მოხდა ისე, რომ 22 წლის ოზურგეთელი გოგონა, მზევინარ შარაშენიძე უკვე გამოცდილი მსაჯია და ფიფას წოდებაზეც ოცნებობს. თუმცა, მას მშობლიურ ოზურგეთში, როგორც ფეხბურთის ფანატიკოს მსაჯს, არ იცნობენ. მზეკოს კი უკვე თვალი ფეხბურთის საერთაშორისო ფედერაციისკენ უჭირავს.
_ოცნებაზე მეტია ჩემთვის, გავხდე ფიფას მსაჯი და უნდა ავიხდინო ეს ნატვრა, – გვეუბნება რედაქციაში სტუმრად მოსული გოგონა, რომელსაც ფეხბურთთან დაკავშირებულ პერსონაჟს არაფერი უგავს და ნებისმიერ მნახველს მოდელი უფრო ეგონება.
მზვინარ (მზეკო) შარაშენიძე ოზურგეთში, 1997 წელს დაიბადა. დაამთავრა ოზურგეთის მეორე საჯარო სკოლა და სწავლა ილიას სახელმწიფო უნივერსიტეტში გააგრძელა.
_სკოლაში სწავლის დროს ბებია შასველს არ მაძლევდა, სულ ცეკვაზე მატარებდა. თუმცა შინ მოსულს, როცა ფეხბურთის სიყვარულით აჟიტირებული მამა და ძმა მხვდებოდნენ, თანდათან ჩამოყალიბდა ჩემში სპორტის ამ უპოპულარულესი სახეობისადმი სიყვარული. თავიდან ფეხბურთელობაზეც ვფიქრობდი. უნივერსიტეტში ჩარიცხვის დღიდან კი, პარალელურად დავიწყე საუნივერსიტეტო ოლიმპიადებში მონაწილეობა მაგიდის ჩოგბურთსა და ბილიარდში – სპორტის ეს სახეობებიც არანაკლებ მიყვარს, ოღონდ ფეხბურთის სიყვარულს ვერ შევადარებ. ხუთჯერ გავხდი ილიას უნივერსიტეტის ჩემპიონი მაგიდის ჩოგბურთში. ასევე ბილიარდშიც არაერთხელ გავიმარჯვე. თუმცა თავიდან და გულიდან ვერ ამომქონდა ფეხბურთის სიყვარული. ასე გადავწყვიტე მსაჯის პროფესიას დავუფლებოდი. რატომღაც, გარკვეულ ეტაპზე მსაჯობა მომეჩვენა ძალიან საინტერესოდ. ვცადე და … გამომივიდა, _ გვიამბობს გოგონა და დეტალურად იხსენებს, როგორ გადადგა ამ მიმართულებით პირველი ნაბიჯი:
_რაკი ფეხბურთის სიყვარული გულიდან არ ამომდიოდა, ერთ ჩემ მეგობარ მსაჯს ვკითხე, მსაჯობა მეჩვენება ძალიან საინტერესო პროფესიად და რას მირჩევ-მეთქი დამარწმუნა, რომ ქალებსაც საუცხოოდ შეუძლიათ მსაჯობა. სასწრაფოდ დავამთავრე მსაჯთა აკადემია და შევუდექი ყველა ნიუანსის სწავლას და გაშიფვრას, რაც ამ პროფესიას უკავშირდებოდა.
_როდის იმსაჯეთ პირველად და რა განცდაა, როცა მოედანზე პირველად გადიხართ ქალი მსაჯი?
_ეს იყო 2018 წლის 4 მარტს. „დინამოს“ და „რუსთავის“ თამაში. ძალზე ამაღელვებელია, როცა ამდენი ხალხი გიყურებს, თან იმ სფეროში, რომელიც, იცი უკვე, რომ სრულ ბედნიერებას მოგანიჭებს. პირველად იბნევი, აუცილებელია, კონცეტრაცია მოახდინო თავში. რთულია შემოძახილებიც. ის მომენტებიც, როცა ფეხბურთელები გეწინააღმდეგებიან, მაგრამ შენ იღებ მტკიცე გადაწყვეტილებას. როცა შევდივარ სტადიონზე, ვამბობ, რომ მე ის მზეკო არ ვარ. ვცდილობ, არ დარჩეთ შთაბეჭდილება, რომ ქალი მსაჯია სტადიონზე. ზოგადა, აი, ეს ქალია და ამის მსაჯობა არ სშიძლება, ეს სტერეოტიპი უკვე დამსხვრეულია. ადრე უფრო იყო, როცა ვიწყებდი მსაჯობაზე ფიქრს. უკვე კაცებიც თვლიან, რომ მათი თანატოლები ვართ და კარგად ესმით, რომ ქალებსაც არანაკლები მსაჯობა შეგვიძლია.
