2925911 ლარიდან, რომელიც ლანჩხუთის მუნიციპალიტეტს რეგიონებში განსახორციელებელი პროექტების ფონდიდან ერგო, ნაწილი ქალაქში რამდენიმე ქუჩის რეაბილიტაციის სამუშაოებს მოხმარდება.
ლანჩხუთის მერიის განმარტებით, რეგფონდის დაფინანსებით: დუმბაძის, წმინდა ნინოს, წულაძის, გოგიჩაიშვილის, მარჯანიშვილის, გვარჯალაძის,კუპრეიშვილის შესახვევისა და ჭავჭავაძის ქუჩების რეაბილიტაცია იგეგმება. სულ პროექტის ღირებულება 2591245 ლარტაა განსაზღვრული, საიდანაც 129563 ლარს თანადაფინასებისთვის ადგილობრივი ბიუჯეტი გაიღებს.
ზემონახსენებ ჩამონათვალში ვერ მოხვდა ლანჩხუთში, ქალაქის ცენტრალური პარკის მიმდებარედ არსებული ზაალ მდინარაძის ქუჩა, რომლის ერთი ნაწილი ასფალტირებულია, ქუჩის მეორე ნაწილზე მაცხოვრებლებს კი წლებია წვიმისას წყლიან ორმოებში უწევთ სიარული. მდინარაძის ქუჩის ამ ნაწილზე მუნიციპალიტეტის ხელმძღვანელობა მხოლოდ გზის მოხრეშვით კმაყოფილდება, რაც პრობლემაც მხოლოდ დროებით აგვარებს.
ცნობისთვის, აღნიშნულ ქუჩაზე ასფალტის საფარი 2016 წლის ზაფხულში, წინა საარჩევნო პერიოდში მხოლოდ იმ ნაწილზე დაიგო, სადაც “ქართული ოცნების” ოფისი მდებარეობს, ქუჩის მეორე ნაწილი კი, დაახლოებით, 70 მეტრი, რატომღაც შესასრულებელი სამუშაოები ნუსხაში ვერ მოხვდა. არადა, ქუჩის ამ მონაკვეთზე, რომლითაც იქვე მდებარე მრავალბინიანი საცხოვრებელი სახლის ეზოსთან სამანქანო გზა მიდის, გაცილებით მეტი მოსახლეა.
„სირცხვილია ქალაქის ცენტრში ქუჩა ასეთ მდგომარეობაში იყოს. 2016 წლის მერე ბევრმა არჩევნებმა ჩაიარა, ყოველ ჯერზე იმედის თვალით შევყურებდით, იქნებ ახლა მაინც მოგვხედონო, მარა არ გვიმართლებს, არ გვთლიან ასფალტის ღირსად, ტყლაპოში იარეთო. მარტო იმის თქმა, რომ დაგეგმილია სამუშაოები არ კმარა. მხოლოდ გზის მოხრეშვით პრობლემა არ გვარდება, ხარისხიანად უნდა გაკეთდეს, შუა ქალაქში „ვალინკით“ ხომ არ უნდა იაროს ადამიანმა?!“ _ ამბობს მოსახლეობა, რომელიც რეაბილიტაციის გარეშე დარჩენილი ქუჩის ნაწილის ხარისხიან მოწესრიგებას თხოვს.
საგულისხმოა, რომ აღნიშნული ქუჩის პრობლემაზე „გურია ნიუსი“ გასულ წელსაც წერდა და მოქალაქეებიც სოციალური ქსელის საშუალებით ცდილობდნენ მავანთა ყურადღების მიპყრობას.
სამწუხაროდ, შესაბამისი ფულადი სახსარი აქამდე არსად მოიძებნა და პრობლემა კვლავაც უცვლელია. უფრო ზუსტად კი გზა მოიხრეშა, თანხებიც დაიხარჯა, თუმცა გზა ისევ ოროებითაა სავსე.
“გურია ნიუსი” დაინტერესდა, რატომ ვერ მოხვდა ზემონახსენები ქუჩების ჩამონათვალში მდინარაძის ქუჩა და საერთოდ იგეგმება ამ პრობლემის მოგვარება მიმდინარე წლისთვის. სიტუაციის გარკვევის მიზნით ქალაქის მაჟორიტარ დეპუტატს კახა კვიტაიშვილს დავუკავშირდით.
„ადგილზე ვითარების შესასწავლად იმყოფებოდნენ მერიის ინფრასტრუქტურის სამსახურის თანამშრომლები და მათგან მაქვს ინფორმაცია, რომ გზის საფარის მოწესრიგებამდე აქ ღელეზე ნაპირსამაგრი სამუშაოებია განსახორციელებელი, ამის გარეშე პრობლემას არ მოევლება. გამაგრებითი სამუშაოები თუ არ ჩატარდა, ისე აქ ასფალტი არ დაიგება, მიწა ქვემოთ მიდის. ნამდვილად გვქონდა გეგმაში, რომ აქაც გაკეთებულიყო გზის საფარი, მაგრამ ამ ეტაპზე შეჩერდა, ჯერ ღელეზე ჯებირები უნდა გაკეთდეს. დაზუსტებით შემიძლია გითხრათ, რომ ამ მდინარაძის ქუჩის პრობლემას წელს, ზაფხულში მოევლება და აქ ასფალტის საფარი დაიგება”, _ ამბობს ქალაქის მაჟორიტარი დეპუტატი.
