\გურიაში, ოზურგეთის მუნიციპალიტეტის სოფლებში, ცენტრალური და ადგილობრივი ხელისუფლების წარმომადგენლები, თითქმის მთელი თვეა, სოფლების მცხოვრებლებს ხვდებიან.
გურიის გუბერნატორთან, ოზურგეთის მუნიციპალიტეტის მერთან, საკრებულოს თავმჯდომარესთან და სხვა ხელმძღვანელ პირებთან ერთად, შეხვედრებს ესწრებოდნენ საქართველოს პარლამენტის წევრები, უმრავლესობის წარმომადგენლები: გია ვოლსკი, გია გაჩეჩილაძე, თემურ ჭკუასელი, გარემოს დაცვისა და სოფლის მეურნეობის სამინისტროს, სურსათის და სოფლის განვითარების დეპარტამენტის ხელმძღვანელი თენგიზ კალანდაძე.
როგორც პარლამენტარებმა არა ერთხელ აღნიშნეს, ამ შეხვედრების მიზანი, არსებული პრობლემების შესახებ ინფორმაციის შეგროვებაა, რომელიც უნდა დააყენონ ხელისუფლების წინაშე და დროულად გადაწყვიტონ ის.
“გურია ნიუსი” უმრავლესობის ლიდერს, პარლამენტის წევრს გია ვოლსკის გურიაში ადგილობრივთა უპირველესი პრობლემების და ასევე, ზოგი პოლიტიკური ხასიათის დაპირისპირებაზეც ესაუბრა.
_ ბატონო გია, თქვენთან შეხვედრებზე, ყველა სოფელში, მოდიან ადამიანები, რომელთა უკან გაცილებით მეტი დგას. მათ უამრავი პრობლემა აწუხებთ და მინდა ამის შესახებ გკითხოთ.
_ უკმაყოფილო არ ვარ, რამდენიც მოდის. ხალხი საუბრობს პრობლემებზე. გისმენთ, დასვით კითხვა.
_ გურიაში ეკონომიკური ყოფის განმსაზღვრელი თხილია, რომელიც, ლამის, განადგურებამდე მიიყვანოს სიდამპლის ბაქტერიამ. შესაძლებელია თუ არა თხილის შესაწამლად სახელმწიფო დაეხმაროს ხალხს ხარისხიანი პრეპარატებით ან ასეთი პრეპარატების შესაძენი თანხით? მოსახლეობა, უფულობის გამო, ვერ ახერხებს მარჩენალი კულტურის სრულყოფილად შეწამვლას…
_ ვიცი. მე, როგორც მეუბნებიან ადგილობრივები, დგას ეს პრობლემა. ძალზე მნიშვნელოვანია, რომ ადამიანებმა გამოძებნონ რესურსი კოოპერატივების შესაქმნელად. ბევრი სოფელი მცირემიწიანია, ზოგს კი აქვს საკმარისად. ძალისხმევის გაერთიანება და მაღალი დონის საექსპერტო დახმარება, ვფიქრობ, ბევრ საკითხს გადაწყვეტს. ინტენსიური მუშაობის ორგანიზებაა საჭირო და საკითხი მოგვარდება.
_ მოსახლეობას არა ერთ სოფელში ტყეკაფები გამოუყვეს საცხოვრებელი ადგილიდან 25-30 კმ-ს დაშორებით; არის წყლის პრობლემა; მიწის საკუთრებაშიც გაურკვეველია ბევრი ადამიანი…
_ დიახ, არის ჩამონათვალი პრობლემებისა. პირველი _ ეს არის წყლის თემა, მიწების დამტკიცება. ბევრი ჯერ კიდევ გაურკვეველია, ეს როგორ ხდება. ტყეკაფების საკითხი, თუ უფრო ახლოს არსებობს და ხალხს შორს უშვებენ, მოსაგვარებელია. არის თემები, რომელიც ბუნებრივ აირს ეხება და ეს ინტენსიფიკაცია, რომელიც არსებობს, მნიშვნელოვანია, თუმცა, როგორც ეტყობა, არაა საკმარისი. ბევრი სოფელი წყლის გარეშეა დარჩენილი. თუმცა, მასშტაბური პროექტები გახორციელდა. სამწუხაროა, რომ ჩვენ ძალიან მძიმე მემკვიდრეობა მივიღეთ. ამდენი სოფელი უწყლოდ არ უნდა იყოს. 90-იანი წლებიდან მოყოლებული, რომ არაფერი ვთქვათ 2012 წლამდე ამ ბაქიბუქა ხალხის მუშაობაზე, ბევრი საკითხის გადაწყვეტა შეიძლებოდა და ის მდგომარეობა არ იქნებოდა, რაც დღეს გვაქვს. არ შეიძლება საქართველოში, ამ წალკოტში წყლის პრობლემა იდგეს.