_მზეკო, კატეგორია თუ გაქვს მონიჭებული და მაინც რომელია ყველაზე რთული მომენტი მსაჯის პროფესიაში, როცა სტადიონზე ხარ და თამაშს როცა უძღვები?
_ახლა მე პირველი კატეგორიის მსაჯი ვარ. ვმსაჯობდი რეგიონლიგას, ჭაბუკთა ლიგას, მერე ქალთა ეროვნულ ლიგას, ელიტლიგას… როცა მსაჯობ, წამებში უნდა მიიღო უტყუარი გადაწყვეტილება. რთულია ეს, მაგრამ როცა შეძლებ, ხარ ძლიერი და ხვდები, რომ აღმოაჩინე შენი პროფესია, რომელიც გაგაბედნიერებს.
_თუ გქონია შემთხვევები, როცა წითელი ბარათი აუწიე ფეხბურთელს ან დანიშნე თერთმეტმეტრიანი ჯარიმები?
_როგორ არა, ერთი თამაში იყო, ოთხჯერ დავნიშნე თერთმეტმეტრიანი და ერთი წითელი ბარათიც დავუდე. ყველა გაბრაზდა, მაგრამ თამაშის დროს აღმოჩნდა, რომ მაყურებელი აღფრთოვანებული იყო. ქედაში იყო ეს თამაში, მახსოვს.
_გახსოვს თუ არა ყველაზე აგრესიული მაყურებელი და რა მოიმოქმედე ამ დროს?
-კი, ყოფილა ასეთი შემთხვევები. თავიდან მიფიქრია, _ აუცილებელია, ეს გადაწყვეტილება მივიღო, რა ვქნა? თუმცა, ეს პროფესია და მისი სიყვარული გაძლევს უნარს და შთაგაგონებს, არ შედრკე. რაღაცნაირად, ძალიან ძლიერი გავხდი შინაგანად, ფსიქოლოგიურად.
_მზეკო, როგორც ვიცი, ფიფას მსაჯობაზე ოცნებობ. როგორ ფიქრობ, აგიხდება ოცნება.? და რა გზა გაქვს ამისთვის გასავლელი?
_ამისთვის საჭიროა, ნორმატივებს კარგად აბარებდე. აუცილებელია, მაღალი დონის ფიზიკური მომზადება. მსაჯობა ზედმიწევნით კარგად უნდა იცოდე. კარგად უნდა ფლობდე ინგლისურ ენას და ყველაზე მთავარი რაც არი, ოდნავადაც არ უნდა გადაიხარო სამართლიანობის ხაზიდან, არაფრის ფასად. მჯერა, მიზანს მივაღწევ.
_მინდა გკითხოთ _ გარეგნობით აბსოლუტურად მოდელის ნორმას ექვემდებარები. ასევე, საუბრისას ძალე მოკრძალებული, მშვიდი და ნაზი ხარ… რა ხდება სტადიონზე, როცა მსაჯის ფორმით და სასტვენით გადის ასეთი მომხიბლავი გოგონა?
_კი, უკვირთ ხოლმე, მაგრამ ჩემში ეს არ უშლის ხელს ერთმანეთს. როგორიც ვარ, ისეთი ვარ. არაფერს არ ვთამშობ და არ ვიზეპირებ ქცევებს თუ მანერებს.
_მზეკო, ბოლოს მთავრი კითხვა _ არის თუ არა შეყვარებული მზევინარ შარაშენიძე?
_ გულწრფელად გეტყვით, ჯერ მხოლოდ ფეხბურთის სიყვარულით ვარ სავსე. მჯერა, ყველაფერი დალაგდება, გავხდები ფიფას მსაჯი. სიყვარული კი როცა მეწვევა, მის შესახებ მერე გესაუბრებით!
წარმატებებს ვუსურვებთ გოგონას, რომელიც თავდავიწყებითაა შეყვარებული მსაჯის პროფესიაზე და სურს, მშობლიურ ოზურგეთს ფიფას გადმოსახედიდან მიაწვდინოს იმ საყვარელი გუნდების გამარჯვების შესახებ ხმა, რომელთა მთავარი არბიტრი თავად იქნება.
