საქართველოს ცხოველთა დაცვის და გადარჩენის საზოგადოების” ვებგვერდზე გამოქვეყნებული ინფორმაციით ირკვევა, რომ საქართველოში მიტოვებული ძაღლების რეგისტრაცია არასდროს ჩატარებულა, თუმცა, არაოფიციალური მონაცემებით, მათი რიცხვი 200 000-ს აჭარბებს.
ამავე ვებგვერდის ცნობით, ცოფის შემთხვევების რიცხვით, საქართველო ევროპაში პირველ ადგილზეა, ხოლო დაკბენილ ადამიანთა შემთხვევების რაოდენობით კი _ მსოფლიოში იკავებს პირველ ადგილს.
რეგიონების მიხედვით, კონკრეტული სტატისტიკა არ არსებობს, თუმცა ფაქტია, რომ გურიის სამივე მუნიციპალიტეტში მიტოვებული ძაღლების სიმრავლის გამო, ადამიანებს უკვე ქუჩაში გადაადგილების ეშინიათ.
რამდენიმე დღის წინ, ჩოხატაურში, მიტოვებულმა ძაღლმა ადამიანი დაკბინა _ შემთხვევა გვიან ღამით, პოლიციის მიმდებარე ტერიტორიაზე მოხდა.
როგორც დაზარალებულმა “გურია ნიუსთან” საუბრისას თქვა, მსგავს ფაქტებს ჩოხატაურში ადგილი ხშირად აქვს:
_ იმდენი მიტოვებული ძაღლია ჩოხატაურის ქუჩებში, რომ ადამიანებს გადაადგილება აღარ შეუძლიათ. ცოტა ხნის წინ ერთი ბავშვი დაკბინა. სკოლიდან ვეღარ გამოდიან მოსწავლეები, საღამოს გავლა კი საერთოდ შეუძლებელია. მაინდამაინც ვინმე უნდა მოკვდეს, რომ ყურადღება მოგვაქციონ? _ აღნიშნა ჩვენთან საუბრისას დაზარალებულმა.
როგორც გაირკვა, ეს პრობლემა ერთეულებს არ აწუხებთ _ ჩოხატაურში ყველა გამვლელი გეტყვით, რომ ეს არის საკითხი, რომელიც დროულად უნდა მოგვარდეს:
_ მაღაზიებთან, საავადმყოფოებთან, სკოლებთან _ ყველგან ნახავთ მიტოვებულ ძაღლებს. ზოგი დაავადმყოფებულია. პატრონი რომ ჰყავდეს მუნიციპალიტეტს, ამაზე საუბარიც არ უნდა დაგვჭირდეს. ბოლო ორი თვეა ყველა ამ პრობლემის მოგვარებას ვითხოვთ. თუმცა, უშედეგოდ, _ აღნიშნავენ ჩოხატაურელები “გურია ნიუსთან” საუბრისას.
როგორც ჩოხატაურელები ამბობენ, ძალიან ხშირად დასახმარებლად პოლიციას იძახებენ:
_ დღე არ გავა დახმარებისთვის პოლიციას ვინმემ არ მიმართოს. ხან პოლიცია დასდევს ძაღლებს ქუჩაში, ხან ადამიანებს აცილებენ სახლში. ასე სანამდე უნდა გაგრძელდეს, აღარ ვიცით, _ ამბობენ ჩოხატაურელები.
ჩოხატაურის ქუჩებში თავისუფლად მოსეირნე ცხოველების უმრავლესობა ინფექციების მატარებელია. მით უმეტეს, იმ ფონზე, რომ ისინი აცრილები არ არიან და არც ის არის გამორიცხული, ცოფითაც კი დაავადდეთ.
ჩოხატაურის მუნიციპალიტეტის გამგებლის ირაკლი კუჭავას თქმით, ეს პრობლემა რამდენიმე დღეში მოგვარდება. მერი ამბობს, რომ კომპანიასთან, რომელმაც უპატრონო ძაღლების იზოლირებაზე უნდა იზრუნოს, ხელშეკრულება დღეს გაფორმდება.
_ ბატონო ირაკლი, როგორც ჩოხატაურელები ჩვენთან საუბრისას ამბობენ, ორი თვეა ეს პრობლემა აწუხებთ და ჩოხატაურის რომ პატრონი ჰყავდეს ამაზე საუბარიც არ უნდა იყოს საჭირო…
_ ბოლო სამი წლის განმავლობაში მაწანწალა ძაღლების იზოლირებაზე მუნიციპალიტეტის თვითმმართველობამ 13 500 ლარი დახარჯა. 2016-2017 წლებში 250 მაწანწალა ძაღლის იზოლირება გახორციელდა. წელს ბიუჯეტში 4 800 ლარი გვაქვს გათვალისწინებული. თუმცა, თუ შარშან 1 ძაღლის იზოლირება გვიჯდებოდა 36 ლარი, წელს შესაბამისმა სამსახურებმა ფასი გააორმაგეს. ჩვენ ჩავატარეთ ფასების მოკვლევა და ჩოხატაურის მერია 2018 წლის 1 მარტიდან გააფორმებს ხელშეკრულებას.
რაც შეეხება პატრონს _ პატრონი სწორედ ძაღლს სჭირდება და ჩვენმა თანამოქალაქეებმა კარგად უნდა გააცნობიერონ, რომ ცხოველის ყოლა, სიამოვნებასთან ერთად, პასუხისმგებლობაცაა და როცა მოგვბეზრდება, მისი ქუჩაში გაშვება გამოსავალი არაა. მით უმეტეს, რომ ცხოველთა მოვლა და მათდამი სათანადო მოპყრობა კონვენციური ვალდებულებაა, _ აღნიშნა ჩვენთან საუბრისას ირაკლი კუჭავამ.
