ზაფხულის სეზონისთვის ქვეწარმავლების სიმრავლეა დამახასიათებელი. მათ საქართველოს მასშტაბით ყველგან ვხვდებით, მათ შორის თბილისში.
„გურია ნიუსი“ ცხოველთა მონიტორინგის სააგენტოს დირექტორს, ვახტანგ ლომჯარიას ესაუბრა დედაქალაქში არსებული ვითარების შესახებ.
როგორც ლომჯარიამ გვითხრა, დედაქალაქში ცხელი ამინდების დადგომის შემდეგ 80-ზე მეტი გველი დაიჭირეს, მათ შორის 2 გიურზა.
„წელს გვიან დაცხა, მაგრამ როგორც კი დაცხა ძალიან გაიზარდა ქვეწარმავლებზე შემოსული შეტყობინებები. მაგრამ აქ განსაკუთრებული არაფერი არ ხდება, ყოველ წელს თბილისში მეორდება ერთი და იგივე სურათი. წელს უკვე 80-ზე მეტი ქვეწარმავალი იქნა დაჭერილი თბილისში და გაშვებული სხვა ტერიტორიებზე, მათ შორის 2 გიურზა. ერთი სახლის სარდაფში იყო ჩამძვრალი და მეორე საკურდღლეში.ორივე უვნებლად გამოიყვანეს და სხვაგან, უსაფრთხო ტერიტორიებზე გაუშვეს“,_ გვითხრა ლომჯარიამ.
ცხოველთა მონიტორინგის სააგენტოს დირექტორის თქმით, ყოველწლიურად სააგენტო 500-მდე ქვეწარმავალს იჭერს. 80%-ზე მეტი არის გველხოკერა. ე.წ. უფეხო ხვლიკი და არანაირ საფრთხეს არ წარმოადგენს მოსახლეობისთვის, თუმცა ადამიანებს უჭირთ მათი გარჩევა და ეშინიათ.
ვახტანგ ლომჯარია ამბობს, რომ ქვეწარმავლები დედაქალაქის ყველა უბანში გვხვდება. ის შესაძლოა ზოგჯერ ტრანსპორტის საშუალებით ცენტრშიც კი მოხვდეს, უმეტესად კი დაუსუფთავებელ ეზოებში შეხვდებით.
„ქვეწარმავალი თბილისის თითქმის ყველა უბანში გვხვდება. მიუხედავად იმისა, რომ ბუნებრივად, სადღაც უფრო ბინადრობენ, ასევეა ის პრობლემა, რომ შეიძლება ტრანსპორტს ჩამოყვეს ქვეწარმავალი და ქალაქის ცენტრში გიურზა რომელიმე ავტომობილმა შემოიყვანოს, ისე რომ ამის შესახებ მძღოლმაც არ იცოდეს. განსაკუთრებით შეიძლება ბუდობდნენ იქ, სადაც არის სამშენებლო მასალები, ანტისანიტარია, სადაც ბუდობენ მღრღნელები და შემდეგ საკვებს ბუნებრივია მოყვებიან ქვეწარმავლებიც, დაუსუფთავებელი ეზოები“,_ გვითხრა ლომჯარიამ.
შეკითხვაზე თუ როგორ უნდა მოვიქცეთ ქვეწარმავალთან შეხვედრისას- ცხოველთა მონიტორინგის სააგენტოს დირექტორი შემდეგ რჩევას იძლევა:
„თუ დავინახეთ ქვეწარმავალი სასურველია მისი მიმართულებით არ ვიმოძრაოთ. უკან დავიხიოთ და გავეცალოთ, რადგან მას უფრო მეტად ეშინია ადამიანის, ვიდრე ადამიანს ქვეწარმავლის. მთავარია, გასასვლელი არ გადავუღობოთ. თუ ოთახში წავაწყდით მივცეთ საშუალება, რომ გაგვეცალოს თავად და თბილისის ფარგლებში გამოვიძახოთ ცხოველთა მონიტორინგის სააგენტოს ეკიპაჟები“.
