დღეს, თხილის მოვლა-მოყვანის და გამოკვების თემაზე, გურული ფერმერებისთვის, ოზურგეთის მუნიციპალიტეტის სააქტო დარბაზში, კომპანია „კარტლისის“ ქუთაისის წარმომადგენლობამ სემინარი ჩაატარა.
გურულმა ფერმერებმა მოისმინეს საინტერესო საუბარი თხილის გაშენების შესახებ. მათი დაინტერესება გამოიწვია აგროქიმიკოსის, ნიადაგმცოდნე ნინო მუმლაძის მითითებებმა, რომ დარგვის დროს თხილის ნერგისთვის არ შეიძლება აზოტოვანი სასუქი, რასაც აქამდე ბევრი იყენებდა.
ფერმერებმა დასვეს კითხვები, რომელი სასუქია უმჯობესი.
_ ყოველთვის უმჯობესია ფოსფორი და კალიუმის კომბინირებული სასუქი, რაც მცენარეს ვეგეტაციის ამ პერიოდში, ანუ დარგვისთანავე და მომდევნო ეტაპზე განსაკუთრებით უხდება. აზოტოვანი სასუქი ფესვთა სისტემას წვავს. თავი და თავი ყველაფრის კი არის მიწის ანალიზის ჩატარება, – თქვა ნინო მუმლაძემ.
მან განმარტა, რომ ძირითადად, ყველა ფერმერმა მიწის ანალიზით უნდა დაიწყოს. ისაუბრა იმაზე, რომ განსაკუთრებით უვარგისია თხილისთვის მძიმე თიხნარი და მჟავე ნიადაგები. 
ჩაის ნამყოფ ტერიტორიებზე, დროთა გამავლობაში, თხილის კულტურა სუსტდება და ავადდება. განსაკუთრებით ეხება ეს გურიას, სადაც წითელმიწა და მჟავე ნიადაგებია. თუ სერიოზულად არ მოვეკიდეთ ნიადაგის ანალიზის საკითხს, თუ ზედაპირი არ მოკირიანდა, გამოფიტული ნიადაგი მცენარისთვის საფრთხეს წარმოადგენს.
ფერმერებს დაურიგდათ ლიფლეტები, რომელშიც დეტალურად არის გაწერილი თხილის დაცვის სქემები. ასევე მითითებულია თანამედროვე ტექნოლოგიების დანერგვის და გამოყენების შესახებ სოფლის მეურნეობაში.
გურულმა ფერმერებმა კმაყოფილება გამოთქვეს სემინარი გამო.
_ ეს იყო ძალიან საინტერესო და სასარგებლო შეხვედრა. აუცილებელია ფერმერთა უფრო ფართო აუდიტორია საკუთარი სურვილით იკრიბებოდეს ასეთ შეხვედრებზე. მოწვევის შემთხვევაში კი აუცილებლად უნდა მოვიდნენ. გამოცდილმა ფერმერმაც კი, რამდენმა არ იცის, რომ დარგვის დროს, აზოტოვანი სასუქი ნორჩი მცენარისთვის დაუშვებელია, _ თქვა ცნობილმა ფერმერმა, წარმატებულმა მეწარმემ, სოფელ ბახვის მკვიდრმა დავით თენიეშვილმა.
