31 მაისს კლინტ ისთვუდი 89 წლის გახდება.
ეს უნიჭიერესი ხელოვანი სიცოცხლეშივე იქცა ლეგენდად. იგი ნაღდი ეროვნული გმირია და ამერიკული კულტურის ისეთივე განუყოფელ ნაწილს წარმოადგენს, როგორც მიკი მაუსი, ქაუბოი ან ბაფალო ბილი. საკუთარ კულტურას კი გაფრთხილება უნდა, რასაც ამერიკელები, ჩვენგან განსხვავებით ,,ხუთიანზე” აკეთებენ და ეს არაერთხელ დაამტკიცეს.
ორმოცდაათი წლის წინათ ჰოლივუდში მყოფმა სოფი ლორენმა მოითხოვა შეხვედრა ყველაზე ცნობილ ამერიკელ მსახიობთან. როდესაც სტუდიის მესვეურებმა შეიტყვეს, რომ ეს ცნობილი მსახიობი კლინტ ისთვუდია, ყურებს არ დაუჯერეს, რადგან ვერ წარმოედგინათ სატელევიზიო სერიალის მსახიობი იმ კინოვარსკვლავად, რომელთან შეხვედრა თვით სოფი ლორენს რომ სურდა. თუ იმდროინდელი ამერიკული აუდიტორია ისთვუდს თითქმის არ იცნობდა, მთელი იტალია და ევროპა სერჯო ლეონეს სპაგეტი_ვესთერნის წყალობით გადარეული იყო ისთვუდზე, ილ სიგარილო _ ასე ეძახდნენ მსახიობს, რადგან მის გმირს პირში მუდმივად სიგარა ჰქონდა გარჭობილი. კრიტიკოსებმა ისთვუდის გმირს “უსახელო მამაკაცი” შეარქვეს, თუმცა დოლარის ტრილოგიის სამივე ფილმში მას სახელი ჰქონდა _ ჯო, მანქო და ბლონდი. უსახელო მამაკაცი ერთ-ერთ ყველაზე პოპულარული პერსონაჟია მსახიობის კარიერაში.
მსახიობის მენეჯერი წინააღმდეგი იყო სერჯიო ლეონეს ფილმში მისი მონაწილეობისა: ეს იქნება მალპასო, რაც ესპანურად არასწორ ნაბიჯს ნიშნავს, შენი კარიერისათვისო, მაგრამ იგი შეცდა. შემდგომში ისთვუდმა საკუთარ კინოკომპანიას სწორედ მალპასო დაარქვა. ფილმის ბიუჯეტი სულ 200 ათასს დოლარს შეადგენდა და როგორც ისთვუდი იხსენებდა, მას დუბლებისათვის გამოსაცვლელი ტანსაცმელიც კი არ ჰქონდა, ამიტომ რეკვიზიტს თვალის ჩინივით უფრთხილდებოდა. ტრილოგიის პირველი ფილმისათვის ,,ერთი მუჭა დოლარი” ისთვუდს სულ 15 ათასი დოლარი და თვითმფრინავის ბილეთი ერგო, მეორე სურათისათვის ,,რამდენიმე დოლარით მეტი” უკვე 50 ათასი დოლარი და ფერარი მიიღო, ხოლო მესამისათვის ,,კარგი, ცუდი, ბოროტი” 250 ათასი. ლეონეს ვესთერნებს გამოსვლისთანავე უზარმაზარი წარმატება ხვდათ წილად, განთქმულმა რეჟისორმა ვიტორიო დე სიკამ ისთვუდს ახალი გერი კუპერი უწოდა. და მართლაც, ისთვუდი თამაშის მანერით წააგავს ცნობილ მსახიობს, მაგრამ კუპერისაგან განსხვავებით ისთვუდმა რადიკალურად განსხვავებული, ახალი გმირი შემოგვთავაზა. მისი გმირი კი სჯის ბოროტებას, ანადგურებს ბანდიტებს, მაგრამ მხოლოდ იმიტომ რომ მათ ოქროს ან ფულს დაეპატრონოს, რაც ტრადიციული ვესთერნის გმირისთვის წარმოუდგენელი რამ იყო…
ევროპის შემდეგ საჭირო იყო ამერიკის დაპყრობაც, ისთვუდი დაბრუნდა სამშობლოში და რამდენიმე საინტერესო პროექტში მიიღო მონაწილეობა, 1970 წლიდან კი იწყება ისთვუდის თანამშრომლობა ცნობილ რეჟისორთან დონ სიგელთან, მათ ერთად გადაიღეს ხუთი ფილმი, რომელთაგან ყველაზე ცნობილია ,,ბინძური ჰარი”. ისთვუდი სუპერვარსკვლავად იქცა, ფილმი კი მსოფლიოს მასშტაბით იმდენად პოპულარული გახდა, რომ საქმე კურიოზებამდეც მიდიოდა. ფილიპინების პოლიციის დეპარტამენტში ,,ბინძურ ჰარის” სასწავლო ფილმად იყენებდნენ, ამერიკაში ისთვუდს ხშირად იწვევდნენ პოლიციაში ლექციების წასაკითხად, მაგრამ იგი უარის ამბობდა და აცხადებდა რომ იურისპრუდენციაში არაფერი გაეგება. ,,ბინძურ ჰარის”კიდევ ოთხი გაგრძელება მოჰყვა. ფილმის გმირის, ინსპექტორ ჰარი ქელეჰენის სიტყვებს კი მრავალი ცნობილი ადამიანი იყენებდა. ერთხელ პრეზიდენტმა რეიგანმა მორიგი კანონის გატანისას სენატორებს ბინძური ჰარის სიტყვებით მიმართა: “Go ahead, make my day!” ანუ ჟარგონი რომ ვიხმაროთ _ ,,მიდით რა, გამისწორეთ!” მართლაც, სენატორებმა გაუსწორეს და კანონი მიღებულ იქნა. სხვათაშორის, როდესაც 1986 წელს ისთვუდი მშობლიური ქალაქის, ქარმელის მერი გახდა, პირველმა მას რონალდ რეიგანმა მიულოცა ტელეფონით და შეეკითხა: ,,რა უბიძგებს მსახიობს, რომელიც მაიმუნებთან ერთად თამაშობდა, პოლიტიკურ თამაშებში ჩაბმას?” საქმე იმაში გახლავთ, რომ რეიგანმა და ისთვუდმა სხვადასხვა დროს ითამაშა კომედიაში, სადაც ერთ-ერთ მთავარი გმირი შიმპანზე გახლავთ. თუმცა ისთვუდი პოლიტიკას არ გაჰყვა, რადგან მისი თქმით არ სურდა მუდმივად პრესის ყურადღების ქვეშ ყოფნა.
კლინტ ისთვუდმა თვითონაც მიჰყო ხელი რეჟისორობას, მან დადგა სხვადასხვა ჟანრის 41 ფილმი, მაგრამ მის შემოქმედებაში ყველაზე მნიშვნელოვანი ადგილი ვესთერნს უჭირავს. თავად ისთვუდი ამბობდა: ,,ამერიკულმა კულტურამ მოგვცა ორი ჟანრი _ ვესთერნი და ჯაზი”, სხვათაშორის, ისთვუდი ნიჭიერი პიანისტი, კომპოზიტორი და მომღერალიცაა. მან დადგა ცნობილი ჯაზმენის ჩარლი პარკერისადმი მიძღვნილი ბიოგრაფიული ფილმი ,,ჩიტი”, რომელმაც 1985 წელს კანის ფესტივალზე ფურორი მოახდინა.
90_იან წლებში აქტიურად საუბრობდნენ იმაზე, რომ კლინტ ისთვუდის დღეები, როგორც მსოფლიოს ერთ-ერთი ყველაზე შემოსავლიანი მსახიობის და მასთან ერთად ვესთერნის ჟანრის, რომელსაც მან უდიდესი ღვაწლი დასდო, დათვლილლია. ,,უკვე კარგა ხანია რაც ზოგიერთი ექსპერტი ვესთერნის სიკვდილზე სპეკულაციას ეწევა. ვესთერნისადმი მიძღვნილ ამ რექვიემს მე უკვე 35 წელია რაც ვუსმენ, მაგრამ ის რატომღაც ყოველთვის მკვდრეთით დგება”_ამბობდა ისთვუდი და ამ სიტყვების ჭეშმარიტების დასამტკიცებლად 1992 წელს მან შექმნა ყველა დროის ერთ-ერთი საუკეთესო ვესთერნი ,,მიუტევებელი”. ეს ფილმი იმ წლის ყველაზე შემოსავლიან ფილმად იქცა და ამასთან ერთად ოთხი ოსკარი მიიღო, მათ შორის საუკეთესო ფილმისა და რეჟისურისათვის. მადლიერმა მოსწავლემ კლინტ ისთვუდმა ფილმი მიუძღვნა თავის მასწავლებლებს_ სერჯო ლეონესა და დონ სიგელს.
ისთვუდი მსოფლიოს ყველაზე შემოსავლიან მსახიობთა სიაში რამდენიმე ათეული წელიწადია იმყოფებოდა, მისი ჰონორარები მილიონობით განისაზღვრებოდა, ნიუ_იორკის ხელოვნების მუზეუმი მისი ფილმების რეტროსპექტივას აწყობს, 1985 წელს კი საფრანგეთის მთავრობამ ისთვუდს ხელოვნების კავალერის წოდება მიანიჭა. მიუხედავად მისი დამსახურებისა და ღვაწლისა, კრიტიკოსები მას მაინცდამაინც არასოდეს სწყალობდნენ, და მათი დამოკიდებულების შეცვლას საკმაო ხანი დასჭირდა. თუმცა აუდიტორიის სიყვარული მას არასოდეს აკლდა. შეიძლება მის ფილმებს ისეთი დიდი შემოსავალი არ მოაქვს, როგორც მაგალითად, მარველის ბლოკბასტერებს, მაგრამ ერთი რამ უდავოა: კომიქსების მიხედვით გადაღებული ფილმები წლების განვლის შემდეგ ალბათ, არავის გაახსენდება, ისთვუდის სახელი კი უკვე ოქროს ასოებით არის შეტანილი ამერიკულ და მსოფლიო კინომატეანეში.
