ოზურგეთის მეორე საჯარო სკოლის მეთერთმეტე კლასში, მასწავლებელ მაია ღლონტთან ერთად, მოსწავლეებმა ძალზე ემოციურად ისაუბრეს ლუკა სირაძის ტრაგიკული სიკვდილის ირგვლივ.
“ბევრი ტკივილიანი კითხვა დაისვა, თუმცა, პოზიტიური პასუხების გარეშე არ დარჩენილა არცერთი. ალბათ, არ დარჩენილა მასწავლებელი, ამ თემაზე არ ესაუბროს ბავშვებთან. სასიხარულო ისაა, რომ მოსწავლეები კარგად ხვდებიან, თვითმკვლელობა ძალა კიარა უძლურებაა, ცხოვრება ბრძოლაა და ეს ბრძოლა უნდა ისწავლო და გაიმარჯვო,” _ თქვა „გურია ნიუსთან“ ოზურგეთის მეორე საჯარო სკოლის ქართული ენისა და ლიტერატურის მასწავლებელმა, მაია ღლონტმა.
სწორედ ამ კლასის მოსწავლემ, ნარი გელაშვილმა, ფეისბუკსივრცეში ასეთი პოსტი გამოაქვეყნა:
„ლუკას დაღუპვა მართლაც დიდი ტრაგედიაა, მაგრამ უფრო დიდი ტრაგედია ამ სიტყვების სლოგანად ქცევაა_ ” ამ ცხოვრების დედაც”. მესმის და ვხვდები, რომ ყველა ქართველს აწუხებს ეს ამბავი და ყველა ცდილობს სოლიდარობის გამოხატვას ამ ამბის მიმართ. ზოგსაც პროტესტის გრძნობა აქვს და ამ ფრაზით ცდილობს, დაიკმაყოფილოს იგი. თუმცა, ჩვენი უმრავლესობა არ ფიქრობს თუ რა შედეგები შეიძლება მოჰყვეს ამ თითქოსდა უბრალო ფრაზის, “ამ ცხოვრების დედაც” ასე საჯაროდ აფიშირებას. დღეს, შეიძლება, ლუკას თვითმკვლელობას განვიცდით და ვაპროტესტებთ, მაგრამ იმას არ ვითვალისწინებთ თუ რამდენად ლეგიტიმურია ჩვენი გრძნობების ასე საჯაროდ გამოტანა. არ ვითვალისწინებთ, რომ სოც. ქსელებში ბევრი ბავშვი კითხულობს და უსმენს ამ ყველაფერს და “მერე რაო”, იკითხავს ზოგი. რა და როდესაც გარდატეხის ასაკის ბავშვი, რომელსაც ჯერ კიდევ არ აქვს ფსიქიკა ჩამოყალიბებული და თვლის, რომ ყურადღება აკლია და შესაბამისად ცდილობს ყურადღების ცენტრში მოხვედარას, წაიკითხავს ან მოუსმენს ხალხის დამოკიდებულებას და ჩათვლის, რომ ლუკა ასე თუ ისე “პოპულარულია”, შეიძლება და ამის დიდი რისკიც არსებობს, რომ თავადაც გახდეს სუიციდის მსხვერპლი. .
მსოფლიო ვითარდება, იცვლება ყველაფერი, მაგრამ უცვლელი რჩება ბრბოს ფსიქოლოგია. თუ შუა საუკუნეებში ჯადოქრებს დასდევდნენ დასაწვავად, დღეს, კლავიატურას და აქტუალურ საკითხს დასდევენ და მათთვის არ აქვს მნიშვნელობა თუ რამდენად მტკივნეულია ეს თემა ან რამდენდ საშიშია ამ თემის გავრცელება. თქვენთვის ეს მნიშვნელოვანი არაა. მთავარია, თქვენს პოსტებს, ფოტოებს, სთორებს ან ვიდეოებს ჰქონდეს ლაიქი გაზიარება და ბევრი კომენტარი ისე ხართ ამ ყველაფერს მიჯაჭვული, რომ გიჭირთ საკითხის მნიშვნელობის გააზრება. მე ყველას არ ვდანაშაულებ, რა თქმა უნდა, როცა ჩემი თაობის ბავშვი ამ ყველაფერს ხედავს და კითხულობს მასაც აქვს სურვილი აზრის გამოხატვის და ბოლოს „ამ ცხოვრების დედაც“ არა! ცხოვრება ღირს, რომ დაინახო, გაიაზრო და იგრძნო ბევრი. სუიციდი სისუსტეა და გამოსავალი იმ ადამიანებისთვის, რომლებსაც დიდი პრობლემები აქვთ და მათგან გაქცევა სურთ, მაგრამ ვინც სუიციდს გვერდს აუვლის და პრობლემას თვალებში ჩახედავს, ის შეძლებს მის დაძლვას და ვინც ამას ახერხებს ის უფრო ძლიერი ხდება . სუიციდია ცუდი იდეა, ეს როლი არცერთ ადამიანს არ უხდება.“
