ლანჩხუთში საკრებულოს რიგგარეშე სხდომას, რომელსაც დეპუტატთა თითქმის განახევრებული შემადგენლობა ესწრებოდა, ხმაურის გარეშე არ ჩაუვლია. საკრებულოს წევრებს შორის კამათი მოჰყვა 2019 წელს განსახორციელებელ ინფრასტრუქტურული პროექტების მოწონებასთან დაკავშირებით საკითხზე მსჯელობას.
მერიის მიერ წარმოდგენილი დოკუმენტაციის მიხედვით იგეგმება შიდა გზების რეაბილიტაცია-მოასფალტება, რკინა-ბეტონის სანიაღვრე არხების მოწყობა, სოფლების შიდა გზების განათება, წყალმომარაგების ქსელის მოწყობა, ლანჩხუთში 3 სტადიონის მოწყობა-რეაბილიტაცია, ლესასა და ნინოშვილში ამბულატორიის რეაბილიტაცია, ლანჩხუთის მუნიციპალიტეტში ბავშვთა საფეხბურთო სკოლის ეზოს ინფრასტრუქტურის მოწესრიგება და ინვენტარის შეძენა, ნიგვზიანის ადმინისტრაციულ ერთეულში ეგნატე ნინოშვილის სახლ მუზეუმთან მისასვლელი გზის აღდგენა და ნინოშვილის სახლ-მუზეუმის რეაბილიტაცია, ქალაქის ადმნისტრაციულ ერთეულში საფეხმავლო ბილიკების მოწყობა და გარე განათების რეაბილიტაცია, მხარეთმცოდნეობის მუზეუმის შემოღობვა, სკოლების რეაბილიტაცია, მამათის ადმინისტრაციულ ერთეულში მდინარე სუფსაზე საფეხმავლო ხიდის რეაბილიტაცია. პროექტების განსახორციელებლად 10 485 080 ლარი დაიხარჯება.
სხდომაზე ჩიბათის მაჟორიტარის, გიორგი ჩახვაძის გულისწყრომა დაიმსახურა, რომ ზემონახსენებ ინფრასტრუქტურული პროექტების ნუსხაში ვერ აღმოაჩინა ჩიბათის სტადიონი.
„წავიკითხე ამ პროექტებში და მივესალმები, რომ საუბარია ქალაქში არსებულ ხელოვნურსაფარიან მოედნების მოწესრიგებაზე. ამას რა ჯობია, მარა ოთხი წელია ვსაუბრობ ჩიბათის სტადიონზე. მომეხმარეთ რაღაც, დამასრულებინეთ ეს საქმე. სანამდე უნდა ვიძახო, მომეხმარეთ-მეთქი?!“- ცხარობდა ჩახვაძე, თუმცა ისევ კოლეგებმა დაამშვიდეს, სოფლის პროგრამები ბრუნდება და მაშინ ეშველება ჩიბათის სტადიონსო.
საპროექტო დოკუმენტაციისა და საექსპერტო მომსახურების შესყიდვისთვის დამატებით 38 ათასი ლარის გამოყოფის საკითხზე მსჯელობამაც ვერ ჩაიარა მთლად მშვიდ ვითარებაში. აცანის მაჟორიტარის, ემზარ თედორაძის მოსაზრებით ამ ფუნქციის შეფავსება მერიის ზედამხედველობის სამსახურისთვისაც ადვილი შესაძლებელია -„ზედამხედველობის სამსახური გვყავს და იმან გაწიოს ეს შემოწმება. ახლა სტიქიაზე ფული რომ გამოიყო, ადამიანები ისეთ დღეში ჩააგდეს, მოგების ნაცვლად ვალი დარჩებათ. ამ 38 ათასი ლარით საქმე გაკეთდებოდა, სამი სახლი მაინც გადაიხურებოდა“.
თედორაძეს ხმა იურიდიული კომისიის თავმჯდომარემ ვერიკო კვირკველიამაც შეაწია და საკითხთან დაკავშირებით ხელშეკრულების გადახედვის აუცილებლობაზე გააკეთა აქცენტი: „დავიბაროთ ე ხალხი და ვნახოთ რასთან გვაქვს საქმე . ჩვენ გვქონდა მათთვის თანხა გამოყოფილი, ახლა კი ვიგებთ რომ კიდევაა დამატებით საჭირო. მართლაც სამი სახლის გადახურვას შევძლებდით ამ ფულით. ვფიქრობ ყველა დამეთანხმება, რომ ხელშეკრულება გადასახედია.“
წყლის რეაბილიტაციის პროგრამაზე მსჯელობასაც არ ჩაუვლია დებატების გარეშე. გაირკვა, რომ ამ მხრივ ლესისა და ჯურუყვეთის ადმინისტრაციულ ერთეულებში 300 ათასი ლარის გახარჯვაა გათვალისწინებული.
როგორც მერიის ინფრასტრუქტურის სამსახურის უფროსმა, ლევან ჩხაიძემ აღნიშნა, მიმდინარე წელს ლესაში წყლის მილები გამოიცვალა და პროექტის გაგრძელება მომავალ წელსაც გრძელდება: „აქ 300 ათასი ლარი პირობითადაა აღნიშნული, შეიძლება მეტიც გამოიყოს. ლესაში პრობლემის მოგვარება დავიწყეთ, თანხა დაიხარჯა და შედეგიც არის. გამოიცვალა მილები და მოსახლეობას აქვს წყალი“.
თუმცა, ჩხაიძის ეს პათოსი ვერ გაიზიარა სოფლის მაჟორიტარმა ელისო ჭიჭინაძემ -„თქვენ ამბობთ, რომ მილები გაკეთდაო, რომ გაფუჭდა ამის შესახებ თუ იცით?! 100 ათასი ლარი დაიხარჯა სოფელში წყლის პრობლემის მოგვარებისთვის, მაგრამ მითხარით რამდენი პროცენტით გაუმჯობესდა მოსახლეობისთვის წყლის მიწოდება, რამდენით?! გეკითხებით ერთით, ხუთით თუ მეტით?! პასუხი არ გაქვთ“.
სამსახურის უფროსმა დეპუტატის წინაშე თავი იმით იმართლა, მილები ავტომობილების მიერ დაზიანდა და მისი შეკეთებაც მოკლე დროში მოხდაო.
სხდომაზე დეპუტატებმა შენიშვნა გამოთქვეს, რომ ქალაქის გალამაზების პარალელურად სოფლის ცენტრების კეთილმოწყობასაც მიექცეს ყურადღება. თუმცა დეპუტატთა ამ ოცნებას მერმა ალექსანდრე სარიშვილმა ცივი წყალი გადაასხა: „მესმის თქვენი და ამის საშუალება რომ იყოს, რა ჯობია. ქალაქის ცენტრი კი უნდა გავალამაზოთ. გვინდა შუხუთის საზღვრიდან გვიმბალაურამდე, გზის ორივე მხარეს გაკეთდეს ბილიკები და გამწვანება, რომ ადამიანებმა იგრძნონ სად ცხოვრობენ”.