_ დღეს ოზურგეთის მუნიციპალიტეტში უმწვავესი თემაა კარიერების საკითხი. არა ერთ სოფელში დასვეს ეს საკითხი…
_ პრობლემას რაც შეეხება და ზოგადად, პრობლემებს, ჩვენ აქ სწორედ იმიტომ ვართ ჩამოსული, რომ ინფორმაცია შევაგროვოთ, მოხდეს მისი კლასიფიკაცია და გადასაწყვეტად საკითხის დაყენება. თუ საექსპერტო შეფასებები გაინტერესებთ, შეგიძლიათ, ჰკითხოთ შესაბამის ექსპერტებს. არის ინფორმაცია, რომ კარიერები ხელს უშლის ჭებში საკმარისი წყლის დაგროვებას, ხალხი ამაზე ლაპარაკობს, მაგრამ ზუსტი საექსპერტო შეფასებაა საჭირო. არ შეიძლება ქართული სოფელი იყოს უწყლოდ!
_ ბატონო გია, თქვენ გქონდათ დახურული შეხვედრა “ქართული ოცნების” ოზურგეთის რაიონულ აქტივთან. ჩვენი წყაროს ცნობით, დაისვა არაერთი მწვავე კითხვა…
_ დახურული შეხვედრა იმიტომ არის დახურული, რომ დახურულია… (იცინის). მე ჩემს შეხედულებას გეტყვით. რაიონს საკმაოდ კარგი, ძლიერი ინტელექტუალური რესურსი გააჩნია და ეს არის, როგორც საკრებულოში, ისე პარტიაში და მერიაში. მეტი კოორდინაცია, მეტი შეთანხმებული მუშაობაა საჭირო.
_ როგორც ჩვენთვის ცნობილია, დახურულ შეხვედრაზე გითხრეს, რომ “ქართული ოცნების” არა ერთი წევრია გათავისუფლებული მერის მიერ, როგორც ა(ა)იპ ორგანიზაციებიდან, ისე მერიიდან. ზოგმა მოიგო სასამართლო პროცესი, მაგრამ დღეს სამსახურში არ არიან. რას იტყვით, როგორ შეაფასებთ ამ პროცესს?
_ როცა უკანონოდ ხდება სამსახურიდან გათავისუფლება, “ქართული ოცნების” მხრიდან იქნება ეს გადაცდომა, თუ სხვა პარტიის, ამას მნიშვნელობა არ აქვს, არსებობს სასამართლო. მე აქ არ ვარ პარტიული შეფასებებისთვის ჩამოსული _ ეს ერთი; მეორე _ მე ვარ “ქართული ოცნების” წარმომადგენელი; და მესამე _ საკითხი არის ის, რომ “ქართული ოცნების” წარმომადგენელს ამ არჩევნებში არ გაუმარჯვია _ ოზურგეთის მერი ხალხმა აირჩია. გაიმარჯვა ადამიანმა, რომელიც მუშაობს, ბევრი ადამიანი ჰყავს კმაყოფილი, ბევრიც _ უკმაყოფილო, მაგრამ ასეთი რამ არ ახასიათებს მარტო ოზურგეთს. გაიმარჯვა, ხალხმა მხარი დაუჭირა და გადაწყვეტილება მიიღო ისე, როგორც თვითონ ჩათვალა საჭიროდ. მე მის პარტიულ პასუხისმგებლობას ვერ დავაყენებ. მით უმეტეს, ვერც შეფასებას გავაკეთებ. შეფასება უნდა გააკეთოს სასამართლომ, თუ უკანონოდ არის ვინმე გათავისუფლებული. მე ვიტყვი, რომ “ქართული ოცნების” პარტიული ორგანიზაცია ოზურგეთში, ხაზგასმით ვამბობ, არის საკმაოდ ძლიერი, საკმაოდ ინტელექტუალური და კარგი იქნება, თუ ყველგან მეტი შეთანხმებულობით იმუშავებენ. თუმცა, იქ არის ან შეიძლება იყოს, ისე როგორც ყველგან, რაღაც შიდა დაპირისპირებები. ასეა ყველგან _ ამერიკაშიც და ავსტრალიაშიც და უარესი დაპირისპირებებიც არსებობს, ვიდრე საქართველოში, მაგრამ მთავარია, რომ ყველამ აიღოს ერთი მთავარი მიზანი და მთავარი ამოცანა დაისახოს _ ემსახუროს ხალხს. ხალხისთვის გაწეული სამსახური არის ის ამოცანა, რაც აქვს შესასრულებელი ყველას და არჩევნების დროს, ხალხი ამას შეაფასებს.
