გრიპის ვირუსის სხვადასხვა სახეობა მსოფლიო ქვეყნებში, წელიწადის ცივ სეზონზე ვრცელდება, რის გამოც მოსახლეობის დიდი ნაწილი მიიჩნევს, რომ ის სეზონურია და საგანგაშო გაციებაში არაფერი არ არის.
თუმცა, ყოველ წელს გრიპის ვირუსი ათასობით ადამიანის დაღუპვის მიზეზი ხდება.
ჯანდაცვის მსოფლიო ორგანიზაციის ინფორმაციით, გრიპი არის განვითარებადი დაავადება, ამიტომ მუშაობა პრევენციისთვის, მზადყოფნისა და რეაგირებისთვის მუდმივად უნდა მიმდინარეობდეს, მაგრამ მსოფლიო ქვეყნების ნახევარზე ნაკლებს აქვს პანდემიასთან ბრძოლის ეროვნული გეგმა, იმდენად რამდენადაც, მათი გეგმები განახლდა 2009 წელს მიღებული გაკვეთილების საფუძველზე.
გრიპის ვირუსისგან თავდაცვის ერთ-ერთი ეფექტური გზა ვაქცინის გაკეთებაა, თუმცა, WHO-ს ინფორმაციით, ვაქცინის შესახებ შემდეგი მითებია გავრცელებული:
მითი 1. გრიპი არ არის სერიოზული, ამიტომ არ მჭირდება ვაქცინა.
ფაქტი: წელიწადში 650 000 ადამიანი გრიპით იღუპება. ეს მხოლოდ რესპირატორული სიკვდილია, ამიტომ ზემოქმედება სავარაუდოდ გაცილებით მაღალია. გრიპი შესაძლოა ჯანმრთელ ადამიანებსაც დაემართოს, თუმცა, განსაკუთრებით იმ ადამიანებს, ვისი იმუნური სისტემაც დაუცველია.
გრიპის შეხვედრის შემდეგ ადამიანების უმრავლესობა რამდენიმე კვირაში ჯანმრთელდება, თუმცა, ზოგს შესაძლოა გართულებები განუვითარდეს, როგორიცაა, ყურის ინფექცია, პნევმონია.
მითი 2. ვაქცინას შეუძლია გრიპი შემყაროს
ფაქტი: გრიპის საწინააღმდეგო ვაქცინა შეიცავს ინაქტივირებულ ვირუსს, რომელსაც არ შეუძლია გრიპის გამოწვევა. გარდა ამისა, ვაქცინის გაკეთების შემდეგ თუ იგრძნობთ სისუსტეს, უმნიშვნელო ციებ-ცხელებას, ეს არის იმუნური სისტემის ნორმალური რეაქცია ვაქცინაზე და გრძელდება 1-2 დღე.
მითი 3. გრიპის საწინააღმდეგო ვაქცინას გვერდითი ეფექტები აქვს
ფაქტი: გრიპის საწინააღმდეგო ვაქცინა უსაფრთხოა. გვერდითი მოვლენები ძალიან იშვიათია. მილიონ ადამიანში ერთს შეიძლება დაემართოს გილიან-ბარეს სინდრომი, რაც იწვევს კუნთების სისუსტეს და დამბლას.
მითი 4. ვაქცინის გაკეთება უშედეგოა, რადგან გავიკეთე, მაგრამ მაინც შემხვდა გრიპი
ფაქტი: ყველა დროს გრიპის რამდენიმე ვირუსი ცირკულირებს, შესაბამისად, ვაქცინა გაკეთებული ადამიანსაც შეიძლება შეხვდეს გრიპი, რადგან ვაქცინა სპეციფიკურია ერთ შტამზე. გრიპის საწინააღმდეგო ვაქცინის გაკეთება განსაკუთრებით მნიშვნელოვანია დაუცველი იმუნური სისტემის მქონე ადამიანებისთვის, რომ შეწყდეს ვირუსის გავლენა.
მითი 5. ორსულად ვარ და გრიპის საწინააღმდეგო ვაქცინის გაკეთება არ შეიძლება
ფაქტი: ორსულმა ქალებმა განსაკუთრებით უნდა გაიკეთონ გრიპის საწინააღმდეგო ვაქცინა, რადგან მათი იმუნური სისტემა სუსტდება. გრიპის ვაქცინა ორსულობის ნებისმიერ ეტაპზე უსაფრთხოა.
