„ქვეყანა არ ნადგურდება, მაგრამ ბევრ სეგმენტში საგანგაშო მდგომარეობა გვაქვს“_ პაპუაშვილი

„ქვეყანაში არსებული მთელი რესურსი იმ უცნაური ადამიანების ხელში აღმოჩნდა, რომლებმაც ცხვირწინ მოსახლეობას სიცრუით, შანტაჟითა და ათასი ხრიკებით არსებობის საშუალება ააცალეს. არ ვლაპარაკობ, რომ ქვეყანა დაღუპვის პირასაა და ნადგურდება, მაგრამ ბევრ სეგმენტში საგანგაშო მდგომარეობა გვაქვს“, _ აღნიშნა „გურია ნიუსთან“ ქართული ოცნების“ დეპუტატმა ზაზა პაპუაშვილმა.

პაპუაშვილს ფარული ჩანაწერების გამოძიებასთან, „ქართული ოცნების“ მიერ განხორციელებულ რეფომებთან და მაღალი თანამდებობის პირების რეკომენდატორებთან კითხვები აქვს: „ჩემთვის ყოველთვის გაუგონარ კითხვის ნიშნებს ტოვებს თუ როგორ მიდის ამა თუ იმ რეფორმის ეფექტურობა და ვინ არის იმ კადრების რეკომენდატორი, რომელებიც მაღალ თანამდებობებზე ინიშნებიან“.

_ ბატონო ზაზა, „ქართული ოცნების“ მმართველობის პირობებში ეკა ბესელიას ფარული ჩანაწერების გავრცელების მორიგ ფაქტზე სამართალდამცავ უწყებას დანაშაულის დამკვეთები, ჯერჯერობით, არ გამოუვლენია. ეს და სხვა ფაქტები მეტყველებს იმაზე, რომ მორალური ტერორის აღსაკვეთად და დამკვეთების გამოსავლენად გამოძიება არაეფქტურია ან გულგრილობას იჩენს. როგორ ფიქრობთ, რატომ? და ასევე, ადამიანები პირადი ცხოვრების  ხელშეუხებლობისგან დაუცველები რატომ არ არიან?

_ “ნაციონალური მოძრაობის“ მიერ გაკეთებული ფარული ჩანაწერები ტექნოლოგიების დონეზე „ქართულმა ოცნებამ“ გადმოიბარა, რაც ავადმყოფური მემკვიდრეობაა. ჩემთვის გაუგებარია ადამიანებს რატომ სიამოვნებთ და ერთობიან  სხვისი ფარული ჩანაწერების მოპოვებითა და გავრცელებით, ეს  ამაზრზენია. რაც შეეხება გამოძიებას, სიმართლე გითხრათ, მეც გაოცებული ვარ. ჩემთვის გაუგებარია, რატომ ვერ იხსნება აღნიშნული ტიპის საქმეები. ამ შემთხვევაში, ვიღაცაზე ხელის გაშვერა უარეს შედეგს მოგვიტანს და ვწუხვარ, რომ ასეთ მნიშვნელოვან და სენსიტიურ საკითხზე ბანალური საუბარი გვიწვეს. საგამოძიებო უწყებებმა ყველაფერი უნდა გააკეთონ იმისთვის, რომ ამგვარი საქმეები გახსნილი იყოს.   

_“ქართული ოცნებიდან“ დემარშიც წასული დეპუტატის, გედევან ფოფხაძის ინფორმაციის მიხედვით, პარლამენტის თავმჯდომარე ირაკლი კობახიძე ბიძინა ივანიშვილს სხვა დეპუტატებთან ერთად, თქვენს გარიცხვასაც სთხოვდა. ახლა, როცა აღნიშნული ფაქტის შესახებ ინფორმაცია საჯაროა. პარტიიდან წასვლას საკუთარი ნებით ხომ არ აპირებთ?

_ აღნიშნულზე ბევრი ვიფიქრე და გადავწყვიტე, რომ „ქართულ ოცნებაში“ დავრჩე. ბევრ ცვლილებას ველოდები და ვფიქრობ, რომ ივანიშვილთან რამდენჯერმე გამართული შეხვედრა და პოლიტიკაში ირაკლი ღარიბაშვილის დაბრუნება დადებით შედეგს მოიტანს. პირდაპირ გეტყვით, ზოგმა ადამიანმა, ნებით თუ უნებლიედ, პარტია დააზარალა და „ქართული ოცნების“ იმედები ვერ გაამართლა. პარტიაში ბევრ გაუგებრობას ვხედავ, მაგრამ იმ შემთხვევაში, „ქართული ოცნებიდან“ ყველა გავედით და თითო-თითო აგური ჩამოვანგრიეთ, რა გამოვა?! მხოლოდ ოპოზიციას მიეცემა სეირის ყურების საშუალება. დარწმუნებული ვარ, 2020 წლამდე ისეთი ცვლილებები განხორციელდება, რომელიც საზოგადოებისთვის მისაღები იქნება.  

