„ანაკლიის პორტზე კონტროლის მოპოვება ბიძინა ივანიშვილთან დაახლოებულ კომპანიას სურს და დიდი ალბათობით, „ქართული ოცნების“ ლიდერის სურვილი ანაკლიის პორტის მისაკუთრებაა“, _ აღნიშნა „გურია ნიუსთან“ პოლიტიკის ექსპერტმა ნიკა ჩიტაძემ.
მისივე თქმით, ეროვნული ბანკის პრეზიდენტი კობა გვენეტაძე ბიძინა ივანიშვილის მხრიდან ზეწონლას განიცდის.
_ ბატონო ნიკა, პარლამენტში „თიბისი ბანიკის“ თამფუძნებელ მამუკა ხაზარაძესა და მის მოადგილე ბადრი ჯაფარიძეს სიტყვით გამოსვლის საშუალება არ მისცეს. არსებობს ვარაუდი, რომ კომიტეტის სხდომა, სადაც დეპუტატებს „თიბისი ბანკთან“ დაკავშირებით ეროვნული ბანკის პრეზიდენტისთვისაც უნდა მოესმინათ, ბიძინა ივანიშვილის მითითებით ჩაიშალა. ამ ფონზე ჩნდება განცდა, რომ „თიბისი ბანკის“ დამფუძნებლებთან მიმდინარე სამართლებრივი დავა პოლიტიკურად მოტივირებულია?
_ საპარლამენტო უმრავლესობის წევრებმა კომიტეტის სხდომაზე არ მოინდომეს, რომ „თიბისი ბანკის“ დამფუძნებლებისგან სიმართლე მოესმინათ და საფუძვლიანი ეჭვი არსებობს იმის შესახებ, რომ ეროვნული ბანკის პრეზიდენტი და თავად ხელისუფლება ბიძინა ივანიშვილის მხრიდან განიცდიან ზეწოლას. ივანიშვილის მიზანი „თიბისი ბანკის“ ხელში ჩაგდებას უკავშირდება. ასევე, როგორც ცნობილია, ანაკლიის პორტზე კონტროლის მოპოვება ბიძინა ივანიშვილთან დაახლოებულ კომპანიას სურს და დიდი ალბათობით, „ქართული ოცნების“ ლიდერის სურვილი ანაკლიის პორტის მისაკუთრებაც არის.
_“თიბისი ბანკის“ დამფუძნებელმა მამუკა ხაზარაძემ საჯაროდ აღიარა, რომ ორკესტრირებული შეტევის მსხვერპლია და ბანკი იძულებით დატოვა, თუმცა ხაზარაძეს პირადად ბიძინა ივანიშვილზე იერიში არ მიუტანია. „თიბისის“ დამფუძნებელი, რატომ იკავებს თავს ორკესტრირებული შეტევის უკან მდგარი პირების სახელები და გვარები დაასახელოს?
_ მამუკა ხაზარაძე აცნობიერებს, რომ მისი მომავლისა და ანაკლიის პორტის საკითხი ბიძინა ივანიშვილზეა დამოკიდებული და ბუნებრივია, რომ ის კონკრეტულ პიროვნებებზე, ჯერჯერობით, არ საუბრობს. ხაზარაძეს ამჟამად სურს, რომ ბიძინა ივანიშვილთან ხიდი არ დაწვას. მან კარგად იცის, რომ გარკვეულ საქმეებს არა ეროვნული ბანკის პრეზიდენტი და მაგალითად, საქართველოს პარლამენტი, არამედ ბიძინა ივანიშვილი წყვეტს, შესაბამისად, ამ ეტაპზე მისი მოქმედება მოზომილია.
_“ქართული ოცნებიდან“ წასული დეპუტატი ეკა ბესელია ხელისუფლების სისტემებში არსებულ პრობლემებზე თამამად ალაპარაკდა. მაგალითად, დეპუტატი არ ერიდება თქვას, რომ ქვეყანაში შერჩევითი სამართალია. როგორ ფიქრობთ, ბესელია პოლიტიკაში საკუთარი ინტერესებისთვის იბრძვის თუ მისი პოლიტიკური მოღვაწეობა საზოგადოებრივ კეთილდღეობაზე ზრუნვას უკავშირდება?
_ ეკა ბესელიამ სასამართლო სისტემაში არსებული ვითარება მაშინ რატომ არ გააპროტესტა, როცა ლევან მურუსიძე იუსტიციის უმაღლესი საბჭოს მდივნის თანამდებობაზე დაინიშნა?! ჩანს, რომ აღნიშნული დეპუტატი საკუთარი ინტერესებიდან გამომდინარე მოქმედებს, რაც მრავალჯერ დადასტურდა. ეკა ბესელიას კომიტეტიდან წასვლა უმრავლესობაში გადაწყვეტილი იყო და იმისთვის, რომ წარმოჩენილიყო, როგორც მსხვერპლი, მოვლენებს დაასწრო და თანამდებობა თავად დატოვა. რაც შეეხება ფრაქციას, რომელსაც ეკა ბესელია ქმნის, ვფიქრობ, რომ მისი პოლიტიკური ძალა ანგარიშგასაწევი ვერ იქნება. ეს ჯგუფი კვლავ ბიძინა ივანიშვილის გავლენის ქვეშ იქნება მოქცეული, როცა ივანიშვილს დასჭირდება მათ მოუხმობს და მისვლაზე არც ისინი იტყვიან უარს.
_ დეპუტატების ნაწილი პარლამენტის თავმჯდომარეს, რომელიც ოდიოზურ მოსამართლეებს ექომაგება, ეკა ბესელიას თანამოაზრეებს კი „ნაციონალურ მოძრაობასთან“ აიგივებს და საპარლამენტო მუშაობას უწუნებს. ამ ფონზე, გამორიცხული არ არის, რომ პარლამენტმა ირაკლი კობახიძის იმპიჩმენტის საკითხი დღის წესრიგში დააყენოს. შექმნილ პოლიტიკურ კონიუნქტურას პარლამენტის თავმჯდომარის გადაყენება გამოასწორებს?
_ ირაკლი კობახიძე, ბუნებრივია, საპარლამენტო საქმიანობას კარად ვერ უძღვება, მაგრამ პროცესების გაჯანსაღების მიზნით, მმართველობითი სისტემა უნდა გამოიცვალოს. როდესაც ქვეყანაში არ არსებობს კანონის უზენაესობა, პარლამენტში ირაკლი კობახიძისნაირ ხალხს, ხოლო სასამართლოებში მურუსიძე-ჩინჩალაძეს მივიღებთ. ფაქტია, რომ არაფორმალური მმართველობის პირობებში პროგრესულად მოაზროვნე პერსონალიები ბიძინა ივანიშვილის გავლენის ქვეშ ექცევიან. სანამ ქვეყანაში დემოკრატიული მმართველობა არ დამყარდება, რომლის მთავარი სიმბოლო კანონის უზენაესობაა, ქვეყანაში არსებული პრობლემები ვერ გამოსწორდება.
