1908 წლის 21 იანვარს თბილისში დაიწყო გურიის რესპუბლიკის სასამართლო პროცესი. მონაწილეებს ბრალს სდებდნენ 102 მუხლით –სპეციალური ორგანიზაციის შექმნა ცარიზმის დასამხობად შეიარაღებული საშუალებით. პასუხისგებაში მიცემულ იყვნენ: ბენია ჩხიკვიშვილი, ნესტორ ერქომაიშვილი, სიმონ ღლონტი, სერგო სურგულაძე, მოსე ტუღუში, (გამოძიებამ ტუღუშის ბინაში აღმოაჩინა სია პიროვნებებისა, ვინც მონაწილეობას იღებდა გურიის რევოლუციურ მოძრაობაში) პარმენ თოთიბაძე, ალექსანდრე იმედაშვილი, რაჟდენ ხომერიკი, გიორგი მამულაშვილი, კირილე ლომიძე, გიორგი ჭოღოშვილი, გიორგი შალიკაძე, მიხეილ თუმანიშვილი, მიხეილ ახალაძე, ისაკი საბაშვილი, ივანე გოგიტიძე, დიმიტრი გოგიტიძე, ვლადიმერ დუმბაძე, გრიგოლ დუმბაძე, მოსე ტუღუში, ანტონ ლომჯარია. დასახელებულ პირთაგან ზოგიერთმა (გ. ჭოღოშვილი, გ. შილაკაძე, მ. თუმანიშვილი, მ. ახალაძე, ი. საბაშვილი, ი. გოგიტიძე, ვ. დუმბაძე, გ. დუმბაძე) მიმალვა შეძლო. ინტერეს მოკლებული არ იქნება გაგაცნოთ ზოგიერთი ბრალდებულის დახასიათება, რომელსაც გაზეთი ,,ისარი” (#20, 1908) გამოძიების მიერ მოპოვებულ ცნობებზე დაყრდნობით გვაწვდის: ,,ნესტორ ერქომაიშვილი გურიის კომიტეტის წევრი იყო და მეთაურობდა ტერორისტების ჯგუფს. ითვლებოდა აგრეთვე წითელ რაზმის ერთ-ერთ უფროსად. იგი ტერორისტების დახმარებით ჰკრებდა იარაღს. იგი იყო აგრეთვე ბენია ჩხიკვიშვილის ერთ-ერთ მცველად. ნასაკირალის საქმეშიაც მიუღია მონაწილეობა”. ნაპოვნ სიაში ერქომაიშვილი 35-ე ნომრად, ტერორისტად არის მოხსენიებული.
,,სიმონ ღლონტი ტერორისტთა ჯგუფში ყოფილა. მონაწილეობას იღებდა ქ. ოზურგეთის სავაჭრო ნაწილის მართვა-გამგეობაში და ითვლებოდა ნოქრების წარმომადგენელად ს. დ. ორგანიზაციაში. ტუღუშთან ნაპოვნ სიაში იგი 94-ე ნომრით ტერორისტად არის აღნიშნული”.
,,ანტონ ლომჯარია ოზურგეთის ვაჭრების წარმომადგენლად ითვლებოდა გურიის კომიტეტში. როგორც ასის თავი, ხელმძღვანელობდა ვაჭრობას, გაფიცვის საქმეებს და ნიშნავდა დროს მაღაზია-დუქნების გაღება-დახურვისას. ამოწმებდა სასწორებს, დამნაშავე ვაჭრებს სჯიდა, აცხადებდა სად და როდის იყო დანიშნული მიტინგი და სხვა. თავის სახლში ინახავდა ნაწილს იარაღებისას და ითვლებოდა ტერორისტთა ჯგუფის წევრად”.
სერგო სურგულაძე ,,ჰკრებდა გადასახადებს კომიტეტის სასარგებლოდ და აგრეთვე არჩევდა ახალგაზდობას მებრძოლ რაზმისათვის. ბრალდებულს უნახეს მოწერილობანი გურიის კომიტეტისაგან. კომიტეტი სთხოვდა დახმარებას იარაღით და სხვა. ასეთი მოწერილობა ექვსი უნახეს”.