_იმის მიუხედავად, რომ ცვლილებებს _ „აღმავლობასა და აღმშენებლობას“  მმართველი პარტია 2012 წელსაც აანონსებდა, ფაქტია, რომ დღეს ქვეყანაში მძიმე სოციალურ-ეკონომიკური ვითარებაა. ქვეყანაში ერთეულები მდიდრდებიან, ხოლო საშუალო ფენა ღარიბდება. ამ ფონზე, ამომრჩეველმა 2020 წელს, რატომ უნდა მისცეს შანსი „ქართულ ოცნებას“ და ალტერნატივა სხვა პარტიაში რატომ არ უნდა ეძებოს?

_ ამ სულისკვეთებაში გეთანხმებით. არ ვაპირებ ისეთი რამის „გაპრავებას“, რაც  თავადაც არ მომწონს. ის, რაც „ქართული ოცნების“ პირობებში გაკეთდა, ხალხისთვის საკმარისი არ არის. მთავარი ვერ შევძელით, ადამიანები გაჭირვებისგან ვერ ვიხსენით. აღნიშნული პრობლემა დღეს და გუშინ არ დაწყებულა. ზოგადად, გაჭირვება პოსტსაბჭოთა ქვეყნების სენია. ამ დროის განმავლობაში კარგად ვხედავდით, ვინ ეუფლებოდა საწარმოებს, როგორ ხდებოდა მიწების პრივატიზება და ვინ შოულობდა ფულს. დიდი ხნის წინ ადამიანების უმრავლესობამ ჩაიგდო ქვეყნის სადავეები ხელში. მთელი რესურსი იმ უცნაური ადამიანების ხელში აღმოჩნდა, რომლებმაც ცხვირწინ მოსახლეობას  სიცრუით, შანტაჟითა და ათასი ხრიკებით არსებობის საშუალება ააცალეს. არ ვლაპარაკობ, რომ ქვეყანა დაღუპვის პირასაა და ნადგურდება, მაგრამ ბევრ სეგმენტში საგანგაშო მდგომარეობა გვაქვს.

_ საზოგადოებას კითხვები აქვს _ ხელისუფლების სათავეში საიდან და რატომ მოდიან ისეთი ადამიანები, რომელთაც არც შესაბამისი კვალიფიკაცია აქვთ და არც საზოგადოების ნდობა და მხარდაჭერა გააჩნიათ? პარალელურად ვხედავთ საკანონმდებლო ორგანოს მიერ მიღებულ რეფორმებს, რომელიც არაეფექტურია. მაგალითად, საპენსიო რეფორმა და საბანკო რეგულაცია, რომლებმაც საზოგადოების დიდი ნაწილი უკვე აზარალა.  აღნიშნულზე რა პასუხი გაქვთ?

_ გეთანხმებით. ჩემთვის ყოველთვის გაუგონარ კითხვის ნიშნებს ტოვებს თუ როგორ მიდის ამა თუ იმ რეფორმის ეფექტურობა და ვინ არის იმ კადრების რეკომენდატორი, რომლებიც მაღალ თანამდებობებზე ინიშნებიან. გარკვეულ ადამიანებს  ნდობას ვუცხადებთ და ამ ნდობის თავიდან აცილების ტენდენციებს ვხედავთ. ზოგიერთი ადამიანის მიერ წარმართულმა საქმიანობამ სიტუაცია ისე შემოაბრუნა, რომ ყველაფერი ცუდი ბიძინა ივანიშვილს ბრალდება. დიახ, მეც მაქვს კითხვები კადრებთან და რეფორმებთან დაკავშირებით.

_ საზოგადოება პარლამენტის თავმჯდომარედ ხედავს ადამიანს, რომელიც წინა ხელისუფლების მიერ მორჩილ მოსამართლეებს ლობირებს და პარლამენტში კონკრეტული ჯგუფის თანამოაზრედ არის მიჩნეული. აღნიშნული საზოგადოებისა და სახელმწიფო ინტერესებს არ აზარალებს?

_ 2020 წლის საპარლამენტო არჩევნებამდე დიდი დრო არ რჩება. ქვეყანა ისტერიის გარეშე არჩევნებამდე უნდა მივიდეს. ვფიქრობ, რომ 2020 წელს საპარლამენტო კონფიგურაცია მნიშვნელოვნად შეიცვლება. შესაძლოა, შედეგი ბევრი პიროვნებისთვის შედეგი მტკივნეული იყოს. ჩვენ მოვიქცევით ისე, როგორც საზოგადოება გვკარნახობს. “ქართულ ოცნებას“ ერთადერთი ოპოზიციური ძალა ჰყავს _ მოსახლეობა. სხვას ვერაფერს დავამატებ.