ჩრდილო – აღმოსავლეთ ავსტრალიაში მდებარე უბედურების კონცხი ცნობილია იმით, რომ აქ იზრდება ტროპიკული ტყე, რომელიც დედამიწაზე უძველესად ითვლება. კონცხზე იდეალური ბუნებრივი პირობებია მცენარეების ზრდა-განვითარებისათვის : 27 გრადუსი საშუალო ტემპერატურა და ზომიერი ტენიანობა.
ტყეში ზოგიერთი გვიმრა ხესავით მაღალი იზრდება და შეხედულებით მოზრდილ პალმას მოგვაგონებს. ზოგი მცენარე ხეებზე შემოსკუპებულა და იქ გაუდგამს ფესვები.
დაკიდებული გვიმრები, მათ შორის ეგრეთწოდებული “ირმის რქა”, რომელსაც მრგვალი ფორმა აქვს, ქმნის რეზერვუარს, რომელშიც გროვდება ხიდან ჩამოცვენილი ფოთლები. ეს ფოთლები ქმნის ნეშომპალას, რომელიც გვიმრებისათვის ნიადაგის როლს ასრულებს.
შედარებით დიდი ზომის ასეთ წარმონაქმნებზე კენგურუებს უყვართ წოლა, რადგან ნეშომპალად გარდაქმნის პროცესში გვიმრები სითბოს გამოყოფენ.
ბევრი მცენარე გადარჩენისათვის იბრძვის ამ სიტყვის სრული მნიშვნელობით. მანგრის ტყე-პატარა ეკოსისტემაა დიდი ტყის შიგნით. ამ ხეებს ძლიერი ფესვთა სისტემა აქვთ, რათა ხავსიან ნიადაგზე მყარად დაემაგრონ გრიგალისაგან თავის დასაცავად.
საოცარ სილამაზეს ქმნიან მარაოსებრი პალმები. ისინი თავიანთი ეგზოტიკურობით პრეისტორიულ ხეებს მოგვაგონებენ. ავსტრალიურ ტყეში უამრავ უცნაურ მცენარეს წააწყდებით. ბევრი მათგანი მხოლოდ აქ ხარობს.