,,მოსე ტუღუში… ათის თავი იყო. მანიფესტის შემდეგ ბაღში მიტინგზე სიტყვა წარმოსთქვა და მიიწვია ხალხი შეიარაღებულ აჯანყებისათვის. ბრალდებული ჰკრებდა ფულს რევოლიუციისათვის, არჩევდა სხვა და სხვა პირთა საჩივრებს, მონაწილეობა მიიღო საქალაქო საქმის ორგანიზაციაში… სიაში თვით ტუღუში აღნიშნულია მებრძოლ რაზმის უფროსად. ხმოსნობაზე ტუღუშს კენჭი უყრია და ამოსვლია 303 ხმა”.
,,პარმენ თოთიბაძე ითვლებოდა ოზურგეთის ასის თავად. იგი მიტინგზე ხალხს იწვევდა არსებულ წესწყობილების დასამხობად. ბრალდებულს უნახეს საზოგადოების სახელზე თხოვნა. თოთიბაძე ამ თხოვნაში ასწერს, თუ რა სამსახური გაუწია მან რევოლუციონურ მოძრაობას, როგორ მიატოვა სამსახური და სხვა, იგი ხშირად მიტინგებს თავმჯდომარეობდა”.
,,ალექსანდრე იმედაშვილი წევრი იყო მებრძოლ რაზმისა. იგი მონაწილეობას იღებდა სამაზრო სამმართველოდან იარაღის გატაცებაში. იგი ითვლებოდა ათის თავად”.
,,რაჟდენ ხომერიკი ტერორისტთა ჯგუფის წევრად ითვლებოდა; ჰკრებდა იარაღს, მონაწილეობას იღებდა მაზრის სამმართველოსა და მომრიგებელ მოსამართლის კამერიდან იარაღის გატაცებაში. დაეცა პრაპორშჩიკს ბერიძეს იარაღის ჩამოსართმევად”.
,,გიორგი მამულაიშვილი ითვლებოდა კომიტეტის წევრად და სხვებთან ერთად ს. -დემოკრატების კლუბს განაგებდა. ამ კლუბში იმართებოდა კრებები კომიტეტისა და სასამართლოს წევრებისა. აქვე მართავდნენ წარმოდგენებს და საზოგადო კრებებს. მამულაიშვილი ხელს უწყობდა მიტინგების გამართვას და კრებებზე წესიერების დაცვას ადევნებდა თვალყურს. ამისათვის მამულაიშვილს ,,პრისტავს” ეძახდნენ. ტუღუშის სიაში მე-5 ნომრით არის აღნიშნული. ხმოსნად იგი 413 ხმით აირჩიეს”.
,,სიმონ ტოტოჩავა ტერორისტთა ჯგუფში ითვლებოდა, ზოგჯერ უფროსობდა წითელ რაზმს. იგი დამცველი იყო პრეზიდენტად წოდებულის ჩხიკვიშვილისა”.
,,კირილე ლომაძე სოფელ ჩიბათში ასის თავად ითვლებოდა და მონაწილეობდა ადგილობრივ ორგანიზაციაში. ლომაძე ამ სოფელში მართავდა ყრილობებს, ეწეოდა პროპაგანდას და იწვევდა ხალხს ასაჯანყებლად”.
გაზეთი ,,ცისკარი” (#11, 1908) ასევე აქვეყნებს პასუხისგებაში მიცემული პირების ვინაობას და მათ წლოვანებას: ოზურგეთის მაზრის მცხოვრები აზნაური ბენიამენ ჩხიკვიშვილი, 24 წლისა; დიომიდე შილაკაძე, 32 წლისა; ალ. იმედაშვილი, 23 წლისა; ანტ. ლომჯარია, 33 წლისა; რაჟდ. ხომერიკი, 26 წლისა; სერგო სურგულაძე, 27 წ.; ნესტორ ერქომაიშვილი 46 წ.; გ. მამულაიშვილი, 28 წლისა, პარმენ თოთიბაძე 20 წ.; მოსე ტუღუში, 36 წ.; და სიმონ ღლონტი 31 წ…
ამონარიდი ჩემი წიგნიდან ,,გურიის რესპუბლიკა”, რომლის ახალი შევსებული გამოცემა მალე გამოვა (გამომცემლობა ,,აზრი”).
