წინწყაროში მდებარე საბავშვო ბაღს, რომელშიც 97 აღსაზრდელი დადის, წყალი 2 დღეში ერთხელ 4-5 საათით მიეწოდება.
შენობაში, სადაც ბავშვებისთვის 4 ოთახია განსაზღვრული, საძინებელი არ არის.
აღნიშნულ საბავშვო ბაღში 97 სხვადასხვა ასაკის ბავშვი დადის, რომლებიც 3-დან 4 წლამდე, 4-5 წლამდე და 5-6 წლამდე ჯგუფებში არიან გადანაწილებულები. გამსვლელ ჯგუფში 31 ბავშვია, დანარჩენ ჯგუფებში კი მათი რაოდენობა 26-ს არ სცდება.
როგორც წინწყაროს ბაღის უფროსი მასწავლებელი, ფიქრია მეშველიანი ამბობს, ბაღი შენობაში 2 წელია ქირით არის განთავსებული. შენობაში გადასვლის დღიდან კი 2 დღეში ერთელ წამოსული წყლის შესაგროვებლად რკინის რეზერვუარს იყენებდნენ.
„ბაღი ცენტრში მდებარეობდა, მაგრამ შენობა ავარიული იყო და ქირით გადმოვედით უკვე 2 წელია. ძველ შენობასთან შედარებით აქ უკეთესი პირობებია. პრობლემას წარმოადგენდა რკინის რეზერვუარი,რომელშიც წყალს ვაგროვებდით. რეგულარულად ვწმენდდით, რომ წყალი დაჟანგული, ფერშეცვლილი არ ყოფილიყო“,_ამბობს მეშველიანი.
მისივე თქმით, Wash-ის პროექტის ფარგლებში რკინის რეზერვუარი პლასტმასის ავზით შეცვალეს და უსაფრთხოების მიზნით სპეციალური ფილტრიც დაუყენეს. წყალი კი, რომელსაც რეზერვუარში ორ დღეში ერთხელ აგროვებენ, ჰყოფნით.
„ახლა ტექნიკური მოხმარებისთვის ვიყენებთ რკინის რეზერვუარს, ხოლო სამზარეულოსთვის და დასალევად ახალ რეზერვუარს“,_ამბობს ის.
ცნობისთვის, WASH ზოგადი ტერმინია და აერთიანებს წყალმომარაგებას, სანიტარიას და ჰიგიენას. აღნიშნულ საკითხებთან დაკავშირებული პრობლემების გამოსავლენად და აღმოსაფხვრელად ქვეყანაში ამ დროისთვის 7 Wash საბჭოა შექმნილი, საიდანაც 4 ქვემო ქართლში, 3 კი კახეთში ფუნქციონირებს.
ქვემო ქართლში კავკასიის გარემოს დაცვითი არასამთავრობო ორგანიზაციების ქსელის (CENN) მიმდინარე პროექტის „Georgia Community WASH Initiative (GC-WASH)“ ფარგლებში, რომელსაც Global Water Challenge აფინანსებს, ჩატარებული მონიტორინგის შედეგად, CENN-ის კოორდინატორის, მარიკო წიქორიძის თქმით, სოფელში სასმელი წყლის და წყლის ხარისხის პრობლემა გამოვლინდა.
„ბაღში აბსოლუტურად შეიცვალა სასმელი წყლის სისტემა. დაიდგა ახალი ავზი თავის ფილტრით, იმიტომ რომ თვითონ სოფელში იდგა პრობლემა სასმელი წყლისაც და სასმელი წყლის ხარისხისაც. არ მიეწოდებოდათ წყალი და როცა მიეწოდებოდათ ხარისხით არ შეესაბამებოდა ნორმებს და ეს პრობლემა აღმოვფხვერით“,_ამბობს წიქორიძე.
წინწყაროს საბავშვო ბაღის უფროსი მასწავლებელი ამბობს, 2020 წლის ბოლოსთვის ახალი ბაღი უნდა აშენდეს, სადაც ნაქირავები შენობიდან გადავლენ.
რაც შეეხება სოფელში მდგარ წყლის პრობლემას, ადგილობრივი ხელისუფლების განცხადებით, არის დაგეგმილი მუნიციპალური პროექტი, რომელიც მიზნად ისახავს წინწყაროსთვის მთლიანად წყლი მიმწოდებელი ქსელის მოწესრიგებას.
