ლანჩხუთის სპორტული ცენტრის ხელმძღვანელის, გოჩა ლომაძის მიმართ, რომელსაც ბევრი დღესაც მერის, ალექსანდრე სარიშვილის კადრად მიიჩნევს, ხმაურიან ბრალდებებს აჟღერებს მისი ყოფილი თანამშრომელი.
ლომაძემ ეს პოსტი რამდენიმე თვის წინ ჩაიბარა, მანამდე კი აქტიურად იყო ჩაბმული სარიშვილის წინასაარჩევნო კამპანიაში. ის, რომ სარიშვილის მერობის შემთხვევაში ლომაძისთვის ცენტრის დირექტორობას იმთავითვე გარანტირებული იყო, მაშინ საზოგადოების ნაწილისთვის ცხადზე ცხადი იყო. ასეც მოხდა, მერად არჩევიდან რამდენიმე თვეში რეორგანიზებულ სპორტულ ცენტრის ახალი დირექტორი ალექსანდრე სარიშვილმა საგანგებოდ გამართულ პრესკონფერენციაზე წარადგინა. იმთავითვე ლომაძის დირექტორად დანიშვნას სპორტული ცენტრის თანამშრომლები ერთსულოვანი კეთილგანწყობით არ შეხვედრია, მათი ნაწილი პირად საუბრებში არ მალავდა, რომ ახალი დირექტორის კანდიდატურა მათთვის მიუღებელი იყო. როგორც ჩანს, ეს დაპირისპირება დღემდე არსებობს და ზოგი მათგანი დღესაც ამბობს, რომ დირექტორის მხრიდან შევიწროებას განიცდიან. მათივე ინფორმაციით, ერთ-ერთმა თანამშრომელმა დირექტორისადმი პროტესტის ნიშნად პირზე „სკოჩი“ აიკრა და სამსახურში ისე გამოცხადდა.
„თანამშრომლებისთვის შეურაცხყოფის მიყენება და მათზე სიტყვიერი ძალადობა სპოტულ ცენტრში უკვე სტანდარტადაა ქცეული. თანამშროლებს სუს-ით აშინებს და სრულ ტერორში ჰყავს. მე ასე მინდა და ასე უნდა იყოს _ ამ პრინციპით აკეთებს ყველაფერს. თუ მაგის თვალი და ყური იქნები და ამბებს მოუტან, მაშინ პრობლემა არაა, მისაღები თანამშრომლი ხარ, თუ არადა მოგჭამა ჭირი. სამსახური კი არა კარცერია. რამდენიმე რჩეული თანამშრომლი ჰყავს, დანარჩენებს კი ათვალწუნებით უყურებს. ვინ საიდან მოიყვანა და დაასაქმა, არავინ იცის. ხელფასებიც პირადი შეხედულებით გაუზარდა ზოგიერთს. ძველი თანამშრომლებიდან ზოგს საერთოდ დაატოვებინა სამსახური, ზოგიც სხვა განყოფილებაში გადაიყვანა, განათლებულ და პროფესიონალ კადრს არ აჩერებს, უვიცებით გავსო იქაურობა“, _ ღიად უპირისპირდება ლომაძეს ცენტრის ყოფილი თანამშრომელი ციური სიხარულიძე, რომელმაც სამსახურიდან წამოსვლის თაობაზე განცხადება, დაახლოებით, ერთი თვის წინ დაწერა. როგორც თავად ჰყვება, ეს გადაწყვეტილება აღელვებულ ნიადაგზე, ლომაძესთან დაახლოებულ ერთ-ერთ თანამშრომელთან სიტყვიერი დაპირისპირების შემდეგ მიიღო. მისივე თქმით, განცხადებაში დეტალურად აღწერა თუ რატომ და ვის გამო მიიღო ეს გადაწყვეტილება.
