მთავრობის ადმინისტრაციასთან მოძრაობის ,,სოცაფეთქება” ორგანიზებით ე.წ. კომენდანტის საათის გაუქმების მოთხოვნით აქცია იმართება.
აქციაზე სამოქალაქო აქტივისტები და ბიზნეს სექტორის წარმომადგენლები იმყოფებიან. მათი თქმით, კომენდანტის საათის დაწესება ეპიდვითარების გაუარესებას არ უკავშირდება და ის პოლიტიკური გადაწყვეტილებაა.
აქტივისტებს თან აქვთ ბანერები წარწერით: ,,მოხსენით კომენდანტის საათი”, ,,გადავარჩინოთ ტურიზმი” და ა.შ.
როგორც ,,თავისუფლების ინსტიტუტის“ წარმომადგენლები აცხადებენ, ხვალ, 22 მარტს საკონსტიტუციო სასამართლოში სარჩელსაც შეიტანს.
,,თავისუფლების ინსტიტუტის” წარმომადგენელი სალომე ხვადაგიანის განცხადებით, ნებისმიერ ქვეყანაში განსაზღვრული უნდა იყოს ობიექტური კრიტერიუმები თუ რა შემთხვევაში შეიძლება დამძიმდეს, შეიცვალოს, ან შერბილდეს შეზღუდვები, ჩვენ ქვეყანაში კი ასეთი კრიტერიუმები არ გვაქვს.
,,თავისუფლების ინსტიტუტი” საკონსტიტუციო სასამართლოში შეიტანს კოლექტიურ სარჩელს ,,ქართველი ხალხი საქართველოს მთავრობის წინააღმდეგ”. ვაპროტესტებთ მთელ რიგ სადავო ნორმებს, როგორც ადმინისტრაციული კოდექსიდან, ასევე სისხლის სამართლის კოდექსიდან, რომელიც აწესებს სანქციას იზოლაციის და კარანტინის წესების დარღვევაზე. ასევე ვაპროტესტებთ მუხლებს, რომლის მიხედვით, პარლამენტმა გადასცა მთლიანი საკანონმდებლო პასუხისმგებლობა მთავრობას. ნებისმიერ ქვეყანაში განსაზღვრული უნდა იყოს ობიექტური კრიტერიუმები, რა შემთხვევაშიც შეიძლება დამძიმდეს შეზღუდვები, შეიცვალოს, ან შერბილდეს. ჩვენ ასეთი კრიტერიუმები არ გვაქვს. მაგალითად გერმანიაში, ეს ინფიცირებულთა რაოდენობაზე არის დამოკიდებული”, – განაცხადა სალომე ხვადაგიანმა.
ცნობისთვის, გადაადგილების შეზღუდვა 21 საათიდან, გასული წლის ნოემბრიდან მოქმედებს. მიუხედავად იმისა, რომ ხელისუფლებამ შეზღუდვები ეტაპობრივად შეამსუბუქა, კომენდანტის საათს არ ხსნის.
