ქვეყნის ჯანდაცვის მინისტრის შეფასებით, რეგიონებში ვაქცინაციის პროცესი ნელა მიმდინარეობს და გეგმავს ადგილზე გაიცნოს არსებულ სიტუაციებს. გამონაკლისი ამ მხრივ არც გურიაა, სადაც კორონავირუსის საწინააღმდეგო ვაქცინის გაკეთებისთვის, თითქმის ერთი კვირაა, მსურველები არ დარეგისტრირებულან სპეციალურ საიტზე. ამის ფონზე კი, სამწუხაროდ, რეგიონში მატულობს ინფიცირებულთა რაოდენობა. ამ მხრივ, განსაკუთრებით არასახარბიელო მდგომარეობა ლანჩხუთშია, სადაც ბოლო დღეებში ინფიცირებულთა დღიური მაჩვენებელი ორნიშნა რიცხვს ქვემოთ არ ჩამოდის.
„გურია ნიუსი“ დაინტერესდა რას ფიქრობენ ადგილობრივი მედიკოსები და რიგითი ადამიანები ვაქცინის გაკეთებასთან დაკავშირებით და თავად აპირებენ თუ არა გაიკეთონ კოვიდ 19-ის საწინააღმდეგო აცრა.
„მედალფას“ ლანჩხუთის კლინიკის ხელმძღვანელის რევაზ კვერენჩხილაძის თქმით, რომლის ოჯახის წევრმაც უკვე გაიკეთა კოონავირუსის საწინააღმდეგო აცრა, იქედან გამომდინარე, რომ ალერგიულია, მისთვის აცრის გაკეთება არ შეიძლება.
„ორი კვირის წინ გადავიტანე კოვიდი და აცრა არ მიწევს ამ ეტაპზე. ისე კი, ჩემმა მეუღლემ გაიკეთა ვაქცინა, თუმცა, მე თავად ალერგიული ვარ, ალერგიული რინტი მაქვს და საკვები პროდუქტების მიმართაც ალერგიული ვარ, შესაბამისად აცრისგან თავს შევიკავებ, არ შეიძლება ჩემთვის, ალერგიული პირებისთვის პირდაპირ უკუჩვენება აქვს“- გვითხრა კლინიკის ხელმძღვანელმა.
გაიკეთებს თუ არა კოვიდ 19-ის საწინააღმდეგო ვაქცინას, ამასთან დაკავშირებით ჯერ გადაწყვეტილება არ აქვს მიღებული ექიმ დავით ჩხარტიშვილს. მისი თქმით, ვაქცინის გაკეთებაზე მას შემდეგ იფიქრებს, რაც საკუთარ ჯანმრთელობის მდგომარეობას ჯეროვნად გადაამოწმებს. რაც შეეხება არჩევანს, იგი უპირატესობას „ასტრაზენეკას“ ვაქცინას ანიჭებს.
„მე პირადად „ფაიზერს“ „ასტრაზენეკას“ ვაქცინას ვამჯობინებ, უფრო ტრადიციული ვაქცინაა. ავიცრი თუ არა, ჯერჯერობით, ამაზე გადაწყვეტილება არ მიმიღია, იმიტომ, რომ ჯერ არ ვარ დარწმუნებული რაღაცეებში და მინდა მზად ვიყო ამ პროცესისთვის. ბევრ ფაქტორზეა დამოკიდებული ეს პროცესი, ჯერ უნდა გადაამოწმო შედედება როგორი მაქვს, ხომ არ მაქვს მოქმედი კორონა უსიმპტომოდ. მოკლედ, მინდა ვიყო დარწმუნებული საკუთარ ჯანმრთელობაში და მთელი ამ პროცედურის გავლის შემდეგ, შეიძლება, ავიცრა კიდეც“, _ ამბობს ლანჩხუთელი ახალგაზრდა ექიმი.
