“ჩვენ უკვე ჯოჯოხეთში ვართ, თუმცა არ მიგვიღწევია ჰუმანიტარული კატასტროფისთვის, _ ამის შესახებ სომხეთის პრემიერ-მინისტრმა ნიკოლ ფაშინიანმა ბრიფინგზე განაცხადა.
ფაშინიანმა იმ მოქალაქეებს მიმართა, რომლებსაც კორონავირუსის არსებობის არ სჯერათ.
„ამბობენ, რომ ეს სიცრუეა, რომ კორონავირუსი არ არსებობს და მთავრობა ციფრებს იმიტომ აქვეყნებს, რომ დახმარება მიიღოს. თითქოს, ჩვენი ხელისუფლება ასე ხშირად ითხოვდეს დახმარებას საჭიროების გარეშე. რა თქმა უნდა, კორონავირუსის შესახებ ბევრი რამ სულ ცოტა ხნის წინ გავიგეთ, ჩვენთვის უფრო სასარგებლო იქნებოდა, რომ უფრო ადრე გაგვეგო საზოგადოების დამოკიდებულება ვირუსთან დაკავშირებით.
ჩვენ უკვე ჯოჯოხეთში ვართ, თუმცა არ მიგვიღწევია ჰუმანიტარული კატასტროფისთვის. შეგვიძლია, ეს ჯოჯოხეთი გავიაროთ ჰუმანიტარული კატასტროფის გარეშე“, – განაცხადა ბრიფინგზე ნიკოლ ფაშინიანმა.
სომხეთის პრემიერმა დღეს განაცხადა, რომ ქვეყანაში ამჟამად ჰოსპიტალიზაციის რიგს კორონავირუსით ინფიცირებული 200-მდე პაციენტი ელოდება. სომხეთის პრემიერ-მინისტრის განცხადებით, ქვეყანაში იყო შემთხვევა, როდესაც „კოვიდ-19“-ით ადამიანი სამედიცინო დახმარების დაგვიანების გამო გარდაიცვალა.
სომხეთში კორონავირუსით ინფიცირებულთა რაოდენობამ 13 000-ს გადააჭარბა, გარდაცვლილია 200-მდე ადამიანი.
კორონავირუსითაა ინფიცირებული თავად ნიკოლ ფაშინიანი და მისი ოჯახის ყველა წევრი.
