„გურია ნიუსს“ შერიგებისა და სამოქალაქო თანასწორობის საკითხებში ყოფილი სახელმწიფო მინისტრი პაატა ზაქარეიშვილი ესაუბრა.
_ ბატონო პაატა, გაერთიანებულმა ოპოზიციამ „ძალა ერთობაშია“ ხელისუფლებას რამდენიმე ულტიმატუმი წაუყენა, რომელთა შორის რიგგარეშე საპარლამენტო არჩევნების დანიშვნა და საარჩევნო კოდექსის ცვლილებაა. ჩანს, რომ ხელისუფლება ოპოზიციის ამ მოთხოვნებს სერიოზულად არ უყურებს. როგორ ფიქრობთ, დღეს ქვეყანაში რიგგარეშე საპარლამენტო არჩევნების ჩატარებისა და საარჩევნო კოდექსის ცვლილების აუცილებლობა დგას ?
_ ვადამდელი საპარლამენტო აჩევნების ჩატარება აუცილებელი არ არის, მაგრამ მნიშვნელოვანია, სწრაფად შეიცვალოს საარჩევნო სისტემა. მაჟორიტარულმა სისტემამ, ფაქტობრივად, ამორალური სახე მიიღო. ჩანს, რომ ხელისუფლება დაბნეულია და ადეკვატურად ვერ პასუხობს გაერთიანებული ოპოზიციის მოთხოვნებს. თუ „ქართული ოცნება“ დათმობაზე არ წავა და საარჩევნო კოდექსს არ შეცვლის, მიიღებს ისეთ შედეგს, როგორიც თავის დროზე შევარდნაძემ და სააკაშვილმა მიიღეს. მმართველმა პარტიამ კარგად უნდა იცოდეს, რომ ადამიანი, რომელიც არაფერს თმობს, ყველაფერს კარგავს.
„ქართულ ოცნებაში“ უკვე დაიწყო ლაპარაკი იმის შესახებ, რომ თელავში გადაიტანონ პრეზიდენტის ინაუგურაცია, რაც ოპოზიციასთან კაპიტულაციის აღიარებაზე მეტყველებს. ოპოზიციას თავადვე აძლიერებენ და საზოგადოებაში აჩენენ განცდას, რომ ხელისუფლება არსებულ სიტუაციას ვერ აკონტროლებს.
_ არსებობს მოსაზრება, რომ გაერთიანებული ოპოზიცია სალომე ზურაბიშვილის ინაუგურაციის ჩაშლას შეეცდება. აღნიშნულის შესახებ საუბარი მას შემდეგ კიდევ უფრო გააქტიურდა, რაც გაერთიანებული ოპოზიციის ერთ-ერთმა წევრმა ნიკოლოზ მაჭუტაძემ პარლამენტის წინ მიმდინარე აქციაზე განაცხადა: „სალომე ზურაბიშვილი საქართველოს მოქალაქეების წინაშე საპრეზიდენტო ფიცს ვერ დადებს _ ამ სიტყვის მთელი შინაარსით“. გვაქვს საფუძველი ვარაუდის, რომ ოპოზიცია არაკანონიერი გზით, სალომე ზურაბიშვილის ინაუგურაციის ჩაშლას შეეცდება ?
_ინაუგურაციის ჩაშლის არანაირი საშიშროება არ არსებობს. ოპოზიციას არ ჰყავს იმდენი მხარდამჭერი, რომ ქვეყანაში შეუქცევადი რევოლუციის დაიწყება შეძლოს. 800 ათასი ადამიანი არ არის ის ამომრჩეველი, რომელიც „ნაციონალური მოძრაობის“ მომხრეა. ამ ამომრჩეველთა გარკვეულმა ნაწილმა ხმა ბიძინა ივანიშვილის წინააღმდეგ მისცა. ოპოზიციას არ ეგონოს, რომ ეს ადამიანები მათ ქუჩაში გაყვებიან. ვერ ვხედავ რევოლუციის მუხტს, ვხედავ დაძაბულობისა და დაპირისპირების მუხტს.
გაერთიანებული ოპოზიცია თავს გამარჯვებულად გრძნობს და მთელ რესურსს ხარჯავს იმისთვის, რომ სახელმწიფო სტრუქტურების პარალიზება მოახდინოს. „ქართულ ოცნებაში“ კი არ არსებობენ ადამიანები, რომლებსაც არსებული სიტუაციიდან გამოსავლის პოვნა შეუძლიათ. დღეს მმართველ პარტია ძალიან დიდ კრიზისშია.
_ აღნიშნეთ, რომ საპრეზიდენტო არჩევნებში საზოგადოებამ ხმა მისცა არა „ნაციონალურ მოძრაობას“, არამედ საკუთარი არჩევანი ბიძინა ივანიშვილის წინააღმდეგ დააფიქსირა, რაც პოლიტიკურ ასპარაზზე მესამე ძალის გამოჩენის აუცილებლობაზე მიუთითებს. როგორ ფიქრობთ, დღეს მესამე ძალის გამოჩენის პერსპექტივა ჩანს ?
_ ამ წუთში არ ჩანს, მაგრამ ვფიქრობ, ინაუგურაციის შემდეგ “ქართულ ოცნებაში“ რეფორმები დაიწყება და შეიძლება, მმართველი პარტია დაიშალოს კიდეც, რომელსაც მეტ–ნაკლებად ჯანსაღი ძალა გამოეყოფა _ ისე, როგორც მოუვიდა მოქალაქეთა კავშირს, როცა მას ჟვანიას, ბურჯანაძისა და სააკაშვილის გუნდი გამოეყო. ყველაზე რეალური ძალა „ქართული ოცნების“ წიაღში იმყოფება, რომელშიც შესაძლებელია მოიაზრებოდეს კალაძისა და ღარიბაშვილის ხალხის ერთობა.
_მმართველი პარტია რომ დაიშალოს, „ქართული ოცნების“ წევრებს ერთმანეთის მიმართ სულ მცირე უკმაყოფილების გრძნობა უნდა გააჩნდეთ, რაზეც ამ ეტაპზე მმართველი პარტიის წევრები გარეთ არ საუბრობენ. როგორ ფიქრობთ, პარტიის შიგნით გუნდის ჩამოშლის პროცესი უკვე დაწყებულია?
_ რა თქმა უნდა, გუნდის დაშლის პროცესი უკვე დაწყებულია. უკმაყოფილება რომ არ ყოფილიყო, ივანიშვილი პოლიტიკაში არ დაბრუნდებოდა. ივანიშვილის დაბრუნებით აღიარება მოხდა იმისა, რომ გუნდში ნამდვილად ბევრი პრობლემაა. მეორე, ბიძინა ივანიშვილმა საპრეზიდენტო კანდიდატად სალომე ზურაბიშვილის დასახელებით გუნდში არავის მოთხოვნები დააკმაყოფილა, ამიტომ გარედან იპოვა კანდიდატი, რაც ცუდად შემოუბრუნდა.
ამ ფონზე, მგონია, რომ ივანიშვილმა „ქართულ ოცნებას“ გუნდის დაშლის ნება უნდა მისცეს. პოლიტიკურ ასპარეზზე ჯანსაღი ძალები უნდა წამოვიდნენ, რომლებიც გაკრეფილ ძალებთანაც კი მოახერხებენ საერთო ენის გამონახვას.