„ამ ქალბატონმა გარეშე პირის თანდასწრებით მომაყენა სიტყვიერი შეურაცხყოფა. ძალიან უხერხულად და შერცხვენილად ვიგრძენი თავი. მივედი დირექტორთან, ავუხსენი, რაც მოხდა და როგორც, მაგრამ არც არაფერი, ერთი სიტყვაც კი არ უთქვამს მარინა გობრონიძისთვის, რატომ და რისთვის მაკადრა შეურაცხმყოფელი სიტყვები. ამის მერე აღელვებულმა დავწერე განცხადება, სადაც ავხსენი თუ რა და ვინ იყო ამის მიზეზი და რომ გობრონიძესთან მუშაობის გაგრძელება აღარ შემეძლო. იმავე დღეს მოაწერა დირექტორმა ხელი ამ განცხადებას და გამათავისუფლა. არ გაუთვალისწინებია, რომ გადაწყვეტილების მიღების მომენტში აღელვებული ვიყავი და მოსაფიქრებლად დრო მოეცა. ეს ხომ დირექტორის კეთილ ნებაზეა დამოკიდებული, ერთი ხელის მოსმით გამომიშვა. მერე ცენტრის ადვოკატის, ლადო გვარჯალაძისა და სხვა თანამშრომლის თანდასწრებით მითხრა _ შენ ხომ წახვედი სამსახურიდან, ორშაბათიდან მარინა გობრონიძეც არ იმუშავებს აქო. თუმცა ის ქალბატონი დღესაც იქაა და როგორც ვასკვნი, საკმაოდ შეხმატკბილებულადაც არიან, რაღაც მახინაციებსაც ერთად ატრიალებენ ეტყობა. მართალია, სამსახურში ჩემს დაბრუნებაზე ლომაძემ მერე უარი თქვა, თუმცა ახალმიღებული თანამრომელი, რომელსაც ხელფასი ეცოტავა, განცხადება დაწერა და წავიდა, ერთვეში უკან დააბრუნა, ანაზღაურებაც გაუზარდა. მე არც ხელფასის გაზრდა და არც დაწინაურება მომითხოვია, დავებრუნებინე იქ, სადაც წლები ვმუშაობდი. მაგრამ იქ სხვა დანიშნა, მისთვის სასურველი კადრი. აი, ასეთი შერჩევითი სამართალი აქვს ლომაძეს.
სირცხვილზე მეტია ეს კაცი სპორტული ცენტრის დირექტორი იყოს. ლანჩხუთში ყველამ იცის ვინცაა და რასაც წარმოადგენს, ახლა კი მთელ გურიას მინდა გავაგებინო მაგის ამბავი. თუ საჭირო გახდა უფრო ზევითაც წავალ, კი მაქვს მაგის გასაქანი. რა უნდა ამ კაცს სპორტში და ბავშვებთან, პირადი ცხოვრება ვერ მოუწესრიგებია, ყოფილი ზონდერია და თანამშრომლებს ახლაც სუს-ით აშინებს. მოიყვანეს და დასვეს უფროსად. ტერორში ჰყავს თანამშრომლები, ყველაფერს მხოლოდ საკუთარი სურვილის მიხედვით აკეთებს _ არც მერი ვიცი მე და არც საკრებულოს თავმჯდომარე, როგორც მინდა ყველაფერი ისე უნდა გაკეთდესო. ჰოდა, აკეთებს კიდეც ისე, როგორც მოესურვება. თანამშრომლები სპორტის პროფკავშირიდან გამოიყვანა და მერიაში მაგული კუნჭულიასთან გააწევრიანა. თუ ამ კაცის თავგასულობას და თვითნებობას ბოლო არ მოეღება, კარგი ამბავი ნამდვილამ არ მოჰყვება ყველაფერ ამას, ვიღაცას ბოლოს ყელში ამოასხამს მაგის საქციელი და პასუხს აგებინებს სხვანაირად.
არ გაბედოს და თავი არ იმართლოს ჩემ წინაშე ლომაძემ, არაფერი აქვს გასამართლებელი, ვერ დამატერორებს მე ეგ ყოფილი ზონდერი! არ დავრჩენილვარ უმუშევარი, კი დამასაქმეს სხვაგან, რომ დიაბეტიან ქალს წამლის ფული მქონოდა, მადლობელი ვარ ამისთვის ყველასთან, მაგრამ ამ საქმეს არ დავტოვებ ასე“, _ დასძენს ციური სიხარულიძე.
თავად გოჩა ლომაძე „გურია ნიუსთან“ საუბარში ამბობს, რომ ციური სიხარულიძესთან ყოველთვის კარგ ურთიერთობაში იყო და მისთვის გასაკვირია კიდეც მის მიერ გაჟღერებული ბრალდებები და მათ სიცრუედ მიიჩნევს.
