მოსწავლის პიროვნული განვითარება, ინოვაციურობა, ინკლუზიურობა, ეროვნული და კულტურულ ფასეულობები_ეს ის ჩამონათვალია, რაზეც პრემიერ-მინისტრის განცხადებით, განათლების რეფორმის განხორციელების შემდეგ საქართველოს სკოლები იქნებიან ორიენტირებულები.
მან ასევე აღნიშნა, რომ მთავრობის ამოცანაა ისეთი ადამიანური კაპიტალის შექმნა, რომელიც ქვეყანას განვითარებული ეკონომიკის მქონე ქვეყნების რიცხვში შეიყვანს.
„21-ე საუკუნეში ვერცერთი სახელმწიფო და ვერცერთი ეკონომიკა ვერ იქნება წარმატებული თუ ის არ ეფუძნება ადამიანური კაპიტალის შექმნას. შესაბამისად, ჩვენი ამოცანაც ეს გახლავთ, რომ რეფორმამ უზრუნველყოს საქართველოში ისეთი ადამიანური კაპიტალის, ისეთი სისტემების შექმნა რომელიც საქართველოს შეიყვანს განვითარებული ეკონომიკის მქონე ქვეყნების რიცხვში“,_განაცხადა ბახტაძემ.
პრემიერ-მინისტრის განცხადებით, რეფორმა 2019 წელს დაიწყება და 2023 წლისთვის 2000-ზე მეტ სკოლაში იქნება განათლების ახალი სისტემა დანერგილი.
„რეფორმირებული სკოლა ორიენტირებული იქნება მოსწავლის პიროვნულ განვითარებაზე, ინოვაციურობაზე, ინკლუზიურობაზე, ეროვნულ და კულტურულ ფასეულობებზე. 2019 წელს დავიწყებთ 50 სკოლით და ეტაპობრივად მოვახდენთ ჩვენს სკოლებში სწავლების ახალი მოდელის დანერგვას , ხოლო 2023 წლისთვის 2000-ზე მეტ სკოლაში სრულად იქნება დანერგილი ეს მოდელი“,_განაცხადა ბახტაძემ და აღნიშნა, რომ _„ჩვენ საქართველოში არ გვსურს ვიხილოთ რამდენიმე პრესტიჟული სკოლა, ყველა სკოლა საქართველოში უნდა იყოს უმაღლესი სტანდარტის“.
ამავე თემაზე: საჯარო სკოლების მასწავლებლის ხელფასი სამჯერ გაიზრდება
