სარეიტინგო ქულა 101 000-მდეა, ყოველთვიურად დახმარებას მიიღებენ მუნიციპალიტეტისგან.
რაც შეეხება მძიმე საცხოვრებელ პირობებში მყოფი ოჯახებისთვის დახმარების გაწევას, ამ პროგრამის დასაფინანსებლად ბიუჯეტს 45 ათასი ლარის გაღება მოუწევს.
სხვადასხვა ომებსა და კონფლიქტებში მონაწილე ვეტერანთა დასახმარებლად, შესაბამისი პროგრამის მიხედვით, თუ შარშან წლის გეგმა ამ მხრივ 48 ათასი ლარით განისაზღვრა, წელს ბიუჯეტი ამ პროგრამის შესაბამისად 51ათას ლარს გაიღებს.
მაღალმთიანი სოფლებიდან მოსწავლეთა ტრანსპორტირების პროგრამის დასაფინანსებლად წლევანდელ ბიუჯეტში 5500 ლარია გათვალისწინებული, რაც გასულ წელთან შედარებით 100 ლარით მეტია.
ცენტრ „იავნანას“ თანადაფინანსებისთვის, რომლის მიზანია სოციალურად დაუცველი ბავშვების ფსიქო-სოციალური რეაბილიტაციისთვის ხელშეწყობა, სოციალური პროგრამიდან წელსაც 10 ათასი ლარია გამოყოფილი.
თირკმლის ქრონიკული უკმარისობით დაავადებულთა სამედიცინო დაწესებულებაში ტრანსპორტირების პროგრამის დასაფინანსებლად 39 800 ლარია დაგეგმილი წლევანდელ ბიუჯეტში .
იძულებით გადაადგილებულ პირთა დახმარების პროგრამისთვის წინა წლების მსგავსად, წელსაც 10 000 ლარია გათვალისწინებული, ხოლო სამკურნალო და საოპერაციო ხარჯებით დახმარების პროგრამისთვის _ 50 000 ლარი.
„გამარჯვებულ ქალთა კლუბის“ სარეაბილიტაციო პროგრამის დაფინანსებისთვის თუ გასული წლის გეგმა 20 ათასი ლარით დაფინანსებას ითვალისწინებდა, წლევანდელი სოციალური პროგრამის პროექტის მიხედვით, დაფინანსება 30 ათას ლარამდეა გაზრდილი.
ხანდაზმულთათვის ერთჯერადი დახმარების გაწევის მიზნით, სოციალური პროგრამის პროექტის შესაბამისად, ლანჩხუთის ბიუჯეტი ათას ლარს გაიღებს.
მძიმე საცხოვრებელ პირობებში, უბედური შემთხვევისა და სტიქიური მოვლენების შედეგად დაზარალებული ოჯახებისთვის ერთჯერადი ფულადი დახმარების გაწევის მიზნით, ახალ ბიუჯეტში 30 ათასი ლარია მობილიზებული, ხოლო მედიკამენტების შეძენაზე დახმარების პროგრამისთვის _ 35 000 ლარი.
რაც შეეხება შშმ პირის სტატუსის მქონე ბენეფიციართა სარეაბილიტაციო კურსის დაფინანსებას, ამ კუთხით წლევანდელ ბიუჯეტში სოციალური პროგრამა, 4 900 ლარს ითვალისწინებს.
პროგრამა ერთჯერადი ფულადი დახმარების გაწევასაც ითვალისწინებს, ამ მხრივ წლევანდელ ბიუჯეტში, ჯერჯერობით, 52 100 ლარია ჩადებული.
რაც შეეხება ჰუმანიტარული ორგანიზაციების, ეროვნულ სკრინინგ ცენტრიდან და სამედიცინო დაწესებულებაში მოწვეული სპეციალისტების ბინით უზრუნველყოფას, თუ 2016 წელს ბიუჯეტმა საამისოდ 4800 ლარი გაიღო, ბოლო ორი წელია ეს მაჩვენებელი ნულოვანია.
აღმოჩნდა, რომ საკრებულოში შენიშვნები აქვთ მერიის მიერ წარმოდგენილ პროექტთან დაკავშირებით. საკრებულოს ქონების მართვის კომისიის თავმჯდომარე გიორგი ჩახვაძე მიიჩნევს, რომ ცვლილებაა გასახორციელებელი ომის ვეტერანებისთვის დახმარების გაცემის წესში და ამ პროგრამაში სარეიტინგო ქულა ნაცვლად 120 ათასისა, 150 ათასით უნდა განისაზღვროს. რაც შეეხება სამკურნალო და საოპერაციო ხარჯებით დახმარების პროგრამას, ჩახვაძის მოსაზრებით, აქ 500 ლარის ნაცლად დაფინასება ათასი ლარი უნდა იყოს.
