პოლიტიკის მართვა, საზოგადოებრივი ცნობიერების ამაღლება, ნასვამ მდგომარეობაში სატრანსპორტო საშუალების მართვის საწინააღმდეგო კანონები და შესაბამისი ზომები, ალკოჰოლის ხელმისაწვდომობა, ალკოჰოლური სასმელების მარკეტინგი, ალკოჰოლის მოხმარებისა და ალკოჰოლური ინტოქსიკაციების ნეგატიური შედეგების შემცირება, საზოგადოების ჯანმრთელობაზე არალეგალურად წარმოებული ალკოჰოლის გავლენისა და ზემოქმედების შემცირება, ფასების პოლიტიკა, საზოგადოების ინფორმირების და განათლების კამპანიები ალკოჰოლური სასმელების ჯანმრთელობისა და სიცოცხლისთვის საზიანო რისკების შესახებ, ჯანმრთელობის სერვისების პასუხი, მონიტორინგი და ზედამხედველობა _ ეს ის ჩამონათვალია, რაზეც ევროსაბჭოს, ჯანმრთელობის მსოფლიო ორგანიზაციის და პარტნიორი საერთაშორისო ორგანიზაციების მიერ მიღებული ნორმატიული დოკუმენტების ბაზაზე შემუშავებული ეროვნული სტრატეგიაა ფოკუსირებული.
როგორც დოკუმენტშია აღნიშნული, საქართველოში ალკოჰოლის საზიანო მოხმარების შემცირების საკითხი, მნიშვნელოვანი ასპექტია ევროკავშირის ქვეყნებთან ჰარმონიზაციისთვის და ქვეყნის უპირველესი მიზნისთვის, გახდეს ევროკავშირის წევრი.
თუმცა, ევროკავშირს საქართველოს დავალდებულება, რომ ქვეყანამ ალკოჰოლური სასმელი ან მისი რეკლამა აკრძალოს, არ შეუძლია.
ალკოჰოლური სასმლის მოხმარება არაერთ მიზეზს უკავშირდება და ასევე არაერთი დაავადების გამომწვევი მიზეზიც შეუძლია გახდეს. 60-მდე დაავადება, ტრავმები, ინვალიდობა და 2,5 მილიონი სიკვდილის მიზეზი ყოველწლიურად _ ის შედეგია, რასაც ალკოჰოლის ჭარბი მოხმარება იწვევს.
ჩატარებული კვლევის მიხედვით, გამოკითხულ მოსწავლეთა 70%-მა აღნიშნა, რომ სულ ცოტა ერთი ჭიქა ღვინო მაინც დალეული აქვს 13 წლამდე ასაკში.
გავრცელებულ ინფორმაციას, რომლის მიხედვითაც, თამბაქოს მსგავსად ალკოჰოლის მოხმარება, ხელმისაწვდომობა და რეკლამირებაც შეიზღუდება, დაავადებათა კონტროლის ეროვნული ცენტრის არაგადამდებ დაავადებათა დეპარტამენტის ხელმძღვანელი, ლელა სტურუა „გურია ნიუსთან“ საუბარში არ ადასტურებს.
„დაავადებათა კონტროლის ეროვნული ცენტრი არ გეგმავს არანაირი კანონპროექტის ინიცირებას, რომელიც რამენაირად შეზღუდავს ალკოჰოლის მოხმარებას ან გაყიდვას.
მისი თქმით, მნიშვნელოვანია, რომ მოსახლეობა ინფორმირებული იყოს ალკოჰოლის ჭარბი რაოდენობით მიღების მავნებლობასთან დაკავშირებით.
„ყველაზე მნიშვნელოვანია მოხდეს მოსახლეობის განათლება, როგორც ზრდასრულის, ასევე მოზარდი თაობის, რომ ჭარბი რაოდენობით ალკოჰოლის მოხმარება ვნებს ჯანმრთელობას, არა მხოლოდ ფიზიკურს, არამედ ფსიქიკურ ჯანმრთელობას. საქართველოში ალკოჰოლის მოხმარება შედარებადია საშუალო ევროპულ მაჩვენებლებთან. იმისთვის, რომ 16 წლის მოზარდს არ მიყიდონ ალკოჰოლური სასმელი, არსებული კანონი უნდა იყოს ადმინისტრირებული“, _ ამბობს სტურუა.
ამავე თემაზე:
სად რა აკრძალვები არსებობს ალკოჰოლური სასმელის რეკლამასთან დაკავშირებით
