მოუწესრიგებელი გზის საფარის გამო შექმნილი პრობლემებით შეწუხებული ქალაქ ლანჩხუთის წმინდა ნინოს ქუჩის მოსახლეობა ადგილობრივი ხელისუფლებისგან დახმარებასა და ყურადღებას ითხოვს.
წმინდა ნინოს ქუჩის ამ მონაკვეთის მაცხოვრებლები, უპირველესად, სანიაღვრე არხის მოწყობის მოთხოვნით გამოდიან, რომ ნაწილობრივ მაინც მოგვარდეს მათ ქუჩაზე არსებული პრობლემა.
საქმე ისაა, რომ 2015 წელს წმინდა ნინოს ქუჩაზე სარეაბილიტაციო სამუშაოები გახორციელდა, თუმცა, ნაწილობრივ _ მაშინ ინფრასტრუქტურის პროგრამით ქალაქის რამდენიმე ქუჩაზე სანიაღვრე არხები და მილხიდები გაკეთდა, მათ შორის, წმინდა ნინოს ქუჩაზეც. ფირმა “სამკუთხედმა”, რეაბილიტაციის ფარგლებში, აქ სანიაღვრე არხები და მილხიდები მოაწყო, სამომავლოდ კი, როგორც ამას მაშინ არქიტექტურისა და ინფრასტრუქტურის სამსახურში ამბობდნენ, ასფალტის საფარიც უნდა დაგებულიყო.
სამწუხაროდ, აღნიშნული პროექტის მიღმა დარჩა იმ ორი შესახვევის რეაბილიტაცია, რომელიც წმინდა ნინოს ქუჩას ოფიციალურად მიეკუთვნება. არადა, როგორც აქაური მოსახლეობა იყო ინფორმირებული, პროექტში ქუჩა სრულად იყო გათვალისწინებული თავისი შესახვევებითა თუ ჩიხებით და მხოლოდ ბოლო მომენტში მოხდა პროექტის კორექტირება.
მაშინ, პროექტში ცვლილების შეტანას გამგეობის ინფრასტრუქტურის სამსახური არასაკმარისი თანხებით ხსნიდა, რასაც გარკვეულწილად ლარის ინფლაციასაც უკავშირებდა.
“წმინდა ნინოსა და დუმბაძის ქუჩები ყველაზე დიდია ლანჩხუთის მასშტაბით და ხარჯთაღრიცხვის შედგენისას თანხები არასაკმარისი აღმოჩნდა. ამიტომაც, შესახვევებისა და ჩიხების რეაბილიტაცია სამომავლოდ გადაიდო. ყოველ შემთხვევაში, პირობას ვდებ, რომ მანამ, სანამ შესახვევებშიც არ გაკეთდება სანიაღვრე არხები და მილხიდები, მანამ ამ ქუჩაზე ასფალტი არ დაიგება”, _ ამბობდა “გურია ნიუსთან” საუბარში სამსახურის უფროსი ლევან ჩხაიძე.
ფაქტია, არც წმინდა ნინოს ძირითად ქუჩაზე დაგებულა ასფალტის საფარი და არც მის შესახვევებსა თუ ჩიხებში გაკეთებულა სანიაღვრე არხები. ადგილობრივები კი უგზოობით შექმნილ პრობლემებზე საუბრობენ, რომელიც განსაკუთრებით აქტუალური, უამინდობისასაა.
“სანამ წმინდა ნინოს ქუჩის რეაბილიტაცია დაიწყებოდა, გვაიმედებდნენ, რომ პროექტის შედგენისას აუცილებლად იქნებოდა გათვალისწინებული მისი შესახვევებიც, თუმცა, სამწუხაროდ, ასე არ მოხდა. როგორც გვითხრეს, თანხა არ იყო საკმარისი. კარგი, ბატონო, მაშინ არ იყო საკმარისი თანხა, მაგრამ შემდეგ წლებში რატომ არ გაგვითვალისწინეს?!
მოვიდნენ და საკუთარი თვალით ნახონ, რა მდგომარეობაა აქ. ვერავინ იტყვის მერიაში, რომ არ სმენიათ ჩვენი პრობლემის შესახებ, მაგრამ, როგორც ჩანს, ნება არაა მათი მხრიდან ჩვენი გასაჭირი გულთან მიიტანონ. არჩევნების წინ მოდიან, გვაიმედებენ, გვპირდებიან, მაგრამ, როგორც ჩანს, მერე ყველას ყველაფერი ავიწყდება.
არაა ჩვენი ქუჩა ქალაქის ცენტრალურ ნაწილში, მაგრამ ამ გზით ძალიან ბევრი ადამიანი სარგებლობს. გზის ამ მონაკვეთით სარგებლობს მესამე და მეორე საჯარო სკოლების მოსწავლეებისა და მასწავლებლების ნაწილი.
ერთი წამოწვიმებაც საკმარისია, რომ წყლითა და ტალახით დაიფაროს ყველაფერი. ფეხის დასადგმელ ადგილს ვერ ნახავ ადამიანი, ლაფსა და ტალახში ვიხრჩობით. წყალი უკვე ეზოებშიც შემოდის, ძალიან ცუდ დღეში ვართ. ასფალტის საფარზე აღარაა საუბარი, სანიაღვრე არხს ვითხოვთ, რომ ლაფში არ დავიხრჩოთ და ბავშვებმა სკოლაში წასვლა ნორმალურად შეძლონ. მაინცდამაინც ქუჩაში უნდა გამოვიდეთ და აქცია გავმართოთ?!” _ ამბობენ წმინდა ნინოს მეორე შესახვევის მცხოვრებლები.
მიმდინარე წელს, ლანჩხუთში 4 541 950 ლარის ღირებულების ინფრასტრუქტურული სამუშაოების გახორციელება იგეგმება მუნიციპალიტეტის მასშტაბით, საიდანაც ერთ მილიონამდე ლარი ქალაქის ადმინისტრაციულ ერთეულში შიდა გზებზე ასფალტბეტონის საფარისა და რკინაბეტონის სანიაღვრე არხების მოწყობას მოხმარდება.
მოხმარდება თუ არა ზემოთ ნახსენები თანხის ნაწილი წმინდა ნინოს ქუჩის შესახვევებში სანიაღვრე არხების მოწყობას, ჯერჯერობით, უცნობია ინფრასტრუქტურის სამსახურისთვის. ლევან ჩხაიძის თქმით, სად და რომელ ქუჩებზე გახორციელდება სარეაბილიტაციო სამუშაოები და დაიხარჯება მილიონ ლარამდე თანხა, ჯერ გადაწყვეტილი არაა.
ქალაქის მაჟორიტარი დეპუტატის, კახა კვიტაიშვილის თქმით, ამ ეტაპზე ზემოთ ნახსენები ქუჩის მონაკვეთი გათვალისწინებული არაა პროექტში, თუმცა, ამბობს, რომ ეცდება, აღნიშნული პრობლემა მოგვარდეს:
“ამ ეტაპზე გადაწყვეტილია, რომ ბაგრატიონისა და მშვიდობის ქუჩებზე გახორციელდება გზის სარეაბილიტაციო სამუშაოები. წმინდა ნინოს ქუჩის აღნიშნული მონაკვეთის პრობლემასაც აუცილებლად გავეცნობით და ვეცდებით შესაბამისი დახმარება გავუწიოთ აქ მცხოვრებლებს”, _ ამბობს კვიტაიშვილი.