„ყოველთვის პატივისცემით ვიყავი მის მიმართ განწყობილი და თბილი ურთერთობა მქონდა. მეც და სხვა თანამრომლებმაც ვთხოვეთ, რომ არ დაეწერა განცხადება და არ წასულიყო სამსახურიდან, მაგრამ დაიჟინა, ვერ ვიმუშავებ მარინა გობრონიძესთან, ვერ ვიტან ამ ადამიანსო. მე ჩვენს ადვოკატთან გავიარე კონსულტაცია და ისე დავაკმაყოფილე მისი განცხადება, კანონის სრული დაცვით. მანამდე კი გავესაუბრე მასაც და მარინა გობრონიძესაც და შევისწავლე მდგომარეობა. არანაირი პირობა არ მიმიცია მისთვის, რომ მარინა გობრონიძესაც გავუშვები სამსახურიდან. რა უფლებით უნდა გამეკეთებინა ეს?! მათი პირადი ურთიერთობები მე არ მაინტერესებს, ჩემთვის კანონი და სამსახურის ინტერესების დაცვაა მთავარი“, _ ამბობს ლომაძე.
გოჩა ლომაძე მას და სპორტული ცენტრის თანამშრომლებს შორის არსებულ რაიმე სახის დაპირისპირების ფაქტსაც გამორიცხავს. იგი არც თანამშრომლის მხრიდან პროტესტის ნიშნად პირის აკვრის ფაქტს ადასტურებს.
„არაფერი მსგავსი არ მომხდარა. ჩემი მიზანია ერთ ოჯახად შევკრა კოლექტივი. 103 თანამშრომელი მყავს და შეიძლება, რამდენიმე უკმაყოფილოა. ოჯახში არ იქნება ერთი აზრი არათუ სამსახურში, მაგრამ არანაირი კონფლიქტური სიტუაცა არ არსებობს ჩვენ შორის და არც პირი აუკრია ვინმეს, ტყუილია ეს! სამსახურში კონფლიქტი და პირადი ინტერესები არ მაინტერესებს, ყველაფერს ვაკეთებ კანონის ფარგლებში. პირადი ინტერესები სამუშაო საათების შემდეგ. ჩვენ, უფროსიც და რიგითი თანამშრომელიც, შინაურულად რომ ვთქვა, ერთ ქვაბში ვიხარშებით. ჩემთვის მთავარი ბავშვების მომავალი, კანონი და წესრიგია. ამისთვის დავდივარ სამსახურში, გასწორებული მაქვს დღე და ღამე, რომ შედეგი მქონდეს. არანაირ დაპირისპირებას ადგილი არ აქვს ჩემსა და რომელიმე თანამშრომელს შორის. თანამშრომლებისგან ვითხოვ მხოლოდ წესრიგს, რომ დილის ცხრა საათზე გამოცხადდნენ სამსახურში, ისარგებლონ კუთვნილი შესვენებით, სამუშაო საათების დამთავრების შემდეგ კი თავისუფლები არიან. კანონის უხეში დარღვევა იქნება, მათ რომ ვუთხრა, როცა გინდათ მაშინ მოდით სამსახურში და როცა გინდა _ წადით-მეთქი. აგერ ტელეფონში მაქვს თანამშრომლების შეტყობინებები, რომ მწერენ შეიძლება 15-20 წუთი დამაგვიანდესო. ჩემი პასუხია _ ერთი საათი იყოს. ყველა ოჯახის შვილები და ადამიანები ვართ და შეიძლება გაუთვალისწინებელი რამ მოხდეს, ამაზე პრობლემა არაა, ყველას გავუგებ ადამიანურადბ და გვერდში დავუდგები. რეალურად ასეცაა, მაგრამ გაცდენებსა და დაგვიანებებს მუდმივი ხასიათი როცა აქვს, ეს ჩემთვის მიუღებელია და ეს სულაც არ ნიშნავს კარცერში ყოფნას და ვინმეზე რაიმე ფორმით ძალადობას. ჩემი საქმიანობა სრულიად გამჭირვალეა და ვისაც რამეში ეჭვი ეპარება, შეუძლია თავად გადაამოწმოს“, _ დასძენს ლომაძე.
გოჩა ლომაძე „გურია ნიუსთან“ საუბარში ადასტურებს, რომ წლების განმავლობაში შსს-ს თანამშრომელი იყო.
„მე ვიყავი შსს -ს თანამშრომელი, ომშიც ვიბრძოდი და თუ საჭირო გახდა, ჩემი სამშობლოს სიყვარულით, მზად ვარ, დღესაც წავიდე საბრძოლველად, _ გვასუხობს ცენტრის დირექტორი.
