კორონავირუსის საწინააღმდეგო ვაქცინა მსოფლიოში დისკუსიის საგნად იქცა. საუბარი კი მისი გვერდითი ეფექტების შესახებ მას შემდეგ დაიწყო, რაც რამდენიმე იმუნიზირებულ ადამიანს, მათ შორის ახალგაზრდა ქალებს, თრომბი განუვითარდათ.
რამდენიმე ქვეყანამ, მათ შორის კანადამ და გერმანიამ მიიღეს გადაწყვეტილება, რომ ასტრაზენეკა 55 წლამდე ასაკის ადამიანების ასაცრელად აღარ გამოიყენონ, იქამდე, ვიდრე დაზუსტებით არ იქნება ცნობილი, არის თუ ვაქცინა თრომბის გამომწვევი.
შეკითხვაზე მოსალოდნელია თუ არა რომ მსგავსი გადაწყვეტილება საქართველოშიც მიიღონ, დაავადებათა კონტროლის ეროვნული ცენტრის ხელმძღვანელი ამირან გამყრელიძე ამბობს, რომ ქვეყანა ჯანდაცვის მსოფლიო ორგანიზაციის და ევროპის წამლის სააგენტოს რეკომენდაციებს მიყვება და ცვლილებაც იმ შემთხვევაში გახორციელდება, თუ ამის რეკომენდანციას აღნიშნული ორგანიზაციები გასცემენ.
„ასტრაზენეკას ვაქცინა შექმნილია ერთ-ერთ ყველაზე წამყვან და ძლიერ ოქსფორდის უნივერსიტეტში. იქ არსებობს ჯენერის უნივერსიტეტი. მოგეხსენებათ, ედუარდ ჯენერი გახლავთ ადამიანი რომელმაც პირველი ვაქცინა შექმნა და გამოიგონა 1796 წელს. ასტრაზენეკას ვაქცინა იქ არის შექმნილი და შემდეგ აწარმოებს შვედურ-ბრიტანული კომპანია. დიახ ამ ვაქცინის ირგვლივ არის დისკუსიები, რომ შესაძლოა იყოს დაკავშირებული ტრომბო-ვემბოლიური გართულებებთან, განსაკუთრებით ახალგაზრდა ქალბატონებში. მაგრამ ბევრმა კვლევამ, რომელიც ჩატარდა ევროპაში, ბრიტანეთში, მათ შორის ჯანდაცვის მსოფლიო ორგანიზაციისა და ევროპის წამლის სააგენტოს მონოტორირებით, ვერ ნახა სარწმუნო განსხვავებები ზოგად პოპულაციაში არაცრილებსა და აცრილებში ამ ტიპის გართულებების სიხშირეში.
ამ ეტაპზე ყველაზე ძლიერ მარეგულირებლებს, როგორიც არის ჯანდაცვის მსოფლიო ორგანიზაცია და ევროპის წამლის სააგენტო ამ ტიპის რეკომენდაციები, რომ ვაქცინის გამოყენების შეჩერება მოხდეს არ გაუცია. ჯერ გასცა, შემდეგ კი ისევ აღადგინა. ჯერჯერობით ეს შეჩერება დატოვა რამდენიმე სკანდინავიურმა ქვეყანამ და ახლა გერმანიამ ისევ შეაჩერა მისი გამოყენება გარკვეული ასაკის მქონე ადამიანებში.
ჩვენ ვეყრდნობით ჯამრთელობის მსოფლიო ორგანიზაციის და ევროპის წამლის სააგენტოს რეკომენდაციებს. ამ ეტაპზე ასეთი რეკომენდაციები, მათ არ გაუციათ. აქედან გამომდინარე, ყველა ამ დასკვნაში აღნიშნულია, რომ ამ ვაქცინის სარგებელი ბევრად მეტია, ვიდრე რისკი. თუ რამე შეიცვლება, ჩვენ, რა თქმა უნდა, შესაბამის ინფორმაციას მოსახლეობას მივაწვდით“,_ ამბობს გამყრელიძე.