ექიმი-ლაბორანტი ელისო ჭიჭინაძე კი ვაქცინის გაკეთების მომხრეა და ამბობს, რომ შექმნილი მდგომარეობიდან თავის დასაღწევად ვაქცინაციას ალტერნატივა არ აქვს
„აუცილებლად უნდა ავიცრა, ისეთი რთული ათი დღე გამოვიარე კოვიდინფიცირებული რომ ვიყავი, ღმერთმა დაიფაროს, ისეთი დღეები ვინმემ გამოიაროს, ძალიან რთულად მქონდა. ჩემი ოჯახის ყველა წევრს ქონდა. ჯერ არ მაქვს დრო აცრის, პოსტკოვიდური დრო უნდა გავიდეს და აუცილებლად, სხვანაირად, ჩემი სუბიექტური აზრით, ვერ გამოვალთ არსებული მდგომარეობიდან. ხმამაღლა ვიტყვი, რომ მე აუცილებლად გავიკეთებ აცრას, აუცილებლად და მგონი ყველამ უნდა აიცრას.
რაც შეეხება არჩევანს- ფაიზერი თუ ასტრაზენეკა, არ ვიცი, სიმართლე რომ ვთქვა, სიღრმისეულად არც ერთ მათგანზე არ ვფლობ ინფორმაციას და როგორ უნდა გავაკეთო არჩევანი?!“-ამბობს ელისო ჭიჭინაძე.
ვაქცინის თემასთან დაკავშირებით არაერთგვაროვანი დამოკიდებულება აქვთ რიგით ლანჩხუთელებს, ზოგი აცრის გაკეთების გარდაუვალობაზე საუბრობს, ნაწილი კი უნდობლობას უცხადებს ამ პროცესს.
მოქალაქის თქმით, რომელიც ზვიადის სახელით გაგვეცნო: „მოგვწონს თუ არა, არსებული სიტუაციიდან სწრაფი გამოსავლის ერთადერთი გზა ვაქცინაციაა, რომელიც, სამწუხაროდ, საკმაოდ წინააღმდეგობრივი გზით მიმდინარეობს. მაშინ, როცა ჩვეულებრივი მიღებული პრაქტიკაა და ბავშვების ვაქცინაცია აპრობირებული მეთოდია, რატომაა საზოგადოების ერთი ნაწილისთვის კოვიდის საწინააღმდეგო აცრა, ლამის, ანტიეროვნული საქმე?! მიზეზი ამის ბევრია, მაგრამ თუ გვინდა, რომ ქვეყანა მალე გაიხსნას და ცხოვრების ჩვეულ რიტმს დავუბრუნდეთ, სახელმწიფომ კეთილი უნდა ინებოს და საზოგადოებას ჯერ აუხსნას სათანადოდ სიტუაცია და შემდგომ მაქსიმალურად მოკლე დროში უზრუნველყოს პროცესი, რაც მთავარია კარგი ხარისხის ვაქცინით. ჩინური ვაქცინის შემოტანა კი კიდევ უფრო მეტ ბუნდოვანებას გამოიწვევს მოსახლეობაში“.
როგორც მოქალაქეებთან გასაუბრებით ირკვევა, ისინი ვინც ვაქცინის გაკეთების მომხრეა, ეჭვის თვალით უყურებს ჩინური მედიკამენტის სანდოობას-„ვაქცინის გაკეთების მომხრე ვარ და თავადაც ვგეგმავ რომ ავიცრა, ოღონდ არა ჩინურით, რომლის შემოტანაც იგეგმება სამომავლოდ“.
ლანჩხუთელი ელგუჯა გოგუაძე კი ამბობს, რომ არ აპირებს აცრა გაიკეთოს: „რაღა კოვიდს მოუკლავს და რაღა მაგ ვაქცინას. დეაბეტიანი ვარ და ვერ გავრისკავ“.
„ვარგისი რომ იყოს, მედიკოსები იტყოდნენ უარს?! ექიმი უცხადებს უნდობლობას და მე, ასაკოვანმა როგორ, რის საფუძველზე ვენდო?! რა თქმა უნდა, არ ვაპირებ გავიკეთო ეს აცრა“, _ გვითხრა ქალბატონმა, რომელმაც საკუთარი ვინაობის გამხელა არ ისურვა.
