დრაცენა ჩვენში ძველთაგანვე იყო გავრცელებული. ზოგადად, ის აგავასებრთა ოჯახის წარმომადგენელია.
მიუხედავად იმისა, რომ დამახასიათებელ აღწერილობით მონაცემებში მას იშვიათად მოყვავილე, ჭირვეულ მცენარედაც კი მიიჩნევენ, გურიაში, ზოგადად დასავლეთ საქართველოში, ძალიან კარგად ხარობს და მალე ჰყვავის კიდეც.
ბებია-ბაბუების გადმოცემით, დრაცენას უხეში ფოთლების დანაწევრებით მიღებული ზონარი გამოიყენებოდა ჭიგოზე მცენარეების ასაკრავად. შემდეგ ეს ფუნქციაც დაკარგა და აქა-იქ თუ ნახავდით უმადურად მდგომარეს. არადა, დრაცენა ძალზე ლამაზი დეკორატიული მცენარეა. მისი სხვადასხვა ჯიშებიდან, ჩვენში კარგადაა გავრცელებული ხისებრი, ასევე, სანდერის დრაცენა.
მცენარის ქვედა ფოთლები, რომც არ შევაჭრათ, ის ხმობას თავისით იწყებს და ამიტომ დროულად შეკრეჭა ჯობს, რომ მცენარე ლამაზი იყოს და ყვავილიც დროულად გაშალოს.
დრაცენას გამრავლება ძნელი არაა და ძალიან ლამაზია, თუ მას ღობის გასწვრივ, ეზოს სიღრმეში განვათავსებთ. ზოგჯერ ის ქოთნებშიც გადააქვთ, თუმცა, ასე უფრო უჭირს და ყოველთვის კარგად გრძნობს თავს ღია სივრცეში, მზიან ადგილზე. ვერ ეგუება ჭაობს.
დრაცენა ჩვენს საკარმიდამოებში საუკეთესო იერს იძენს ღობეების გასწვრივ, ეზოს სიღრმეში. ასევე, ძალზე ლამაზია წრიულ ლოკაციებში, შუაში დარგული დრაცენა და ირგვლივ დაბალი ჯიშის, ბუჩქოვანი ყვავილების სიუხვე.
დრაცენას ფოთლები ძალზე ადვილად შეიძლება დავანაწევროთ. მთავარია, მის ხმლისებურ ფოთლებს დანის (ფრჩხილითაც) საშუალებით ერთხელ ჩავუსეროთ ნაპირი, შემდეგ კი სწრაფად “დავხევთ”. ასეთი მასალით, ანუ ეკოლოგიურად სუფთა საშუალებით, უმჯობესია, ავაკრათ სხვადასხვა ბოსტნეული, ვენახი, ვიდრე ე. წ. კაპრონის ძაფებით.
ძალზე ლამაზია, ასევე, სახელდახელოდ მომზადებული დრაცენას ფოთლის წვრილი ზონარ-ზორტებით, ბუჩქებად განთავსებული ყვავილოვნების (ქრიზანთემების, ცინიების, ქვამოკლიტეების…) შეკვრა და ბაფთების მსგავსად გამონასკვა. აქ ის ერთგვარი “სამკაულის” სახესაც იღებს.
უფრო მეტიც _ დრაცენას ფოთლის წვრილ ზონრებად დანაწევრებული გუნდა გამოვკრათ წვრილნასვრეტებიან, ბადისმაგვრ ქსოვილში და სხვადასხვა საოჯახო ჭურჭლის აბსოლუტურად დაუზიანებლად გასარეცხად თუ გასახეხად გამოვიყენოთ. ამ მხრივ ის გაცილებით საუკეთესო საშუალებაა, ვიდრე სხვადასხვა მეტალისგან დამზადებული ე. წ. სახეხი.
რაც მთავარია, დრაცენას აქტიური მოშენებით ჩვენ გვექნება ერთ-ერთი საუკეთესო, გამძლე და ამავე დროს ძალზე ლამაზი, ეკოლოგიური თვალსაზრისით მნიშვნელოვანი და საინტერესო მცენარე, რომელიც თანაბრად დაიკავებს ადგილს, როგორ ყვავილოვანთა ბაღებში, ისე, სამეურნეო საქმიანობაში.
“კარმიდამო ჩემი”
