კორონავირუსთან დაკავშირებით, სრულიად საქართველოს მუსლიმთა სამმართველოს ინიციატივით, ბათუმის ოფისში მუნიციპალიტეტების მუფთები და თეოლოგები შეიკრიბნენ. სხდომაზე ვირუსის გავრცელების საფრთხესთან ერთად იმსჯელეს განსახორციელებელ პრევენციულ, პროფილაქტიკურ და სხვა სახის გასატარებელ ღონისძიებებზე.
შეხვედრაზე აღინიშნა, რომ მეჩეთებში სათანადოდაა დაცული ყველა ის რეკომენდაცია, რასაც ჯანდაცვის შესაბამისი უწყებები გასცემენ. სისტემატურად ტარდება სადეზინფექციო სამუშაოები, ნიავდება სამლოცველო დარბაზები და მლოცველებს ეძლევათ საჭირო მითითებები.
როგორც სრულიად საქართველოს მუსლიმთა სამმართველოს მიერ სოციალურ ქსელში გავრცელებულ ინფორმაციაშია ნათქვამი, სხდომაზე სასულიერო პირების მიერ მიღებული იქნა შემდეგი რეკომენდაციები, რომელთა დაცვაც მკაცრად ევალებათ მლოცველებს და იმამებს:
„- დაიცვან სამლოცველოებში ჰიგიენის წესები და პერიოდულად ჩატარდეს სადეზინფექციო სამუშაოები;
– ლოცვის წინ და ლოცვის შემდეგ, მხოლოდ სიტყვიერი მისალმებით შემოიფარგლონ, არ ჩამოართვან ხელი და არ გადაეხვიონ ერთმანეთს, ნუ გამოიყენებენ საერთო სარგებლობის კრიალოსანს და ლოცვის დასრულების შემდეგ, არ ჩამოისვან ხელები სახეზე;
– რეკომენდირებულია იქონიონ საკუთარი სალოცავი ხალიჩა;
– ხანდაზმულებმა, ქრონიკული დაავადების მქონე პირებმა და მათ, ვისაც რესპირატორული დაავადებების სიმპტომები აღენიშნებათ, არავითარ შემთხვევაში არ მივიდნენ მეჩეთებში და სხვა ხალხმრავალ ადგილებში;
მიუხედავად იმისა, რომ ისლამის მიხედვით, პარასკევის ლოცვა მხოლოდ მეჩეთებში ჯამაათით სრულდება, აღნიშნული ლოცვის ვალდებულება ეკისრება პირს, თუ ის გარკვეულ პირობებს აკმაყოფილებს. მათ შორის: პიროვნება უნდა იყოს თავისუფალი. მაგალითად, პატიმარს ან მოცემულ შემთხვევაში, კარანტინში ან თვითიზოლაციაში მყოფ ადამიანს პარასკევის ლოცვის ვალდებულება არ ეკისრება. ასევე ადამიანის ქონებას, სიცოცხლესა და ჯანმრთელობას, საფრთხე არ უნდა ემუქრებოდეს და სახელმწიფოს ოფიციალური უწყებების მხრიდან არ უნდა იყოს რაიმე სახის შეზღუდვა. ყოველი ზემოთ ჩამოთვლილი პირობის შესაბამისად:
– მაღალი საფრთხის მქონე ადგილებში არსებულ მეჩეთებში შესრულდეს მხოლოდ ლოცვის სავალდებულო ნაწილი (ფარძი და ხუტბა), ხოლო ნებაყოფლობითი ნაწილი (სუნნეთი ლოცვები) შესრულდეს სახლებში, დროებით შეჩერდეს ქადაგება, რომელიც პარასკევის ლოცვის დროის დადგომამდე სრულდება, რითაც შემცირდება მეჩეთებში მლოცველთა ხანგრძლივი დროით გაჩერება;
– ვირუსის გავრცელების მასშტაბებისა და რისკების გათვალისწინებით, განსაკუთრებით ცენტრალურ და ხალხმრავალ მეჩეთებში, გარკვეული პერიოდით, ვიდრე არ გაივლის ეპიდემიის გავრცელების საშიშროება, მლოცველს შეუძლია თავი შეიკავოს პარასკევისა და სხვა ლოცვების ჯამაათით შესრულებისგან მეჩეთებში. ამ შემთხვევაში, პარასკევის ლოცვის ნაცვლად პიროვნება ინდივიდუალურად შეასრულებს შუადღის ლოცვას საკუთარ სახლში.
აქვე უნდა აღინიშნოს, რომ სამომავლოდ, ღმერთმა დაგვიფაროს, თუკი უფრო გართულდება ვითარება და ვირუსის გავრცელების პრევენციის მიზნით გამკაცრდება ჯანდაცვის უწყებების რეკომენდაციები, ჩვენც ვიმოქმედებთ შესაბამისად.
ამასთან ერთად, ძალიან მნიშვნელოვანია შევინარჩუნოთ სიმშვიდე, ვიყოთ ოპტიმიზმით განწყობილი და არ ჩავვარდეთ პანიკაში, სრულად დავიცვათ ჯანდაცვის ორგანოების რეკომენდაციები და მივენდოთ ღმერთს. ახსოვდეს ყველას, რომ მხოლოდ მტკიცე რწმენითა და ოპტიმიზმით შევძლებთ სიძნელეებზე გამკლავებას. ვლოცულობთ, რომ ყველა სნეული მალე გამოჯანმრთელდეს, კარანტინსა და თვითიზოლაციაში მყოფებს კი ვუსურვებთ გამძლეობას და მოთმინებას.
გვინდა ვისარგებლოთ შემთხვევით და დიდი მადლობა გადავუხადოთ სახელმწიფოს შესაბამის სტრუქტურებს თავდაუზოგავი შრომისა და სამსახურისათვის, რის შედეგადაც ჩვენს ქვეყანაში ვითარება კონტროლს ექვემდებარება.
შევთხოვთ დიად გამჩენს მთელი მსოფლიო და ჩვენი ქვეყანა მსგავსი უბედურებებისა და ეპიდემიებისგან დაიფაროს. აამიინ!“_ ნათქვამია სრულიად საქართველოს მუსლიმთა სამმართველოს განცხადებაში.
